Editouriau
dóu mes de nouvèmbre 2017
Independènci
Amaliciado, Espetourido, en Catalougno
La Catalougno tèn toujour la rego pèr orto, pèr draio e pèr camin.
D’aquelo independènci Frederi Mistral e soun coulègo Balaguer n’avien pantaia… Se lou raive pòu deveni realita en païs catalan, en Prouvènço, pecaire, es un pantai perdu… La Prouvènço es estado forço bèn chaplado… N’an fa, aro, qu’un tros de la regioun PACA, e se pòu plus dire qu’es un pople em’ uno lengo, sarié incoustituciounau à respèt de l’article 2 : lou francés óubligatòri…
Pèr acò, l’independènci de la Catalougno sarié lou sauvamen definitiéu de la lengo catalano, aquelo lengo que nous es tant procho qu’avèn pas besoun d’interprète pèr la coumprene.
D’efèt, fuguè un tèms que demié li Mantenènço dóu Felibrige figuravo la Mantenènço de Catalougno, e quand soun sendi prenié la paraulo, s’escoutavo sa dicho sènso mai de peno qu’aquelo dóu sendi dóu Biarn.
Pas proun d’acò, dins l’atualo prouvinço autounomo de Catalougno se ié trobo la Vau d’Aran, e aqui se ié parlo de-bon nosto lengo, la lengo d’oc, recouneigudo lengo óuficialo pèr la Catalougno. Soun drapèu es aquéu de Toulouso emé la crous óucitano. E aro se capito que lis Aranés aurien bèn vougu, éli tambèn, eiserça soun dre à l’autounoumìo mentre que la Catalougno aguèsse decida unilateralamen lou vote pèr l’independènci.
De-segur, degun ié demando de chausi entre Barcelouno e Madrid, mai de tout biais la Vau d’Aran sara pas jamai coume à passa tèms uno coumunauta autounomo.
E pamens aurian agu lou soul païs aparaire óuficiau de la lengo de Frederi Mistral.
Fau pas pantaia, e pesa si resoun, uno coumunauta de 11 000 abitant fai gaire de pes au nivèu internaciounau.
Adounc restan aqui à bada l’aveni de Catalougno… Que lou gouvèr espagnòu siegue contro l’independènci, acò es pas estounant, risco de perdre lou terraire ecounoumicamen lou mai riche de soun reiaume, mai que la Franço vengue metre sa peio dins aquelo bugado, acò passo l’osco ! De la dóutrino sacrado di Dre de l’ome e dóu dre di pople à dispausa d’éli meme, soun nouvèu presidènt, se n’en garçarié ? Noun, se lou grand mounarque republican vòu pas de l’independènci de la Catalougno, es soulamen qu’a uno bello peto, o pulèu se baio pòu quand dis : “ Cela peut aussi arriver en France ”.
Sai-que ?
Basto, aquest mes n’en sian resta i paraulo de Carle Puigdemont : “ Ço que lou pople catalan a decida dins lis urno, lou gouvèr espagnòu dins si burèu l’anulo. Emé lou soustèn dóu Partit soucialisto e aquéu de Podemos, a perpetra contro lou pople catalan la piro ataco despièi Francò ”.
Aqui i’a pas de dire quicon mai.
Bernat Giély
Veici, pamens, uno declaracioun sus Catalougno pèr lis escrivan d’Oc, que volon moustra que, fuguèsson pèr vo contro l’independènci catalano, soun à coustat de si sorre e fraire catalan à l’ouro que tóuti li media lis esclapon souto uno reproubacioun generalo...
— Lis escrivan de lengo d’Oc representa pèr lou Cèntre PEN occitan ( PEN club de Lengo d’Oc ), seissioun de l’assouciacioun moundialo dis escrivan engaja pèr la liberta e la diversita di culturo PEN International, seguisson em’ uno atencioun majo lis evenimen atuau en Catalougno.
La reneissènço culturalo catalano dóu siècle XIXen e la respelido literàri di païs d’Oc adraiado pèr Frederi Mistral se soun debanado au meme tèms mai soun proujèt istouric e soun astrado soun esta forço diferènt. Lis catalanisto an souvènt reproucha is óucitanisto de se limita à-n-un proujèt rèn que culturau : vesien acò coume uno chimèro, davans la lougico de destrucioun e d’esfaçamen ativamen meso en obro en Franço contro lis culturo dicho regiounalo. I’a dins lou proujèt catalanisto uno coumpausanto forto naciounalitàri e poulitico, mentre en Óucitanìo aquelo d’aqui es pas gaire representado. Lis óucitanisto dins sa majo part defèndon uno culturo coumuno à l’ensèn di païs d’Oc e caraterisado pèr uno diversita interno forto, e pènson qu’acò ’s uno astrado óuriginalo e fegoundo d’uno culturo qu’es pas soustengudo pèr un estat centralisa.
Catalougno a pati au siècle XX de mai d’un episòdi long d’óupressioun toutalitàri pessugasso, mai a couneigu uno periodo d’independènci efetivo entre 1931 e 1939. Sa culturo à-n-aquéu moumen s’espeliguè em’ un vanc espetaclous. Mai aquelo periodo s’acabè dins lou sang emé la recounquisto militàri de Barcelouno pèr li troupo franquisto. La Franço d’aquéu tèms estradè pièi lou presidènt catalan Lluís Companys que fuguè fusiha à Barcelouno lou 15 d’óutobre de 1940. Lluís Companys avié prouclama la creacioun d’un Estat catalan independènt lou 6 d’abriéu de 1934.
En Franço, li causo virèron d’un biais forço diferènt. L’esfaçamen de la lengo d’Oc s’afourtiguè mai que mai tout de long dóu siècle XXen. Aquesto culturo demouravo mespresado dis elèi inteleituau que la counsideravon coume insignificanto vo meme ineisistènto, mau-grat l’engèni creatour de noumbrous escrivan de trìo. I’aguè ges d’óupressioun vióulento mai un esfaçamen souto lou pes d’un mesprés gigantas.
Mau-grat aquéli diferènci, uno fraternita imbrandablo recampo catalan e óucitan despièi mai de milo an.
À l’Age Mejan nòsti dos culturo fasien rèn qu’uno. Aquesto fraternita s’es renfourtido despièi un siècle e mié, que s’en vèi lou temouniage dins lou cant de la Coupo Santo ( 1867 ) compausa pèr Frederi Mistral en memòri de l’aculido pèr lis escrivan d’Oc d’un pouèto prougressisto, Victor Balaguer, eisila d’Espagno pèr escapa à-n-un regime despouti.
Lis óucitan counsciènt óublidaran jamai li liame encaro mai fort que li liguèron i Catalan d’Espagno tout de-long dóu siècle XXen. Lou grand pouèto d’Oc e capoulié dóu Felibrige Valèri Bernard, entre-mitan forço d’àutri, coumpausè un elògi espetaclous de Francesc Macià, l’ome que tournè baia à la Catalougno en 1931 sa dignita e sa liberta. Souto soun gouvèr e aquéu de son sucessour Lluís Companys, la culturo d’Oc beneficiè d’un soustèn que s’endevenguè decisiéu pèr ié tourna baia un alen de vitalita que la butè fin qu’à vuei.
Acò ’s à Barcelouno que se publicavo alor la revisto Oc e que pareiguèron, en mai de la Gramatica Occitana ( 1936 ), uno tiero de gràndis obro en lengo d’Oc. E coume óublidarien, lis óucitan, que despièi 2006, la lengo d’Oc es lengo óuficialo dins touto la Catalougno, en seguido dóu nouvel Estatut dóu 9 d’aoust de 2006, mentre que soun eisistènci es de mai en mai precàri sus lou territòri francés ?
Lis óucitan volon dounc dire soun afecioun pleno de gratitudo à si sorre e si fraire Catalan que vivon d’ouro mau-eisido, perihouso, e belèu decisivo.
Coume nous lou redisien souvènt forço de catalanisto engaja, mai que mai dins lou countèste dóu PEN Internaciounau e de sa coumessioun di Dre Linguisti, la culturo catalano en Espagno, mau-grat l’Estatut d’Autonoumìo, se trobo menaçado de mai en mai pèr un renfourtimen dóu centralisme espagnòu e uno castihanisacioun counquistairis despièi 2010, e es acò que butè un noumbre de mai en mai grand de catalanisto a envisaja de counquista l’independènci. Acò menè de fiéu en courduro is evenimen de setèmbre-óutobre de 2017.
Lis escrivan dóu PEN óucitan soun counsciènt que forço de Catalan e de noun Catalan que demoron sus lou territòri de la Generalitat de Catalunya se fan bravamen de soucit à prepaus d’aquelo evoulucioun e demoron partidàri de l’unita de l’Estat Nacioun Espagnòu. L’evolucioun istituciounalo de la Catalougno pòu, de-segur, se faire rèn que dins un countèste demoucratique, em’ un respèt toutau pèr tóuti sis abitant.
Mai sabon tambèn, estènt qu’an de liame d’amista ancian e duradis emé li catalanisto, que lou proujèt audaciousamen pourta pèr lou presidènt Carles Puigdemont es pas uno farfantello baujo, mai es argumenta soulidamen pèr de resoun souciò-istourico.
Adounc s’escalustron bravamen de mai d’un elemen de la criso d’aro.
D’en proumié la vióulènci de la repressioun pouliciero espagnolo, que li media de touto la planeto n’an fa vèire de pertout lis image. Pièi, pèr la pensado unico que tóuti li media francés, à la seguido de la prèisso espagnolo, an deslargado, en dounant jamai la paraulo i catalanisto e en espandissènt un discours uniforme de reproubacioun contro soun proujèt presenta unanimamen coume un foulige noun acetable e perihous. E tambèn pèr lou soustèn inmediat e sènso ges de retengudo que lou presidènt francès Emmanuel Macron ( que n’avian saluda la duberturo inesperado en favour di lengo dicho regiounalo ) baiè au proumié ministre espagnòu Mariano Rajoy.
Tout acò fai mostro, à noste avejaire, d’uno parcialita que noun se pòu aceta. Se pòu èstre d’acòrdi vo pas d’acòrdi emé lou proujèt di naciounalisto catalan, mai se pòu pas aceta dins un countèste demoucrati que sa voues noun siegue esprimado e que s’ausiguèsse soulamen la reproubacion de soun acioun.
Es de remarca que li Catalan, coume n’an l’usanço, an avança sa revendicacioun en uno absènci toutalo de vióulènci. S’ameriton, que l’on siegue d’acòrdi vo noun emé lou proujèt naciounalisto, lou respèt. Tant coume tóuti lis àutri culturo minourisado de la planeto.
Jan-Frederi Brun
|
