Editouriau dóu mes de desèmbre 2025
Emé l’ivèr pèr Nouvè
Un grand fube
de mounde soun ana ounoura
lou Cor Sacra
Aqueste mes ié sian, anan estroupia lou voucabulàri de la laïceta en emplegant mai lou mot de “ Nouvè ” que faudrié ramplaça pèr “ ivèr ”, li poulìdi vacanço d’ivèr, li fèsto d’ivèr, e planta aro lou sapin d’ivèr.
Tant pis cantaren toujour :
Vivo, vivo Nouvè
Que pèr nosto alegrìo
Dóu mounde, dins Marìo,
Maduro li souvèt.
èn segur, la crècho de Nouvè sara encaro enebido dins lis emplaçamen coumunau, noun coume un dangié public, mai pèr respèt de l’article 1ié de la Coustitucioun que pauso lou principe d’uno Republico laïco, emé tambèn la lèi dóu 9 de desèmbre 1905 qu’enebis d’auboura vo d’apausa de signe vo emblèmo religious sus li mounumen public o en quauque emplaçamen public quente que siegue.
E pamens lou Counsèu d’Estat, dins un arrèst dóu 9 de nouvèmbre 2016, avié bèn di qu’uno crècho de Nouvè es uno representacioun suscetiblo d’agué uno pluralita de significacioun : simbèu crestian incountestable, la crècho de Nouvè es tambèn un elemen tradiciounau de decouracioun assoucia i fèsto de la fin de l’an sènso significacioun religiouso particuliero.
Après aquelo resquihado dóu cultuau vers lou culturau, lou juge aministratiéu admet aro l’istalacioun d’uno crècho de Nouvè, à titre tempouràri, à l’iniciativo d’uno persouno publico, dins un emplaçamen public, quouro presènto un caractère culturau, artistique o festiéu en seguido d’usage loucau, mai sènso espremi la recouneissènço d’un culte.
Basto ! li santoun soun d’usage loucau en Prouvènço, la carabinado de la laïceta a fa chi ? Que noun, li laïcard tènon toujour la barro. Pas proun d’escracha li crècho infamo, s’atacon aro, em’ uno bello maliço, is espetacle de religioun catoulico.
E volon desquiha dis escran un filme dóu cinema francés, se ié dis “ Sacré-Cœur ”, aquéu Cor sacra es un doucumen-ficioun realisa pèr Steven e Sabrina Gunnel, emé pèr toco de mena lou divin vers l’ome en relatant lis aparicioun de Jèsus e de soun cor brulant. Es despièi l’estiéu de 2023 à Nosto-Damo-dóu-Lau qu’aquélis autour se soun counsacra au Cor sacra de Jèsus.
Lou filme raconto l’istòri de santo Margarido-Marìo Alacoque, religiouso vesitandino dóu siècle XVIIen.
Li proumié cridassié à l’encontro d’aquéu filme fuguèron la RATP e la SNCF que vouguèron pas metre lis aficho de publicita d’aquéu filme disènt qu’èron “ trop counfessiounalo e prouselito ”, acò belèu aurié fa desraia si trin.
Aquelo coumèdi de la laïceta faguè pièi mirando dins la capitalo de Prouvènço, Marsiho, la vilo de la Bono-Maire, que i’a 305 an d’acò se fisavo au Cor sacra dóu Criste pèr escapa à la pèsto e aro a vist soun Maire, Moussu Payan, courre faire annula lou filme “ Sacré-Cœur ” uno ouro avans sa proujeicioun au castèu de la Buzino, lou dimècre 22 d’óutobre, envoucant uno atencho à la laïceta, mai èro pulèu aqui uno atencho à la liberta d’espressioun e à-n-aquelo de creacioun e de difusioun artistico.
Urousamen, dins l’encastre de sa sesido, lou tribunau amenistratiéu de Marsiho, lou dissate 25 d’óutobre, a ourdouna à Moussu lou maire d’autourisa la proujeicioun dóu filme.
Acò pòu sembla uno galejado marsiheso, estènt que lou dimenche 16 de nouvèmbre Moussu Payan, óublidous de sa laïceta, inaguravo sus un emplaçamen public d’un quèi dóu port la 223enco Fiero i santoun… Cor sant, santoun sabèn plus ounte penja lou lume… Prouvençau e catouli nosto fe à pas fali…
Tant soulamen, aro, fau croumpa un chut pèr lou Felibrige, senoun li laïcard ié leissaran pas festeja la Santo-Estello sus uno plaço publico e subre-tout pas auboura la Coupo Santo, em’ aquelo santeta toujour presènto qu’escaragno la laïceta.
O bello santo Estello,
Meno au païs seren,
Au païs dis estello,
Lou pople felibren !
Enfin ora pro nobis perdèn l’oremus :
La Prouvènço te suplico
Dins soun vièi e dous parla,
La Prouvènço es catoulico :
Nosto-Damo, escouto-la !
Dins tout, la critico laïco s’es bounificado, a fa miracle, quàsi un milioun d’espetatour soun ana vèire lou filme dóu Cor Sacra.
Bernat Giély
|
