Editouriau dóu mes de nouvèmbre 2023

Liberta

L’autounoumìo de la Corso
cerco sa plaço dins la Coustitucioun…

Lou presidènt de la Republico, Enmanuèl Macron, lou mes passsa, èro dins la grand mar, mai s’es gaire bagna, gardant bèn li pèd au sòu  dins l’isclo corso pèr leva li baragno de sa draio : “ I’a pas de ligno roujo. I’a l’ideau de la Republico e la voulounta de chascun de se despassa dins aquéu camin coumun ”.

Èro vengu anouncia à la tribuno de l’Assemblado de Corso : “un chanjamen prefound dins li relacioun entre l’Estat e la Corso ”.
Segur n’a fa de camin despièi sa vengudo i’a cinq an en Ajacio quand refusavo li revendicacioun di naciounalisto corse. Vuei a mes d’aigo à soun vin, pèr brama, tout d’uno, soun viro-saut, un bèu viro-reviro de sa poulitico : “ Pèr respondre i besoun de recouneissènço e evita de nouvèlli counfrountacioun, anen en delai di toutèm pèr lis un, di tabou pèr lis autre. Au founs, aguen l’audàci de basti uno autounoumìo à la Corso, dins la Republico ”.
Sai-que, lou grand segnour de l’Estat centralisaire parisen se liberarié tant facilamen d’un tros de territòri souto sa gouvernanço assouludo ?

Aganta l’autounoumìo vòu dire gouverna soun païs emé si pròpri lèi. Lou mot nous vèn dóu grè : “ autos ”, se-meme, d’esperéu, e “ nomos ”, règlo.
Mai, à l’ouro d’aro, d’ùni dison tambèn uno l’autougouvernanço.

Mèfi pamens, s’agis pas de l’independènci!
En poulitico l’autounoumìo es la poussibleta pèr un terraire de s’amenistra, mai dins l’encastre predefini d’uno entita mai largo, regido pèr un poudé centrau, valènt-à-dire qu’aquéu dre es limita pèr la tutello amenistrativo e coustituciounalo dóu poudé centrau.
Enmanuèl Macron a pas manca de lou precisa, es pas la liberacioun di cadeno de l’Estat francés, se poudra soulamen baia “ uno autounoumìo à la Corso, dins la Republico ”.
Finocho, acò sous-entènd que se baiara de poudé un pau mai larg, rèn que dins li doumaine que voudra lou Gouvèr coume la culturo, l’educacioun o lou desvouloupamen ecounoumique, mai, de-segur, lis autounoumisto auran pas dre i doumaine de la defènso, dis afaire estrangié o de la mounedo.

Basto ! Es un moumen istourique, pèr lou proumié cop, un presidènt de la Republico en eisercice vòu baia l’autonoumìo à la Corso.

Tant soulamen pèr acò, fau, aro, moudifica la Coustitucioun franceso pèr counsacra un article “ propre ” à-n-aquelo “ coumunauta insulàri, istourico, lenguistico e culturalo ” qu’es la Corso, mai fau d’abord s’entèndre sus dous tèste que vai prepausa lou Gouvèr is elegit corse pèr counfierma aquelo autounoumìo, e pèr pas perdre de tèms, Enmanuèl Marcon a baia sièis mes pèr se decida.
Après s’ourganisara uno counsultacioun di Corse e subre-tout faudra que lou proujèt retendu siegue adóuta pèr lou Parlamen em’ uno majourita di tres pèr cinq.
Li veiren veni…

De tout biais, li Corse an deja de se teisa emé sa lengo, l’autounoumìo la poudran pas envala, lou presidènt Macron tiro la lengo… Refuso la couóuficialeta de la lengo corso emé lou francés, se poudra pas charra en corse dins lis assemblado e amenistracioun republicano.

Toujour abile coumunicant, lou Mèstre troubè l’entourloupeto pèr apasima li causo, e proumeteguè la creacioun d’un “ service publi de l’ensignamen ” favourable au bilenguisme pèr un meiour ensignamen de la lengo corso.

Sacrebiéu, qu’acò es bèu ! Uno grando isclo de 340 000 estajan que pas soulamen la mita parlon la lengo e te van basti un service public à bèl esprèssi pèr aprene lou corse, mai, vergougno di vergougno, lis àutri lengo regiounalo de Franço i’an pas dre. L’Alsaço, la Bretagno, lou Païs Basque, l’Óucitanìo o la Prouvènço an que de se teisa !
Bèn segur, acò toumbè pas en paio.
“ Voulèn la memo causo ” pèr la Bretagno que diguè, tant lèu, lou presidènt de la regioun, Loïg Chesnais-Girard.

Pièi, parié pèr l’autounoumìo tant bèn meso en sceno e clerounado pèr lou presidènt Macron, la poudèn demanda, aro, pèr Prouvènço, lou Coumtat Venessin, la principauta d’Aurenjo e lou coumtat de Niço.

Vai se pòu toujour pantaia, mai la partido es pas gagnado. La moudificacioun de la Coustitucioun republicano, Moussu Macron nous l’a deja jougado pèr la ratificacioun de la Charto éuroupenco di lengo regiounalo, la Coustitucioun èro lou bàrri emé soun article 2 lou francés souleto lengo de la Republico que se poudié pas touca.

Aro se capito à faire adóuta la moudificacioun que prepauso, e saupre s’aura l’audàci, coume dis, de limita acò à l’autounoumìo de la Corso e de la Nouvello Caledounìo qu’èro deja à l’espèro.
Lis àutri, ducat, coumtat, papauta, principauta, regioun, prouvinço, metroupòli, coumunauta d’à passa tèms vo dóu tèms presènt, van pièi, à-de-rèng, demanda soun autounoumìo au noum de l’egalita coustituciounalo…

Es ço qu’an pòu li partisan de l’unita naciounalo, que veson adeja li coumunauta eissido de l’emigracioun faire parié, demanda soun autounoumìo.
Alor trouba la majourita à l’Assemblado Naciounalo e subre-tout au Senat sara la buteto.

Pèr nous-autre, coume disié Frederi Mistral à Pèire Devouluy lou 10 de mai 1902 : “ L’autounoumìo es la lèi naturalo de noste Miejour…” Pamens d’aquelo autounoumìo se n’èro mesfisa, quouro avié tourna-mai avisa Pèire Devoluy, lou 6 d’abriéu 1901 :
“ I’a pamens uno causo ounte devèn ana plan : es lis autounoumìo municipalo. Quand vesès de tiran veritable, coume li de l’Antiqueta, destruire li mounumen d’Avignoun o la fourtuno de Marsiho, etc.”
Pèire Devoluy, éu, ié demandara, lou 12 de jun 1907, soun avis sus aquéu sujèt d’autounoumìo dins lou Miejour :
“ De-que disès d’aquéu Ferroul que parlo tranquilamen dins sa barbasso d’ourganisa l’autounoumìo dóu païs ? - De remarca que li regioun naturalo se recoustituïsson d’esperéli : Pirenèu-óurientau + Audo + Erau + Gard = l’antico Setimàni que fuguè l’un dis ensèmble pouliti li mai duradis bessai ”.
D’autounoumìo n’i’aguè pas dins lou païs, mai Valèri Bernard, gardavo espèr, e lou faguè dire à soun Jouglar felibre :
“— Autounoumisto sian, federalisto sian, e se, en quauco part de la Franço dóu Nord un pople vòu veni emé nous-autre, ié pourgiren la man ”.

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com