Editouriau dóu mes de setèmbre

La bono restauracioun dóu païs

L'estiéu s'acabo emé la fin de l'estivage de vacanço. D’asard que l'aguessian pas senti, fuguè caud nous an di e redi li journau pèr se plagne de quicon, aquest ivèr sara de la fre.
Boutas ! la migracioun di barrulaire a pas couneigu de criso. La vèndo di glacet a "espeta" pèr emplega un mot à la modo, pèr pas dire que li rousigo-dardèno à l'agachoun di touristo se soun rampli li pocho.
Lou soulèu restauro.
Mai aquest an i'aguè pas que la mano dóu soulèu, li restaurant an degu chifra de tèsto pèr carcula la rato pourcioun dóu presènt dóu gouvernamen pèr saupre ço que devien garda dins sa pocho.
Fai de tèms que la "restauracioun tradiciounalo", coume se dis, renavo de degué paga la tasso sus la valour ajustado au taus de 19,6% en liogo e 5,5%, estènt que pèr li aubergo mouderno, batejado "fast food" vo "Kebab", dins la maje part di cas se pagavo que lou taus redu de 5,5%. L'encauso n'èro uno reglamentacioun d'espicié voutado en soun tèms pèr nòsti bràvi deputa.
Lou taus de TVA nourmau toucavo la biasso counsumado sus plaço d'assetoun, — quand anavian au restaurant, fau dire, èro pèr manja à taulo asseta sus uno cadiero. Lou taus redu de la TVA, éu, s'aplicavo à la biasso empourtado dóu magasin de l'espicié, dóu bouchié, dóu boulengié vo dóu trataire. Enjusqu'aqui la councurrènço jougavo pas. Chasque mestié avié sa clientèlo. Tant soulamen, à l'aflat di reclamo pèr l'Ouncle de Tom vo pèr lou Mac de Donald, li goust an chanja, li gràndi cadeno de la restauracioun rapido se soun espandido. En Prouvènço se soun meso à l'ample. Dins Marsiho se manjo mai, à crèbo-panso, d'amburguèr que d’adaubo à la prouvençalo. Acò dèu saboureja dins la bouco, que tout lou mounde se n'en coungousto. À chascun sa pitanço, anan pas critica lou rebalun.
Pèr n'en reveni à noste item, es lou biais de faire di fastefoudié e di kebabié que boutè lou fioc is estoupo. Finocho an bèn coumprés qu'en coublant la restauracioun sus plaço e la vèndo à empourta de la memo biasso, si pres fasien lou mounto-davalo de 19,6% à 5,5%, valènt-à-dire pèr lou meme travai, estènt que li counsumaire dins aquélis establimen soun pas servi, mai van querre sa nourrituro à la caisso, lou patroun pòu jouga sus li 14% de TVA en mai vo en mens pèr arredouni soun benefice. Segur pòu i'agué de countourrole, quau saup, de cop que i'a, un d'aquéli qu'emporto sa biasso se poudrié asseta… Dins tout, li manjadouiro rapido emé sa TVA reducho an faussa la councurrènço à respèt di restouraire tradiciounalisto. Aquelo vergougno s'es acabado lou proumié de juliet, lou taus redu de la TVA s'aplico d'en pertout à la counsumacioun sus plaço.
D'en pertout, mai pas en tóuti. Li bràvi bevèire de Couca-Coula saran favourisa. Li laid pintaire de vin saran subre-tassa, la TVA pèr éli, asseta vo dre, rèsto à 19,6%.
Coume la boutiho de la mita di tres quart costo autant que lou repas riscas pas de vous avisa que lou gouvèr a fa uno flour i marchand de biasso.
Pèr fourça li païsan dóu Miejour à derraba si souco fau bèn aquelo fermeta gouvernamentalo… après quand li vin de Califournìo saran coumercialisa pèr la firmo Couca-Coula aqui se faran de counsentido.
Bon, vai ! la reducioun di pres sus lou rebalun, sènso bevèndo, aurié pouscu avesina dès à quatorge dóu cènt em' uno bono calculeto que fai li divisioun, li multiplicacioun e li percentage… aquélis óutis an degu soufri de la calour e pas toujour bèn founciouna.
Fai ana lou coumèrci.
Uno autro meno de restauracioun nous es vengudo tambèn au bèu de l'estiéu. Lou presidènt dóu Counsèu regiounau s'es mes dins l'idèio de restaura PACA. Après nous agué chapouta lou drapèu de Prouvènço en escudet barrioula em' un pèis pèr la mountagno e uno aiglo pèr la mar, ié poudèn faire fisanço.
Adounc aro vòu chanja lou noum dóu païs, la siglo coumercialo de sa boutigo PACA a reçaupu lou cop de gràci en la fasènt pega au quiéu di veituro. Aquelo couiounado s'apren pas à-n-éu, mai coume si davancié, se n'es gaire soucita enjusqu'aro.
Ansin noste valènt presidènt a fach uno counsulto sus l'internet pèr saupre coume li Prouvençau voulien souna soun païs. De-segur, èro à mita demoucrati, toucavo que la poupulacioun engaubiado en enfourmatico, pèr pas dire lou pessu, mai èro lou biais lou mai eisa de prene l'avejaire d'un mouloun de mounde.
S'eigrejavo qu'uno questioun simplo. Questiouno que questiounaras lou site dóu Counsèu Regiounau, crea à bel esprèssi, caufè enjusqu'au 31 de juliet.
Tre la debuto d'avoust Michèu Vauzelle, pres de court, anounciavo dins lou quoutidian "La Provence" que lou noum prepausa pèr la regioun que venié en tèsto èro bèn-segur "Provence" e pas mai.
En pouliticaire avisa, virè e revirè pèr metre de reservo…. Poudrian retourna is urno, que !
La bataio es pas gagnado, li Pacalian soun bèn istala dins la vièio Provincia romana.
De tout biais la questioun es móugudo, li candidat is eleicion regiounalo de l'an que vèn auran tóuti de respondre. Lis esperan veni emé si gràndi braio de bon Prouvençau escambarla.

Bon, lou sabèn, la pouliticaio nous fan marcha. Alor bravas que sian, tóuti li dous an, ié fasèn vèire coume marchan bèn, aquest an es à Carcassouno que se fara lou mai grand passo-carriero, lou dissate 24 d'óutobre. D'aqui entre aqui, d'ùni se poudran escaufa dins d'àutri manifestacioun que s'anóuncion emé grand brut à la chut-chut.
Sourti de l'estiéu, poudren marcha à l'oumbro.

Manifesta à Carcassouno lou 24 d'óutobre

Lou 17 de mars de 2007, i'avié 20 000 persouno pèr carriero à Beziés. La ciéuta di Trencavel, emai li païs d'O tout entié, avien jamai aculi tant de mounde dins uno manifestacioun pèr nosto lengo.
Emé nòsti diferènci, tóutis uni dins la memo acioun avèn revendica de dre pèr la lengo d'O. Vengu de Gascougno, dóu Limousin, de Lengadò de-segur, d'Auvergno o de Prouvènço, dóu Perigord o dóu Daufinat, li gènt èron acampa dins l'estrambord.
De Prouvènço en particulié, de centeno, emai de milié de persouno moustrèron à bèus iue vesènt sa voulounta d'apara soun parla.

Desempièi d'aigo a passa souto li pont e lou gouvèr a fa un pichot pas vers la recouneissènço di lengo regiounalo, de nosto lengo d'Oc en particulié: a marca uno pichoto fraso dins la Coustitucioun.
Evidentamen acò sufis pas, voulèn de dre fin d'apara coume se dèu nosto lengo e ié baia un aveni bèn assegura.
Uno mencioun dins la Coustitucioun es uno bono causo, mai devèn lucha encaro pèr óuteni qu'uno lèi siegue voutado en favour di lengo regiounalo.

De-segur lou Felibrige, espandi sus tout lou terraire d'O, rampello à manifesta estènt que segound l'article proumié de sis estatut :
— Lou Felibrige es establi pèr apara, manteni e enaura la lengo, la culturo, la civilisacioun e l'identita di païs d'O ; pèr afreira e empura tóuti aquéli que se recounèisson dins la Pensado e l'Obro de Frederi Mistral.
Lou Felibrige qu'èi lou garant dis idèio espremido pèr Frederi Mistral, qu'èi fidèu à sa pensado, agis pèr l'aparamen e la proumoucioun de La lengo d'O dins tóuti si varieta, que chascuno n'es l'espressioun pleno e entiero.
Lou Felibrige revendico pèr La lengo d'O de dre fin d'assegura soun espandimen e sa trasmessioun ; s'agis de demanda uno lèi qu'assegure lou sauvamen d'aquéu patrimòni e soun aveni.
Mai es pas necite d'èstre marca au Felibrige, o à qunte mouvemen que siegue, pèr ana manifesta lou 24 d'óutobre, n'i'a proun d'èstre fidèu is idèio e à la pensado de Frederi Mistral. Tóuti lis ome d'O, tóuti li Prouvençau en particulié soun counvida à ié veni en troupo sarrado.

Adounc vous demandan coume en 2007 :
- de vous moubilisa. Tóuti lis aparaire de nosto lengo e de nosto culturo dèvon se faire un devé d'ana manifesta
- Fau faire veni tambèn d'ami, de parènt, de mounde interessa pèr "lou sauvamen d'aquéu patrimòni e soun aveni"
- Tre aro vous fau prevèire voste viage en camin de ferre, en veituro, reteni de càrri
- Fau alesti de drapèu "sang e or", de bandeirolo, de pancarto : dessus metès-ié : lou noum de vosto assouciacioun, de voste endré,
- Devèn moustra l'impourtanço de noste mouvamen emé de crido simplo sus li pancarto : Voulèn uno lèi pèr nosto lengo - La gardaren riboun-ribagno nosto rebello lengo d'O - Dis Aup i Pirenèu e la man dins la man - Nautre en plen jour voulèn parla toujour la lengo dóu Miejour - Parlan prouvençau e n'en sian fièr - Uni dins l'acioun aparen nòsti diversita…
De saupre encaro que lou 24 d'óutobre i'aura peréu uno manifestacioun de revendicacioun pèr la lengo en Catalougno e uno autro au Païs basque. Adounc vesès que saren noumbrous à revendica pèr li lengo regiounalo.
Dóu mai saren noumbrous lou 24 d'óutobre à Carcassouno, dóu mai faren obro valènto pèr la Causo, dóu mai lou mounde respetaran nòstis idèio, dóu mai lou gouvèr nous prendra en counsideracioun.
Coumtan sus vous !

Rendès-vous à 14 ouro davans la garo dóu camin de ferre de mounte partira lou passo-carriero. S'acabara à la Ciéuta sus li cop de 18 ouro.