Editouriau dóu mes de setèmbre 2017

Assemblado naciounalo

Li deputa en estat de marcho pèr sauvanosto lengo...

Pas proun d’un nouvèu presidènt, avèn aro, uno Assemblado naciounalo que mai novo, reviscoulado pèr la capitado d’un partit tout nòu. En marcho, soun pas ana plan, an fa peta lou taloun, tibla la guèto, tibla l’arquet, e, laurant dre, tira davans.
Demié li 577 deputa, n’i’a mai de 300 d’aquéu partit di caminaire, qu’emé sis aliat dóu Modem baion ansin li plen poudé au presidènt de la Republico e à soun gouvèr.
An fa mirando, mai couneissèn pas gaire aquéli fresc e jóuinis elegit pèr saupre adeja quento rego prene.
Li fau leissa un pau barqueja…

Ço que nous tarabusto toujour, es lou nouvèu vote d’uno lèi pèr proumòure l’ensignamen di lengo regiounalo, estènt qu’aquelo de l’an passa, pèr l’encauso dóu chanjamen, es abandounado… L’ensignamen inmersiéu que se prepausavo te l’an nega !
Óubliden pas nimai la ratificacioun de la Charto éuroupenco di lengo regiounalo.
Li bèu deputa coustuma de nòu auran de nous dire sa pousicioun. Faren pas jouga lou tant-digan pèr éli, mai pèr li rescapat re-elegi poudèn faire lou comte, sus li 145 qu’an garda soun sèti, n’i’a un quarantenau quand vouta contro la ratificacioun de la Charto éuroupenco di lengo regiounalo. Tout lou restant di contro-istaire se soun fa leva de cassolo coume se l’ameritavon.
Adounc aquéli reboussié que volon pas di lengo regiounalo soun encaro aperaqui 3 pèr regioun, eiceptat malurousamen pèr la Prouvènço-Aup-Costo d’Azur ounte avèn gagna la cherpo di marrìdi lengo, d’aquéli qu’an vouta contro n’avèn 8 toujour presènt à l’Assemblado naciounalo :

— Pèr lou despartamen di Bouco-dóu-Rose , soun 2 dóu partit Les Républicains :
Valérie Boyer de Marsiho.
Bernard Deflesselles d’Aubagno.

— Pèr lou despartamen de Vau-Cluso, soun 2 dóu partit Les Républicains :
Jean-claude Bouchet de Cavaioun.
Julien Aubert de Carpentras.
emai 1 dóu partit de la Ligue du Sud :
Jaque Bompard d’Aurenjo.

— Pèr lou despartamen dóu Var, n’i’a uno  dóu partit Les Républicains :
Geneviève Levy.

— Pèr lou despartamen dis Aup-Maritime, soun 2 dóu partit Les Républicains :
Bernard Brochand de Cano.
Michèle Tabarot dóu Canet.

Fau apoundre tambèn aquéli qu’an agu la peto de vouta, 2 valerous que pèr saupre ni faire ni desfaire, ni plaire ni desplaire, an fa tiro-molo pièi e jouga dis escampeto… se soun astengu :

— Pèr lou despartamen di Bouco-dóu-Rose , n’es un dóu partit Les Républicains :
Gui Teissier de Marsiho.

— E pèr lou despartamen dis Aup-Maritime, n’i’a tambèn un dóu partit Les Républicains :
Eric Ciotti de Niço.

Sai-que, belèu… de Paris, lou partit Les Républicains aurié pas baia sis ordre à-n-aquéli bràvi prouvenciau que volon garda sa plaço, adounc qu’enchau se fau escracha la lengo istourico dóu païs que soun censa representa ?

Basto ! Au bout dóu comte d’aquéli deputa de Prouvènço-Aup-Costo d’Azur que participèron à la voutacioun pèr la ratificacioun de la Charto éuroupenco di lengo regiounalo sian bèn countènt de n’en retrouba encaro tres à l’Assemblado naciounalo emai vuei aguèsson raliga lou nouvèu partit de La République en marche, avien vouta “ pèr ” la ratificacioun de la Charto :
- Joël Giraud dóu despartamen dis Àutis-Aup.
- François-Michel Lambert dóu despartamen di Bouco-dóu-Rose.
- Cristòu Castaner dóu despartamen dis Aup d’Auto Prouvènço  (éu, es aro membre dóu gouvernamen ).

Bon, tout acò es lou passat, fau veni aro à la realisacioun di proumesso :
“ Li mejan d’espressioun di lengo regiounalo saran aumenta. Ansin lou candidat d’En Marcho !, facilitara, tre l’escolo, l’aprendissage di lengo e culturo regiounalo…”
Acò es de paraulo bèn ensacado !

Adounc, bounda d’esperanço, sian sus l’espèro de vèire, lèu, lèu, uno nouvello proupousicioun de lèi toucant la sauvo-gardo di lengo regiounalo à l’Assemblado naciounalo. Aquelo assemblado rejouvenido e reguerguihado qu’a bèn chausi soun presidènt, Francés Rugy, lou deputa que l’an passa defendié la proupousicioun de lèi relativo à la proumoucioun di lengo regiounalo. Pòu aro, que miés reprene sa toco :
“…il est donc de notre devoir politique de défendre, quoi que l’on pense de l’usage des langues régionales, cette partie du patrimoine de la France.”
E pièi, s’a pas vira caloto, demanda de faire pèr de bon ratifica la Charto éuroupenco di lengo regiounalo, estènt coume dis :
“ Ceux qui refusent la ratification de la Charte européenne des langues régionales ont une attitude extrêmement crispée, conservatrice, sur ce sujet, alors qu’à l’époque nous avions ouvert une porte.”

La porto es adounc abadarnado, aro la fau durbi à brand, Moussu lou Presidènt de l’Assemblado naciounalo !
De tout biais i’aura d’ajudo emé li tres regiounalisto corse pèr buta à la rodo, Michel Castellani, Jean-Félix Acquaviva, Paul-André Colombani, qu’an assaja de mounta un groupe parlamentàri emé Jan Lassalle, mai de-bado !
Pièi, rèsto toujour li valènt deputa bretoun emé Pau Molac, menaire di revendicacioun pèr l’aparamen di lengo regiounalo.

Bello esperanço, o verdo espèro !

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com