Editouriau dóu mes de setèmbre 2018
Bescomte de la Regioun
Sistèmo prouvençau, azurin, aupin e roudanen
Lou mounde dóu païs
Sabèn que sian mai de cinq milioun d’esta-jan en regioun Prouvènço-Aup-Costo d’Azur, (5 007 977 abitant eisatamen coumtabilisa en 2015). Lou noumbre en aumentacioun avesino li + 0, 4 % chasco annado… e pamens es pas tant bèn que dins li regioun vesino dóu Miejour. Acò vendrié di soubro migratòri, pardine ! Lis emigrat, mai noumbrous, councourron four-çadamen à la crèissènço demougrafico nous dison lis estatician, valènt-à-dire, sènso lou dire, que li nouvèus arribant fan mai de drole que lis abourigène, indigène, autóutone, li natiéu dóu païs, es ma maire m’a fa ! Lou comte es adounc mai bon pèr la Nouvello Aquitàni + 0, 6 % e l’Óucitanìo + 0, 7 %. Tant pis, mai se fau pas faire de marrit sang, li gènt de l’Istitut Naciounau de l’Estatistico e dis Estùdi Ecounoumi, l’INSEE, nous avison adeja que la regioun Prouvènço-Aup-Costo d’Azur coumtara aperaqui 5 165 000 d’estajan en l’an 2030, segound coume dison “ un scena-riò centrau de proujeicioun que perlongo li ten-dènci demougrafico recènto ”, basto farié uno aumentacioun mejano de 12 550 persouno pèr an, mentre que lou ralentissamen demougrafi countuniarié à respèt dis àutri regioun.
Païs di quatre
Dins tóuti aquéli comte de ma grand la borgno avèn un entaiamen qu’es pas uno escrincela-duro de la pauro regioun PACA, entaiado en tres : Prouvènço, Aup, Costo d’Azur, aro vaqui un nouvèu tai, quatre grand territòri vo sistèmo territouriau segound l’apelacioun : prouvençau, azurin, aupin e roudanen. Es lou SRADDET, lou chemat regiounau d’en-meinajamen, de desvouloupamen durable e d’egalita di territòri qu’a prepausa d’analisa aquéli quatre regroupamen d’intercoumunalita que soun, siouplet, un bèu rebat de l’armaduro urbano de la regioun e dis aire d’influènci de sis principàlis agloumeracioun. Ié soun ana coume un ase quand troto, pèr proucedi à la reparticioun armouniouso de la poupulacioun regiounalo. La part dis Aupin fai 6 dóu cènt. Aquéli dis Azurin fai 28 dóu cènt. Li Prouvençau fan la mita emé 52 dóu cènt. E li Roudanen s’arrapon à 15 dóu cènt. Comto que coumtaras, fau reprene menuciou-samen li chifro uno à cha uno : 6 % + 28 % + 52 % + 15 % = 101 %. Aquelo empego ! Nous fan de comte de peireto, sabèn pas coume se dis dins soun lengage ampoula e academi : sabon pas chifra, calcula, denoumbra, coumtabilisa, evalua… de tout biais, soun de bèu tiro-l’aufo que sabon faire de bescomte.
Lou crèis di gènt vièi
Empacho pas d’afierma que la poupulacioun aumentarié tres cop plus vite dins l’espàci aupin que dins l’espàci azurin, ajudado que sarié pèr li migracioun. D’à rebous, lou noumbre d’abitant s’estabili-sarié en ribo de mar coume à Marsiho, Niço e Touloun. De mai lou vieissamen de la poupulacioun vai faire flòri. Pas proun di generacioun dóu babi- boum, lou noumbre d’ome d’age de mai de 65 an, groussirié mai que fourtamen d’aqui l’an 2030. Sabèn pas s’es li retreta parisen que vendran s’ensouleia en Prouvènço… au 1, 37 milioun de seniour ( pèr garda l’apelacioun counsacrado pèr li vièi que volon resta jouine ) se n’en capi-tarié 353 000 suplementàri. La proupourcioun resounablo coume l’acoumo-don ajougnirié li 27 % en 2030. D’aqui un abitant sus sièis aurié mai de 75 an en aquel an. Se ié dis l’age quatren, em’ uno aumentacioun de 44 % e d’aqui entre aqui se fai de comte d’abouticàri pèr li sistèmo prouven-çau, azurin, aupin e roudanen. E vogo la galèro !
Vesioun 2050
Après la passado de 2030, la proujeicioun pèr 2050 chanjo de scenariò em’ un estùdi entira dóu moudèle “ Omhale 2017 ”. Es pas coum-plica la soubro naturalo devendra negativo dins la regioun à l’entour de 2040, soulet lou sistèmo prouvençau, terraire emé la poupulacioun la mai jouino counservara uno soubro naturalo pousitivo enjusqu’en 2050. Li vièi de mai de 65 an despassarien li 30 %. Fadejo ! fadejo ! Noun es pas uno fadarié, n’an fa un libre de comte à l’INSEE.
Marrido lengo
La Regioun vieiis, mai i’a d’àutri chifro clau tou-cant li famiho de mai en mai descoumpausado, li chaumaire mai noumbrous que li travaiaire, lis oustau pas tant grand, lou coumerce, la santa qu’aduson d’emplé. De-segur s’es fa d’enquisto sarrado, mai ço que nous pertoco lou mai, es sènso interés pèr éli, quento lengo parlon e parlaran en 2050 li Prouvençau, Azurin, Aupin e Roudanen ? À dire lou verai : quant sian en Prouvènço-Aup- Costo d’Azur à parla prouvençau… la lengo dóu brès pèr li seniour dèu faire uno bello chifro ?
Valour murtriero
Pèr li jouine, pecaire, lou genoucide lenguisti de l’Educacioun Naciounalo countùnio soun camin, pièi tout lou mounde se ié met pèr dire qu’es plus uno valour atualo de vougué sauva uno lengo regiounalo, coume aqueste estiéu, lou magazine dóu meme noum “ Valeurs actuelles ” dóu 19 de juliet que souto la plumo assassino de soun grand redatour Danis Tillinac repren l’item dins soun article “ Le patriotisme éclatant des Bleus ” : “ L’État ne doit en aucun cas cautionner le moindre penchant au communautarisme, qu’il soit confessionnel, lingusitique, culturel ou ultramarin. Il ne doit pas institutionnaliser l’islam ou la corsité, ni cautionner l’usage du breton, de l’occitan ou du basque.” Vaqui lou Parisen, bouto tout dins la memo banasto… l’islam a pas perdu sa lengo, mai nautre es l’Estat parisen que nous la coupado. Un assassinat premedita que se fai dins l’age e se paracabo enjusqu’au darnié subre-vivènt aro en Prouvènço. Frederi Mistral es plus en ligno de comte… Que fai, sian pas au bout dóu comte, countunia-ren de mena batèsto n’en desplaise à-n-aquéli pourtaire de valour murtriero.
Bernat Giély
Lou semanié, journau tablouïde, “ La Setmana ” publica pèr la soucieta Vistedit despièi 23 an plègo matino. Li paraulo de Frederi Mistral, journalisto, soun encaro d’atualita : “ Ai ! las ! lou sabe e lou sabe que trop, fau que tout finigue, subre-tout lis entrepresso veramen erculenco, coume aquéli revisto e publicacioun perioudico que demandon tant de suen, de travai e d’argènt… I’ai passa dins li nòuv an que dounère à l’Aiòli - e fauguè bèn dire sebo, davans la desproupourcioun dóu resultat e de l’esfors”. Tant soulamen poudié pas counèisse lou darnié proublèmo, li revisto e journau sus l’internet, uno nouvello rataio que rousigon e manjon lou papié…
|
