Editouriau dóu mes de setèmbre 2021
Neoulougisme
Mèstre Gerard Jean
lou fidèu redatour nous a quita...
Couquin de Counsèu
Prouvènço d’aro es en grand dóu, soun fidèu redatour, Gerard Jean, vèn de defunta au mes de juliet à l’age de 83 an à Lunèu.
Gerard Jean èro nascu en Aurenjo, ounte soun paire, istitutour, asseguravo la direicioun de l’escolo pensiouna Nosto-Damo.
Aqui, Gerard, encaro forço jouine, agantè uno marrido malautié, la meningito, èro quàsi à l’article de la mort, urousamen uno coumunauta de sorre de l’escolo Sant-Louis coumencèron de dire de preguiero pèr lou sauva, invoucant l’intercessioun auprès de Diéu de la foundatriço d’aquelo escolo, la Reverèndo Marìo Rivier, e la garisoun se faguè tant vite que soun medecin coume sis eminènt counfraire d’Avignoun coumprenguèron pas. La Maire superiouro de la coungregacioun, elo, presentavo Gerard lou pichot miracula, sauva pèr la Reverèndo Marìo Rivier, que sara beatificado en 1982 pèr lou papo Jan-Pau II. Miracle vo graço divino, Gerard èro deja un persounage carismatique e insoulite.
Se capitè pièi que soun paire abandounè l’ensignamen pèr faire de negòci e Gerard se retroubè à La Bouiadisso pèr soun proumié jour d’escolo. D’aquéu tèms se parlavo prouvençau dins tóuti li famiho e pèr carriero, mai es à l’escolo qu’aprenguè à lou legi coume diguè : “Pres de passioun pèr aquéu lengage devendrai un de si defensour au sen dóu Felibrige”, e racountavo que demié li Fraire de soun escolo, pèr evita li fauto d’ourtougràfi dóu francés, se servien dóu mot prouvençau, tau l’eisèmple dóu “S” despareigu e devengu acènt circounflèisse en francés, “ bastimen ” fai “ bâtiment ”, bèl acènt dóu souveni pèr éu.
Èro dins si quinge an quouro soun paire reprenguè lou mestié d’ensignaire à Vaurias. Aqui se boutè au travai emé un proumié mestié de pintre en bastimen, pièi aprendis en empremarié e à 17 an s’engajara dins lou 11en Regimen de Cuirassié en Aurenjo. Cargara lèu li galoun de Bregadié e acetara de parti coumbatre en Argerié. Countara dins soun libre “ D’ombres et de Lumières ” tóuti li tressimàci de ço que se disié d’óuperacioun de mantèn de l’ordre, pèr pas dire la guerro.
L’an de si 20 an soun countrat s’acabo, lou volon garda emé proumesso de passa óuficié, mai de-bado, s’entourno à Vaurias e retrobo sa plaço à l’empremarié.
Mai, se ié counseiè pièi de quita aquéu travai pèr èstre founciounàri de Pouliço. Esitè gaire e reüssiguè lis esprovo d’amessioun à l’escolo de Pouliço de Sèns. Soun nouvèu mestié vai l’enmena à counèisse uno moulounado de persounalita noutamen dins la trepignanto vido parisenco.
Pamens fuguè pièi à l’óucasioun d’un passage à Vaurias pèr retrouba si gènt que d’asard rescountrè l’ussié de justiço de la vilo e d’aqui entre aqui, aquéu ié prepausè uno plaço dins soun estùdi. Tourna-mai, sènso grando esitacioun acetè e quitè la Pouliço pèr faire lis estùdi de Dre necite pèr outeni aquelo cargo d’óuficié ministeriau e s’endeveni l’eminènt Ussié de Justiço de Lunèu.
Es dins la pratico d’aquelo proufessioun, à 25 an, que rescountrè Danièlo, galanto damisello, que restavo à la Salo-souto-Bos, un vilage proche de Vaurias, e aguèron un poulit drole, Cristòu.
Dins tout, pèr miés counèisse sa vido mouvamentado, Gerard Jean nous n’a fa de bèu raconte dins si libre en francés :
“ Mes Radieux Printemps ” en 2005, “D’Ombres et de Lumières ou Les Hasards de la Vie ” en 2012, “ Ouvrez c’est l’huissier ” en 2013 et “ Salles-sous-Bois, le beau pays de la Drôme provençale ”.
Subre-tout Gerard Jean gardè memòri de la lengo prouvençalo de soun païs e de sa famiho en devenènt un militant afouga toujour lèst à participa i manifestacioun pèr sauva aquelo lengo.
Felibre de la proumiero ouro e sòci de l’Escolo dóu Vidourle de Lunèu, endraiè tambèn lou mouvamen Parlaren à sa creacioun pèr n’en deveni pièi en 1991 présidènt emé courage e valènci. Dins sa dicho d’eleicioun à la tèsto dóu mouvamen Parlaren manquè pas de dire soun estacamen à la lengo : “ Tène la lengo dóu brès. Aquéu tresor m’es esta lega pèr ma grand dins lou poulit vilajoun de Sant-Paulet-de-Caissoun à coustat de Pont-Sant-Esperit. Li gènt tambèn charravon en lengo dins la carriero, es coume acò, de li avèdre ausi, dins ma jouinesso que pode vous parla aro. Siéu vengu au militantisme emé la neissènço de “ Parlaren ” i’a dès an au coungrès de Mountèu siéu intra au Counsèu d’Amenistracioun de Parlaren quouro Bernat Giély es esta nouma Presidènt de noste mouvamen. Ma vido militanto s’es debanado sènso brut jusqu’aro. De touto meno ai agu touto ma jouinesso bressado pèr l’èime de Prouvènço e ai garda mau-grat 30 an passa en ribo dóu Vidourle dins lou Lengadò moun cor e moun esperit bèn prouvençau. Acò chanjara pas pode vous l’assegura.”
Tant lèu elegi, sa toco fuguè toujours de s’adreissa i jouine pèr de-longo assegura lou sauvamen de la lengo prouvençalo. Emai soun mestié d’Ussié de justiço l’aguèsse empacha de beileja trop long-tèms Parlaren, rèsto de soun acioun uno moulounado d’acamp e d’intervencioun proche dis elegit, d’ajudo financiero counsequènto daverado e subre-tout la meso sus pèd dóu proumié councours de la jouino cansoun prouvençalo que se tenguè à Pèiro-Lato. Se gardo tambèn en souveni lou pego-soulet que faguè faire pèr counvida li parènt à parla sa lengo à si drole.
Dins sa vido privado, toujour fervènt catoulique participavo au Roumavage de la Nacioun Gardiano à Lourdo e mancavo pas de n’en faire pièi lou coumte rendu dins Prouvènço d’aro estènt que n’èro resta un di fidèu redatour enjusqu’à ço que la malautié lou mouderèsse dins soun travai d’escrituro, acò pamens sènso abandouna en plen.
Ansin emé soun bon gàubi escriguè forço en lengo nostro, un librihoun “ Pèr la glòri di miéu ” e subre-tout uno moulounado d’article en lengo nostro, dins Prouvènço d’aro emai dins d’àutri publicacioun que d’ùni se retrobon encaro sus internet.
Óublidaren jamai noste ami Gerard Jean, lou brave ome toujour counciliant, l’escrivan prouvençau de trìo e lou valènt ome d’acioun de nosto tempourado.
Bernat Giély
|
