Editouriau dóu mes de setèmbre 2025
Autounoumìo
L’Estat de Nouvello-Caledounìo
de-coutrìo emé l’Estat francés
Barrulado en gapencés
Un vièi pople fièr e libre dins l’Estat de Nouvello-Caledounìo…
Es lou 2 de juliet dins l’encastre d’un acamp istourique sus l’aveni de l’isclo, durbi pèr lou presidènt de la Republico, Enmanuèl Macron, que se decidè d’un proujèt d’acord souto lou titre “ Lou pariage de la fisanço ” que sara signa pèr li forço caledouniano e l’Estat francés, lou 12 de juliet à Bougivau dins lis Ivelino. “ Aquel acord prevèi uno nouvello ourganisacioun poulitico, uno soubeireneta mai partejado e uno refoundacioun ecounoumico e soucialo de l’archipèlo ”.
Li principe de l’acord soun clar :
- Uno ourganisacioun istituciounalo pereno, oufrissènt à l’archipèlo un retour à l’estabilita e la duberturo de nouvèlli perspeitivo. “ L’Estat de Nouvello-Caledounìo ” sara iscri dins la Coustitucioun franceso e recouneigu pèr la coumunauta internaciounalo.
- Uno naciounalita caledouniano, que permetra i Caledounian de beneficia d’uno doublo naciounalita, franceso e caledouniano.
- Uno lèi ourganico especialo definira li coundicioun de meso en obro de l’acord.
- Uno lèi foundamentalo, adóutado pèr lou Coungrès de la Nouvello-Caledounìo, counsacrara la capacita d’autounoumìo de l’archipèlo.
- Li poupulacioun interessado pèr aquel acord saran apelado au vote.
- Lou gouvèr presentara li moudificacioun coustituciounalo e ourganico necessàri à la councretisacion de l’acord au Parlamen.
Pèr acò se vai moudifica la Coustitucioun franceso, soun titre 13 que fai mencioun de l’acord de Noumea passara à l’acord de Bougivau en setèmbre 2025, tant soulamen faudra acampa à Versaio lou Coungrès de l’Estat francés pèr vouta aquelo revisioun coustituciounalo en daverant uno majourita di tres dóu cinq.
Pièi, s’acò capito, es previst de soumetre en febrié 2026 aquéu proujèt d’acord à l’aproubacioun di Neou-Caledounian, pèr enfin en mars e abriéu 2026 faire adóuta uno lèi ourganico pèr la traducioun juridico de l’acord e quouro lou Coungrès caledounian sara elegi pèr la periodo de 2026 à 2031 aura de faire adóuta la lèi foundamentalo de la Nouvello-Caledounìo, que counsacrara sa capacita de s’ourganisa souleto. Aquelo lèi poudra moudifica e enaussa li signe identitàri dóu païs, valènt à dire lou noum, lou drapèu, la lengo, etc., e li proupousicioun venènt de la soucieta civilo.
À-n-aquelo lèi foundamentalo se ié poudra metre un code de la ciéutadineta caledouniano.
Ansin, la naciounalita caledouniano sara meso en plaço tre la debuto dóu mandat dóu Coungrès de la Nouvello-Caledounìo en 2026.
Pèr agué aquelo naciounalita, li coundicioun soun adeja precisado :
- èstre esta amés à participa à l’eleicioun dis assemblado de prouvinço e dóu Coungrès de la Nouvello-Caledounìo de 2026 ;
- èstre enfant d’un parènt remplissènt li coundicioun d’aquesicioun de la naciounalita calidouniano ;
- èstre nascu en Nouvello-Caledounìo de parènt remplissènt pas li coundicioun d’aquesicioun de la naciounalita calidouniano e ié resida à la dato de la demando d’aquesicioun de la naciounalita fissado pèr la futuro lèi foundamentalo ;
- resida en Nouvello-Caledounìo despièi pèr lou mens dès an à la dato de la demando d’aquesicioun de la naciounalita ;
- èstre uni despièi au mens 5 an pèr lou maridage vo un pache civil de soulidarita à-n-uno persouno aguènt la naciounalita caledouniano e resida à la dato de la demando d’aquesicioun de la naciounalita desempièi au mens cinq annado à la dato de la demando.
Mai, la renounciacioun à la naciounalita franceso entrinara aquelo de la naciounalita caledouniano.
Se dis que lou proujèt respetarié lou dre di pople à dispausa d’éli-meme.
Mai pèr lis independentisto dóu Front de liberacioun naciounalo Kanak e soucialisto, FLNKS, sarié qu’uno estapo, d’elemen soun pousitiéu d’autre noun e bèn segur lou menistre Manuèl Valls a respoundu que lou tèste èro encaro suscepible d’èste amenda, de tout biais lou pople caledounian déura valida lou tout pèr referendum.
S’óublido pas que tóuti li referendum pèr l’independènci avien fa chi, mai vuei lis independentisto e lis anti-independentisto se soun entendu, tant soulamen lou trasfert de coumpetènci se fara emé de mecanisme coustregnènt e subre-tout faudra de majourita poulitico forço dificilo d’ategne dins aquéu futur Estat de la Nouvello-Caledounìo.
La Prouvènço, elo, que s’èro unido à l’Estat francés coume un principau à-n-un autre principau es toujour badaiounado à pas dre à la decoulounisacioun, se dèu teisa. Se pòu plus entèndre sa lengo e li gouvernaire parisen se n’en garçon. Lou Manuèl Valls favourable is independentisto caledounian, que s’en venié de faire parié en Catalougno espagnolo, mai baile de l’Estat francés s’es pas jamai óucupa de la Prouvènço perdudo dins la PACA e aro dins lou Sud de Renaud Muselier. De-segur li Prouvençau, militant independentisto, soun pas encaro proun noumbrous, pèr demanda l’autounoumìo. Soubro pamens lis aparaire de la lengo istourico de noste païs tanca davans lou proumié ministre, Francés Bayrou, toujour favourable à la sauvo-gardo de la lengo d’oc e qu’a d’àutri causo à faire que de s’óucupa d’acò.
Dins l’Estat de Nouvello-Caledounìo 98 % de la poupulacioun es francoufono, empacho pas que la lengo caledouniano siegue meso en avans.
En Prouvènço, se boulegan pas, d’un vièi pople fièr e libre sian belèu la finicioun.
Bernat Giély
Darniero enfourmacioun : Lou FLNKS vèn de vira bandiero, soun rescontre emé Manuèl Walls lou 26 d’avoust ié faguè pas rèn : “ Lou FLNKS a reafierma emé clarta e determinacioun soun rejit categourique dóu proujèt d’Acord de Bougivau ”.
|
