Editouriau
dóu mes de óutobre 2017
Inaguracioun
Lou Cèntre de doucumentacioun prouvençalo
Jan-Marc Courbet
Ço que tóuti avian souveta, l’an passa, quouro avèn aprés la despartido de noste coulabouradou e ami, Jan-Marc Courbet, vèn de se realisa.
Bono-di la voulounta de la coumuno de Bouleno, lou Cèntre de Doucumentacioun Prouvençalo vai d’aro en lai pourta lou noum de soun valènt foundadou.
Aquéu batisme se faguè carriero dóu Sant Sacramen à l’Oustau de la Cuturo Prouvençalo de Bouleno, lou divèndre 1ié de setèmbre dins l’encastre de la Fèsto Prouvençalo qu’engimbron chasco annado à la debuto dóu mes lis assouciacioun Parlaren à Bouleno e Li Cardelina, festejan demai aquest an soun quarantenc anniversàri.
Counvida pèr Dono Marìo-Glaudo Bompard, Maire de Bouleno, counseié despartamentau, Moussu Glaude Raoux, proumier ajoun delegat à l’Urbanisme e au patrimòni, pèr la famiho de Jan-Marc Courbet, Parlaren à Bouleno e lou Counsèu municipau, un fube de mounde èron aqui en fin d’après-dina pèr aquelo inaguracioun óuficialo.
Li sòci dis assouciacioun culturalo boulenenco e li felibre vengu noumbrous se sarravon dins aquelo carriero davans lou bastimen dóu Cèntre de Doucumentacioun Prouvençalo qu’à soun intrado s’aubouravo lou pupitre planta d’un micrò à l’espero di bèu parlaire, mentre que sus la muraio s’escoundié encaro souto un velo di coulour prouvençalo la placo inaguralo.
La presènci de la maire de Jan-Marc, Regino Courbet rendié que mai esmouvènto aquelo ceremounié que coumencè coume à l’acoustumado pèr l’acuei de bèn-vengudo e li gramacimen i gènt presènt au noum dóu Municipe.
Es pièi Silvìo Courbet, la gènto mouié de Jan-Marc e Madamo lou Maire, qu’anèron tira la courdello pèr desvela lou panèu, au son di galoubet e tambourin.
La velarié toumbè e l’escripcioun apareiguè. Entre li blasoun de Prouvènço e de la vilo de Bouleno se poudié legi : “ Centre de Documentation Provençale Jean-Marc Courbet, Majoral du Félibrige. 1947-2016. Crea pèr aquest afouga de la lengo e de la culturo prouvençalo ”.
L’emoucioun fuguè que mai pougnènto de vèire la maire afetuouso de Jan-Marc, Regino Courbet, assista à-n-aquel ounour fach à soun fiéu.
Après lis aplaudimen calourous, li persounalita e coulègo de Jan-Marc fuguèron counvida pèr n’en faire la lausenjo.
Anìo Vadon, presidènto de Parlaren à Bouleno ramentè lou bèl enavanc de Jan-Marc Courbet, foundadou d’aquelo assouciacioun loucalo.
Bernat Deschamp, presidènt de Parlaren-Vau-Cluso reprenguè l’eloge emé l’acioun acoumplido pèr Jan-Marc à tóuti li nivèu. Lou capoulié dóu Felibrige, Jaque Mouttet enaussè que mai li gràndi valour felibrenco de Jan-Marc Courbet.
Lou majourau Alan Costantini, souto-sendi de la Mantenènço de Prouvènço e cabiscòu dóu Flourege, evouquè la freirejacioun de Jan-Marc emé li Catalan dins un viage marcant que n’en faguè un bèu raconte dins soun libre “ Prouvènço e Catalougno ”.
E Bernat Giély, lou baile de Prouvènço d’aro, parlè, éu, de soun ami de longo dato que vaqui li mot de si darnié souveni :
“ Óubliden la grando peno que fuguè la nostro, l’an passa, emé la despartido de Jan-Marc.
Vuei, es un bèl oumenage que i’es rendu, emé lou Cèntre de Doucumentacioun Prouvençalo, aquéu mounumen de referènci pèr tóuti li Prouvençau passiouna pèr la lengo, que vai prene lou noum de soun foundadou, Jan-Marc Courbet, majourau dóu Felibrige, Grand prèmi literàri de Prouvènço… Ounoura lou fuguè à bon sèn, mai desanant l’obro que coumpliguè restara sèmpre estacado à soun noum, valènt-à-dire que la rènd imperissablo.
Après 40 an de travai e de coumbat, de-coutrìo em’éu, pèr sauva la lengo i’avié dequé dire, e se n’es deja escri de pajo e de pajo, autambèn pèr pas trop tourna dins aquéu passat, ramentarai soulamen tres de nòsti darnié rescontre, encaro de fresco dato.
Emai la marrido malautié l’aguèsse aganta, Jan-Marc restavo l’ome d’acioun, lou coumbatènt, l’èro toujour quouro se sian retrouba tóuti dous à Paris à manifesta souto la bandiero dóu Felibrige d’avans lou sèti de l’UNESCO, lou revese plen d’alen e i’anavo emé touto sa verbìo pèr baia d’esplico sus nosto revendicacioun que siegue davans li representant d’aquel ourganisme culturau vo que siegue davans li journalisto pèr soun raport sus l’evenimen. De verai sa voio de militant èro fourmidablo.
Un autre rescontre ounte après un acamp felibren à Maiano, sian ana tauleja tóuti dous dins uno oustalarié de Gravesoun. Aqui èro lou doucumentalisto que tenié sesiho, lou baile dóu Cèntre de Doucumentacioun Prouvençalo avié de-bon uno vertadiero voucacioun pèr faire de recerco, espepidouna li causo e, bèn segur, encaro mai, quand acò toucavo la culturo e la lengo prouvençalo.
Aquéu jour, avian d’escambia prepaus sus lis óutis agricolo, venié de legi lou manuscrit dóu libre que pareiguè l’an passa ounte la païsanarié èro à l’ounour e n’en voulié parla pèr ajusta nòsti couneissènço, adounc vai t’en de carga l’araire sus la jardiniero e pièi de coumta la puissanço di proumié tratour Mac Cormick, erian quàsi toujour dóu meme dire, senoun falié bèn se rèndre à l’evidènci de la realita, de noste viscu desparié, coume pèr li vendémi, éu à Camaret coupavo lou rasin emé lou secatour mentre que iéu, dins lou Nimesen, lou taiave emé la serpeto. Empachè pas que faguerian bono recolto, mai à tres ouro de l’après-dina, la servicialo se languissié de nous vèire parti pèr plega boutigo.
Venguè pièi noste darnié rescontre memourable, à soun oustau, gaire avans la fin, que se sabié à l’artimo, fauto de nouvèu suen poussible, lou courage estraourdinàri que l’abitavo èro digne d’un sant, e countuniavo soun obro, naturalamen, mai, pecaire, l’article que disié escriéure pèr lou numerò de desèmbre dóu journau Prouvènço d’aro restè en plan.
Pode pas acaba sènso evouca uno preciouso ajudo e que fuguè soun grand bonur, mau-grat tóuti si qualita eicepciounalo, Jan-Marc pèr coumpli uno tant bello obro aguè de-longo à soun coustat pèr lou sousteni dins tóuti sis esprovo uno gènto mouié, Silvìo. À l’ounour que se fai vuei à Jan-Marc poudèn pas manca de l’assoucia. Gramaci de tout cor, Silvìo ”.
Madamo Bompard, Mairo de Bouleno, rapelè tambèn li gràndi qualita dóu baile dóu Cèntre de Doucumentacioun Prouvençalo, counvidant pièi Silvìo à prene la paraulo, ço que faguè pèr espremi sa gratitudo en tóuti pèr aquéu bèl oumenage à Jan-Marc.
Èro de bon vèire qu’en mai dis ouratour, lou counsistòri felibren èro bèn representa emé la majouralo Glaudeto Occelli-Sadaillan e li majourau Michèu Benedetto, Valèri Bigault, Gabriéu Brun, Gui Chaptal, Gile Desecot, Glaude Fiorenzano, Reinié Martel, Jan-Bernat Plantevin, Reinié Raybaud, Gui Revest.
À respèt de Jan-Marc Courbet es la la culturo e la la lengo prouvençalo que fuguèron à l’ounour à Bouleno. |
