Editouriau dóu mes de óutobre 2022

Paraulo d’escàfi

Pèsto e recabus, l’óucitan sarié au trespas de la mort…
e pamens n’avèn encaro l’escrituro

Lou Miejour Libre

De-segur, sabèn plus ounte n’en sian emé l’óucitan, lou prouvençau vo la lengo d’oc, pèr baia un noum à la lengo que parlan.
La desseparacioun es devengudo proun mai marcado emé l’apelacioun de la regioun Óucitanìo de la man d’eila dóu Rose.
L’óucitan aqui a trouba sa plaço.
E la presidènto d’aquelo regioun Óucitanìo, Carolo Delga, demando toujour un envestimen tras que fort en favour dóu soustèn à l’óucitan e au catalan, en counsacrant adeja un buget de quatre milioun d’éurò à-n-acò.

Nous-autre, sian pas dins lou meme terraire, estalouirant uno mai poulido e loungo apelacioun : Regioun Sud, Prouvènço, Aup, Costo d’Azur, PACA, mai la preso en comte de la lengo istourico dóu païs baio pas d’estrambord i baile regiounau pas mai qu’i publicacioun de la prèsso regiounalo.

Aussi sian fourça de passa lou pont de Tarascoun à Bèu-Caire pèr trouba d’enfourmacioun sus noste parla.

Lou grand quoutidian de la regioun Óucitanìo, Midi-Libre, éu, fai plaço à la lengo tóuti li dimenche emé d’ùni rubrico en óucitan de Jan-Louis Blenet, lou presidènt de la Counfederacioun di Calandreta.
Pas proun d’acò, lou mes passa, dissate 24 de setèmbre, counsacrè uno pajo tirado : “ Défense de l’occitan: Midi-Libre s’engage ” emai “  Patrimoine régional. C’est le moment de le soutenir ”.

Pèr pas manca de legi aquelo pajo, èro la uno que fasié l’anóuncio emé lou drapèu rouge e sa crous jaune en fotò souto lou grand titre: “ L’occitan une langue en sursis ? ” emé l’esplico baiado qu’es parlado pèr mens de 600 000 persouno, d’efèt la lengo d’oc èro classado en serious dangié de desparicioun pèr l’Unesco, e se pauso la questioun de dire que d’iniciativo eisiston, mai saupre se saran sufisènto pèr enraia un declin que sèmblo ineisourable.

Pecaire, prenèn pòu en anant legi pajo 27, “ Sans une action forte, la langue occitane est menacée de disparition ”, dins l’article de Yannick Povillon.
Se dis qu’un estùdi de l’Óufice public de la lengo óucitano estimavo à 540 000 persouno lou noumbre de loucutour, siegue aperaqui 7 % de la poupulacioun de Nouvello-Aquitàni e  Óucitanìo.
La Prouvènço es adounc pas dins aquel espàci de la lengo óucitano. Pregan pèr que la chifro siegue pas la memo… de tout biais degun se n’en preóucupo.

Pamens prenèn pòu. Lou tèms passo… dins uno di darniéris enquèsto dóu journau La Croix dóu dimars 21 de janvié 2014 se poudié legi “ Un regain d’intérêt pour l’occitan ” e dins aquel article, pèr lou noumbre de persouno parlant l’óucitan en Franço  sarié esta uno fourcheto anant de quàuqui deseno de milié à plusiour milioun e pèr lou soulet despartamen dis Àuti-Pirenèu l’estimacioun èro de 110 000 loucutour capable de sousteni uno counversacioun en óucitan e d’aperaqui 1,2 milioun qu’avien de noucioun d’óucitan. Mai de counclure: “ Si le dispositif actuel de transmission ne s’améliore pas, on comptera en 2030 moins de 15 000 personnes parlant encore vraiment occitan ”.
Sai-que sarian dins aquelo marrido draio ?

Dins lou Midi-Libre l’elegit regiounau, Benjamin Assié, en cargo di lengo regiounalo en Óucitanìo afourtis que faudrié espera 25 % de loucutour pèr sourti d’aquelo lougico de declin, emai sarié un gros travai mai sèmblo poussible estènt que tóuti lis enquèsto mostron un estacamen massiéu de la poupulacioun, en particulié di nouvèus arribant afouga pèr la lengo dóu païs.

Malurousamen coume lou deplouro Jan-Louis Blenet, i’a soulamen 3 % dis enfant en primàri qu’an un ensignamen. E 1 % au coulège e 0, 2 % au licèu, e d’apoundre que fau faire fàci à l’emperialisme dóu francés sus li lengo regiounalo e à l’emperialisme de l’anglés sus tóuti li lengo.

Benjamin Assié, éu, rapello que tóuti lis estùdi mostron que pedagougicamen, aprene lou francés e l’óucitan vai desvouloupa de gròssi capacita cougnitivo e inteleitualo, pièi que i’aurié d’eisèmple : se poudèn ispira dóu Galés qu’es parvengu, en dos generacioun, à retrouba 200 000 à 300 000 loucutour.

Un autre article d’aquelo pajo dóu journau Midi-Libre parlo de la fac Pau-Valéry de Mount-Pelié pèr ramenta que l’óucitan s’apren de l’escolo meirenalo à l’universita, mai d’apoundre que malurousamen, emé mens de 3 % d’enfant sensibilisa à l’óucitan dins li pichòti seicioun, l’usage de la lengo se perd au fiéu dóu cursus.
Estudia la lengo rèsto toujour un ate militant…

Dins un cantoun, se cito tambèn Francis Cabrel que canto óucitan e adeja en 2020 denounciavo lou jacoubinisme francés en disènt en parlant de soun disque “À l’aube” que lou francés a tout escracha… “ Il faut qu’on retrouve nos caractères profonds, chaque région a ses coutumes, sa langue, sa cuisine, ses paysages, il faut appuyer là-dessus. Ce disque, je l’ai fait pour ça. Partout, c’est l’occitan autour de moi, des gens se battent pour la langue occitane et je suis à leur côté ”.

Segur anan pas perdre espèr, nautre en plen jour voulèn garda toujour la lengo dóu Miejour.

Lou Coungrès di Regioun

Dins l’atualita d’aquéu mes de setèmbre i’avié tambèn lou 18en coungrès di Regioun de Franço que se tenié à Vichi souto la presidènci de Carolo Delga emé la proumiero menistro Eisabèu Borne que venié nousa un “dialogue coustant pèr uno nouvello èro de descentralisacioun.
Lou tèms fort fuguè la tematico d’uno taulo roundo “ Soubeiraneta : Li regioun en proumiero ligno ”, lis enjò n’en sarien la soubeiraneta endustrialo, alimentàri, energetico e sanitàri.
La proumiero menistro Eisabèu Borne vòu bèn un dialogue que s’apielara autour de quatre poun : la councertacioun, la coustrucioun d’un prougramo de travai parteja, la diferenciacioun pèr fin de teni comte dis especificita de chasque territòri, pièi lou plen emplé e li trasport sarien dous doursié priouritàri de trata en councertacioun emé li regioun, ansin countuniara d’èstre presènto pèr acoumpagna li couleitiveta en dificulta.
Aqui Carolo Delga deplouravo que li Regioun, vuei, aguèsson 800 milioun d’éurò annuau de manco à gagna e que, pièi, pòu pas èstre poussible de countunia de demanda mai à-n-aquéli en quau s’es douna mens.
Lou presidènt de la Regioun Auvergno-Rose-Aup, Laurènt Wauquiez, éu, regretavo que siegue aquéu qu’a crema la caisso que demandèsse à-n-aquéu qu’a bèn geri de faire d’esperfort.
Es acò lou dialogue coustant…
Basto, tre lou mes de nouvèmbre li prefèt de regioun van manda de travai pèr defini uno prougramacioun emé li regioun.
En demai, lou 5 d’óutobre un groupe de travai sus la descentralisacioun se vai crea au Senat coume l’anounciè soun presidènt Gerard Larcher pèr respondre au besoun d’equilibre entre lou poudé centrau e li couleitiveta loucalo. D’aqui entre aqui lou Senat sara un pilié de la descentralisacioun e vai faire un aprefoundimen de la diferenciacioun territourialo.
Vaqui, di lengo regiounalo se n’es pas entendu parla !

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com