Editouriau dóu mes d'óutobre

Li noum de liò placarda en lengo nostro

Councours de rapugo foutougrafico

I'a de tèms d'acò, li militant dóu mouvamen Parlaren empegavon sus le panèu de signalisacioun, souto lou noum de la vilo, un pego-soulet "en Prouvènço".
Uno campagno que pourtè frucho estènt que d'ùni vilo d'esperelo se souto-titrèron d'aquéu biais. E encaro à l'ouro d'aro, li vilo e li vilage dóu despartamen de la Droumo an souto soun panèu "en Droumo prouvençalo".
Mai fuguè la segoundo campagno dóu mouvamen Parlaren que tourna-mai capitè, quand demandèron óuficialamen à tóuti li coumuno prouvençalo d'empega lou noum de sa vilo en lengo nostro sus un segound panèu óuficiau à l'intrado coume à la sourtido dóu liò.
Li nouvèu panèu faguèron flòri, e tóuti lis aparaire prenguèron la relèvo pèr demanda à soun Maire la prouvençalisacioun dóu noum de sa vilo.
Chasco annnado de nouvèu panèu aparèisson. Malurousamen n'i'a que desparèisson.

La lengo publico

Pèr faire lou poun, lou mai eisat poussible, lou journau Prouvènço Aro ourganiso un councours de fotò pourtant sus lis iscripcioun publico en lengo nostro, ço que devrié permetre, noutamen, lou recensamen de tóuti aquéli panèu de signalisacioun esparpaia dins tout lou païs.
Adounc, sufis quand vesès quicon de placarda en prouvençau, de lou foutougrafia e de nous lou manda.
Bèn-segur, fau que lou tèste pinta en lengo nostro fuguèsse sus un suport soulide, istala en permanènci, à bèus uei vesènt dóu public.

Troubant aqui :

- la toupounimìo prouvençalo emé li panèu de signalisacioun
- li placo counmemourativo d'un persounage vo d'un evenimen
- lis ensigno de boutigo vo de publicita coumercialo.
Ç o que pòu prouva que la lengo es toujour dins la vido vidanto.
Pas besoun d'èstre un grand proufessiounau pèr foutougrafia uno pancarto vo un panèu. Es pas tant la qualita que lou noumbre que comto.
La toco es de recampa lou mai poussible de fotò que temóuinon pèr nosto lengo.

Li joio

Ansin soun aquéli qu'auran manda lou mai grand noumbre de fotò óuriginalo avans lou 30 d'abriéu 2011 que gagnaran li joio.
Proumié prèmi : 7 libre dis Edicioun Prouvènço d'aro.
Segound prèmi : 5 libre dis Edicioun Prouvènço d'aro.
Tresen prèmi : 3 libre dis Edicioun Prouvènço d'aro.
Quatren prèmi : 2 libre dis Edicioun Prouvènço d'aro.
Tóuti li participant auran dre pèr gramaci un abounamen au mesadié "Prouvènço aro" pèr l'annado óufert à-n-un ami vo parènt qu’es pas deja abouna.

Lou biais de faire

Coume se vai passa ?
Sufis de manda vòsti fotò, d'un cop vo à flour e à mesuro de vòsti presso de visto.
Se coumtabilisara li fotò de chasque participant.
Mai mèfi, li double saran pas pres en comte, valènt-à-dire que la fotò d'uno vilo sara coumtado rèn que pèr lou proumié que l'a mandado.
Adounc l'ordre d'arrivado es impourtant.
Fin d'evita lou mandadis de doubloun publicaren tóuti li mes la tiero di vilo que n'avèn adeja lou panèu en fotò dins l'encastre dóu councours.
Ansin faudra n'en cerca d'autre.
Li fotò numerico dèvon èstre mandado à l'adrèisso mèl:
lou.journau@prouvenco-aro.com
Li fotò papié saran adreissado au sèti dóu journau.
Saran pas restituïdo, mai counservado pèr uno espousicioun dins l'annado 2011, e belèu uno publicacioun pèr moustra lou judice d'aquelo acioun (Lou noum di participant sara pas óublida).

Pèr mai d'entre-signe vo pèr manda de fotò sus suport papié :
Prouvènço d'aro - Tricìo Dupuy, 18 carriero de Beyrouth - Mazargo -13009 Marsiho
Tel : 06.83.48.32.67 – lou.journau@prouvenco-aro.com