Editouriau dóu mes d'óutobre Viro que viraras, tres fai pas quatre
	Marco-mau se proumeno dins l’Educacioun naciounalo… Es pas que noun lou sachias, li proufessour que volon ensigna nosto lengo dins lis escolo an besoun de passa uno meno d’eisamen que se ié dis óuficialamen "CAPES d’occitan-langue d’oc". Que siegue en Prouvènço, en Biarn o en Auvergno es lou meme diplomo que dèvon davera lis ensignaire pèr aprene la lengo de soun païs à sis escoulan.

Acò fai que pèr ensigna noste lengage dins li 32 despartamen dóu miejour de la Franço es necite de fourma mai que mai d’aquéli diplouma.
L’an passa n’en prenguèron 13, à-n-aquéu councours, mai aquest an, emé lou Gouvèr que courrejouno soun boursoun e fai de comte de peireto pèr rapuga de sòu ounte pòu, la chifro retengudo èro de 4, valènt-à-dire uno perdo de 70 % pèr l’ensignamen de nosto lengo.
Tant lèu sachu, fuguè la moubilisation encò nostre: manifestacioun, plourinejado davans lis elegit, peticioun, ect, etc…
La Federacioun pèr l’Ensignamen de la Lengo d’Oc recampè 150 000 signaturo pèr reclama mai de poste au CAPES. Aguè tambèn lou soustèn de 25 deputa, mai de bado, l’encartamen au councours èro de 4, lou Menistre de l’Educacioun Naciounalo brandè pas.

Avian lou malan sus l’esquino, poudian que s’enarca…belèu prene palado !
De bon, anavian en rebusant.
Pamens èro que miejo bastounado, un autre malur nous vèn d’arriba, pèr desfournuto, un di quatre ensignaire reçaupu au concours vèn de demessiouna.
Dins tóuti li councours, la tiero s’ajusto d’esperelo en ié fasènt resquiha lou proumié que n’èro esta foro-bandi. Es ma maire m’a fa ! Eh, bèn, noun, lou cinquen de la listo pòu pas intra demié lis ensignaire, estènt que lou Menistèri de l’Educacioun Naciounalo a pas publica de tiero suplementàri. Un papafard óugligatòri, reglamentàri dins uno amenistracioun bèn pouliçado empacho aro que lou quatren posto de proufessour siegue prouvesi.

La Federacioun pèr l’Ensignamen de la Lengo d’Oc es mai partido en batèsto pèr faire versa la mesuro. Tres poste en liogo de quatre es de 25 % que lou recrutamen es mai taia.
L’Estat francés fai soufri lou martire à nosto lengo, avans que de l’escana !
Sabèn plus en quau s’avouda… mai faudra bèn manisfesta nosto revòuto…

Bernat Giély