Editouriau dóu mes de óutobre 2014

2014, e zóu…

La proumesso de renouva lou Museon F. Mistral

Li jour de fèsto anniversàri de la neissènço de Frederi Mistral, lou mes passa à Maiano, faguèron mirando, lou Municipe a baia d’espetacle de trìo pèr ounoura lou pouèto. Li mantenèire fuguèron pivela tant pèr li dicho d’especialisto en counferènci que pèr li discours óuficiau di persounalita

S’óublidara pas la dicho dóu capoulié, Jaque Mouttet, davans lou toumbèu dóu Mèstre, fisançous e ounoura de la grando reüssido di celebracioun dóu cènt-cinquantenàri :

Frederi Mistral es pèr nautre uno referènci permanènto. Es sèmpre sus si piado qu’envisajan e que bastissèn nòsti resounamen. Tout ço que fasèn pièi pèr soun souveni, n’avèn la counvicioun, es proufichous pèr noste endeveni.
Ansin i’a pas de se douna un sentimen de fauto d’uno fidelita que pòu sembla demasiado is iue de quàuquis un . La fidelita à Frederi Mistral es un devé pèr li felibre e sian fièr de lou coumpli.
Aquelo fidelita l’avèn toucado dóu det, tout de-long de l’an, l’avèn viscudo, poudèn dire, dins l’estrambord de la counmemouracioun di cènt an de sa despartido…

Pièi, tambèn, aguè lis àutri persounalita, lou nouvèu Maire, Moussu Jouèl Suppo, que prenguè la paraulo en prouvençau davans l’oustau dóu pouèto, coume lou Counseié regiounau de Prouvènço-Aup-Costo d’Azur, Ervé Guerrera que representavo lou presidènt Michèu Vauzelle, mai se Jan-Nouvè Guerini, presidènt dóu Counsèu Generau di Bouco-dóu-Rose s’espremiguè en francés èro pamens pèr sousteni l’aparamen di lengo regiounalo en Franço e pèr anouncia aqui qu’anavo faire renouva l’oustau-museon de Frederi Mistral em’ un finançamen dóu Counsèu Generau di Bouco-dóu-Rose. Fuguè un estrambord emé de picamen de man de tóuti li countribuable dóu despartamen, countènt de saupre que l’argènt di tausso loucalo que pagon vai servi pèr ounoura Frederi Mistral.
Es pamens un autre chanjamen que se sentiguè en aquesto counmemouresoun.
Uno letro de ravimen nous a fa prusi l’auriho, n’en vaqui l’essenciau :

Pode dire que siéu countènto d’aquelo dimenchado à Maiano ounte s’es vist li retroubaio de tóuti lis assouciacioun majo de defènso de la lengo pèr aquel l’anniversàri mistralen dins la fervour de la bello musico dóu Condor. An festeja coutrìo lou Mèstre. Poudié pas n’èstre autramen quand se saup que i’a de felibre emai de majourau d’en pertout dins aquéli groupamen.
Anan enfin pousqué dire ço que pensan. L’unioun fai la forço. Aro anan pousqué crida fort, sian un pau mai noumbrous. Se i’avié quàuqui felibre de Prouvènço que s’èron pas encaro ralia au nouvèu recampamen, aro van segui soun capoulié dins la recounciliacioun.
Escoundrai pamens pas moun avejaire, aquéli bèu moussu soun li rèi de la fèsto, lis erouïqui defensour di sóudat de la guerro de i’a 100 an,  e li soulenne celebrant d’un Mèstre defunta au siècle passa, osco segur tout acò es bèu, mai soun d’assouciacioun qu’an pèr toco proumiero de sauva la lengo de soun païs, aqui, paure de noun, de qu’an fa aquest an, pas gaire senoun pas rèn, alor vuei que sian tóuti d’ami fau ana à la batèsto contro un gouvèr que se garço di lengo regiounalo.

Uno que i’èro

Gènto dono, que dins la grando tradicioun dis armanacaire afiermas vosto poulido presènci en aquéu lioc en plaço de signaturo, coumprenèn bèn vosto joio de celebra la freirejacioun di Prouvençau dessepara pèr de parpello d’agasso que jacassavon plus sus la memo loungour d’oundo.
Pas besoun d’èstre un fin couneissèire de l’animalun pèr coumprene… Èro pas lou cant di sereno coume lou leissas entèndre… mai l’envasioun sus lou terraire sacra dóu Felibrige di grands aucèu dóu plumage negre qu’an beileja de man de mèstre tóuti li festiveta…
E fasien pecaire oumbrage au Felibrige…
L’escorno se poudié mesura rèn qu’à la dimensioun dis estand de libre… reiau pèr l’un, estrechoun pèr l’autre…
Tant soulamen lis ounour dins aquel encastre d’anniversàri restèron encaro, Diéu-merci, pèr lou capoulié dóu Felibrige.

Quand li militant parlon tóuti la memo lengo, sis assouciacioun déurien trouba la memo voues pèr crida e revendica si dre. Mai pecaire, restara qu’un vot pïous… Coume à Maiano, la vièio a dansa, mai l’unioun s’es pas vertadieramen facho… lou glàri s’es esvali au soulèu.
Pèr lou restant sian bèn d’acord, n’i’a proun de plourineja sus lou passat, i’a encaro forço obro à coumpli, sarié que pèr resta dins la draio de Frederi Mistral… pèr sauva nosto rebello lengo d’oc à l’ouro d’aro.
Interrouga à despart, en desunioun, tóuti lou volon… fièr e libre !
Mai pèr bèure à la Coupo tóutis ensèn… aqui se trobo jamai lou bon vin. Chascun se barricado dins soun plan de vigno.

L’espèr pamens es l’anóuncio que s’es facho de recampa tóuti li persouno mouralo que volon defèndre de la lengo, dins uno sessioun pleniero dóu Forum d’oc, que se tendra lou dissate 11 d’óutobre à La Faro-lis-Óulivié, Cèntre Culturau Jean Bernard, avengudo Aristide Briand-Louis de Broglie, à dos ouro de l’après-dina, pèr adouba e faire adóuta soun un prougramo d’acioun d’enverguro regiounalo.
Lou Forum d’Oc, l’avèn adeja presenta, es un couleitiéu que recampo li representant di persouno mouralo, assouciacioun, couleitiveta loucalo, amenistracioun e entre-presso, qu’an lou souvèt de proumòure la pratico de la lengo d’oc dins tóuti li relarg de la vido publico e de la coumunicacioun.
Pèr prepara lou debat cinq groupe de travai soun ourganisa sus li cinq tèmo que fan la toco dóu Forum :
1. Envirounamen, territòri, poudé loucau : Miquèu Benedetto.
2. Desvouloupamen duradis, entrepresso : Glàudi Holyst.
3. Coumunicacioun e media : Jan-Pèire Belmon.
4. Ensignamen e fourmacioun : Glàudi Juniot.
5. Culturo, creacien, espetacle : Liza, Andriéu Neyton, Jan-Bernat Plantevin.
An en cargo de prepara uno intervencioun dins la sessioun pleniero, en desgajant un proublematico que responde i questioun : ço que voulèn - ço que poudèn - de quente biais i’arriba.
Autramen di, lis óujeitiéu, li mejan, lis estrategìo.
Felipe Langevin, proufessour d’ecounoumìo à l’Universita d’Ais-Marsiho, fara la sintèsi di proupousicioun.

Bernat Giély

contactforumdoc@gmail.com

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com