| |
| Editouriau
dóu mes de setèmbre |
 |
|
Anen,
dau! pèr la cridoÀ passa
tèms, pèr lis ome dóu païs, èro
li Vendémi, aro, pèr nous autre, es la Rintrado
coume pèr li drole, valènt-à-dire que lis
enfant e sis ensignaire rintron à l’escolo, que
nòstis elegit rintron de vacanço, e que tout lou
restant rintran la tèsto pèr se bèn aligna
sus li nouvèu coumandamen predica pèr la televisioun.
Basto! rintro que rintraras, nous faudra, aquest an, moustra
lou bout dóu nas pèr pas se leissa mena pèr
li narro.
|
| |
La
grando fèsto dis eleicioun presidencialo
a coumença, li manege de tóuti li partit viron deja à n’en
baia lou tournit, si balançadou mounton-davalon en bèu
tapo-quiéu, e tóuti li sauto-en-banco de la voto,
urous coume de papo, baton l’estrado pèr nous abéura
de bèlli resoun. Li loup soun dins lou pargue d’atracioun.
Mai, poudèn pas cauca foro l’iero.
Li presidenciable soun en rèng sarra, nous van proumetre
mai de pitanço que de pan emé si paraulo avantajouso… Sabèn ço
que n’en vòu dire!
Tant soulamen poudèn pas manca l’escasènço,
de demanda à tóuti aquéli moustre de la poulitico
se soun d’avis que fau sauva li lengo regiounalo en Franço,
valènt-à-dire moudifica l’article 2 de la Coustitucioun
e aplica la Charto di lengo e culturo éuroupenco.
Lou Felibrige s’es deja mes à l’obro, soun Capoulié Jaque
Mouttet es tant lèst pèr escriéure que pèr
rescountra li candidat.
N’es parié dóu Mouvamen Parlaren que part en
batèsto, à l’aflat de soun presidènt
Marc Audibert pèr fourça la man i presidenciable.
Bèn segur, li proumesso van ploure, d’ùni van
se dire que, pecaire, fasènt pas lou pes (eleitourau), esclapan
pas rèn, disèn pas rèn, saren toujour countènt.
Pèr se faire entèndre, fau crida, e la crido es previsto
pèr lou dissate 17 de mars à Beziés, tout
bèu just avans lis eleicioun. Es aqui que faudra se faire
ausi pèr lou futur presidènt de la Republico.
Adounc manqués pas, tre aro, de marca aquelo journado
sus voste casernet.
E dins la draio de Frederi Mistral, Dis Aup i Pirenèu e
la mand dins la man la gardaren riboun-ribagno nosto rebello lengo
d’O.
Bernat Giély
|
|
|
|
Bernat
Giély
|
La
crido pèr ana à Beziès
Apara la diversita lingüistico e culturalo dins lou monde
es pèr lis annado que vènon uno escoumesso di grando.
En Franço, pèr acò, la situacioun legalo
es desfavourablo à-n-aquel aparamen. La lengo d’oc,
especialamen, se trobo bèn macado pèr-ço-qu’avèn
pas de poulitico pousitivo pèr sa trasmessioun.
Sus lou territòri ounte se parlo la lengo, fau adounc
crea un envirounamen favourable à l’ensignamen de
la lengo e dins la lengo, à la creacioun culturalo dins
aquelo lengo, à la presènci de la lengo dins li
media eleitrouni, audiò-visuau e escri, à soun
emplé dins la vido vidanto. Tout acò sara un encourajamen à la
trasmessioun de la lengo d’oc pèr li famiho.
Li media
Voulèn un servìci publi de radiò e de televisioun
en lengo d’oc.
Demandan uno ajudo especifico pèr lis ouperatour priva
(radiò assouciativo, televisioun, prèsso) que travaion
en favour de la lengo d’oc.
La creacioun
Lou soustèn à la creacioun, acò vòu
dire uno poulitico especifico en favour de l’edicioun,
dóu tiatre, de l'espectacle viéu en generau, dóu
cinema e de la musico.
La poupulacioun dèu poudé descurbi uno culturo
trop souvènt amagado.
L’ensignamen
Fau que cadun posque chausi, se lou desiro, un ensignamen souto
de formo diverso:
·
un ensignamen en lengo d’oc (bilingue à parita ouràri
o en inmersioun)
·
un ensignamen de la lengo e de la culturo d’oc.
· un ensignamen especifi destina is adulte
S'agis d'uno poulitico d'óuferto generalisado.
La vido publico
La lengo d’oc, la fau trouba dins la vido publico. Acò vòu
dire pèr eisèmple:
·
lou respèt de la toupounimìo e la meso en plaço
d’uno signalisacioun bilengo;
·
l’encourajamen à l’utilisacioun de la lengo
d’oc dins li liò public e dins la vido
soucialo.
Tóuti aquésti demando an uno souleto toco: permetre à uno
lengo de viéure e à tóuti li que lou desiron, de l'utilisa.
S'adrèisson d’un meme cop i couleitivita (coumuno, coumunauta de
coumuno, despartamen, regioun) e à l’Estat. Cadun dèu prene
en cargo ço qu'es de sa respounsabilita. Revèn à l'Estat
d'asata sa legislacioun.
Institut d'Estudis Occitans, ourganisme culturau recouneigu d'utilita publico
F.E.L.C.O. Federacioun dis Ensignaire
de Lengo e Culturo d'Oc, Calandreta, escolo bilengo assouciativo
laïco
Oc-Bi, assouciacioun de parènt d'escoulan pèr l’ensignamen
bilengue publi
Conselh de la Joventut d'Oc, assouciacioun de jouve
Felibrige, mouvamen de defènso de la Lengo d'Oc founda en 1854 pèr
Frederi Mistral
|
|
