Editouriau dóu mes de nouvèmbre Lou Grand Prèmi Literàri de Prouvènço Lou Grand Prèmi Literàri de Prouvènço es esta baia, aquest an, à-n-un flame pouèto prouvençau Sergi Arneodo. Provo un cop de mai que la Prouvènço a pas de raro estatico.

De la man d’eila di cimo dis Aup, parlan lou meme lengage. La jurado dóu Grand Prèmi Literàri de Prouvènço lou saup e l’a vougu moustra en guierdounan lou pouèto di valèio piemounteso d’Itàli.
Fau dire tambèn que la jurado s’es alargado. Souto la presidènci de Jan Chelini e la presidènci d’ounour de Jaquelino de Romilly, li mèmbre ancian Marcello Chirac, Bernat Giély, Glaude Mauron, Jan-Pèire Tennevin e Susano Thiolier-Mejan, an aculi, Gabrié Chakra, Miquéu Courty, Pèire Fabre, Alan Barthélémy-Vigouroux, Marìo Rouanet e Jan Glaude Bouvier. Es de bèu vèire que lis aparaire de nosto lengo soun li mai noumbrous. Ço que baio d’autant mai de valour au judice de la chausido dóu laureat que vèn de davera lou prèmi en lengo nostro, Sergi Arneodo.

Sèrgi Arneodo

Sergiò Arneodo es nascu en 1927 à Santo Lucìo de Comboscuro, coumuno de Cunéo. Insignara la lengo à l’escolo elemèntàri pièi la literaturo à l’escolo superiouro, vira d’istint vers la pouësìo e li conte, descurbis dins la mountagno, lis Aup sud-oucidentalo, un mounde inesploura, qu’adero à sa sensibleta.
Tre 1952 publico emé Gastaldi (Milano) "Vento di montagne", raconte entre verita e surealisme.
En 1955, vai crea "Comboscuro" groupe espontaniéu d’avant-gàrdi pèr l’identificacioun de la civilisacioun aupino d’enfuènci prouvençalo que parlara de la minourita prouvençalo en Itàli.
En 1961 sara lou foundatour de "L’Escolo dóu Po", assouciacioun de culturo prouvençalo aupenco.
En 1976 prèn la cargo de respounsable dóu "Movimento Coumboscro di Autonomia e Civiltà Prouvenzale" vuei "Coumboscuro Centre Provenzale" que primo l’acioun culturalo prouvençalo. A encaro publica : "Valquiàso" dramo prouvençau, Lovanio, Belgio, 1967 : "Col Belière" dramo prouvençau, Coumboscuro, 1970 ; "I provenzali della montagna", Cuneo, 1978 ; "Le valli provenzali, libera terra dell’uome d’o", Coumboscuro, 1980.
En 1997 "Danço di sesòun" óutenguè lou "Grand Pres di Jo Flourau" la mai grando recouneissènço literàri de la Prouvènço Franceso.
Aquel "Rousari de Passioun" es la nouvello recordo de pouësìo de Sergio Arneodo.

La pouësìo de Sergi Arneodo es la voues d’un païs, l’alen de l’ispiracioun que gisclo dins li valèio aupenco aparado dóu mounde e apararello d’uno civilisacioun.
Sa sensibleta es un èime prouvençau que boumbis e ressono sus li roco pèr cascareleja, pièi, emé l’aigo di gaudro. Touto la puissanço de la pouësìo es aqui que s’escoulo pèr espandi tóuti li pensamen, tóuti li simbèu d’un vesiounàri !
Mai sa messioun, Sergi Arneodo, la perd pas jamai : sauva la lengo.
Darrié lou pouèto i’a lou patriarco, l’ome de la respelido dóu parla prouvençau dins li valèio dóu Piemount. Lou bastissèire dóu Cèntre Prouvençau de Coumboscuro, l’ome d’acioun eisemplàri que sachè baia à sis enfant l’amour de sa lengo e de soun païs pèr l’ajuda à manteni la tradicioun.
E aro la culturo à Coumboscuro fai flòri.
Glaude Mauron, proufessour de trìo, espeluquè, éu, li qualita de soun obro e la presentè pèr lou menut à Ventabren avans que de remetre lou prèmi au valènt prouvençau.
Aqui, Sergi Arneodo en gramaciant la jurado, manquè pas de ramenta lou liame qu’unis li prouvençau di dos man dis Aup en pourgissent un bos escrincela en formo de gau à dos tèsto, bèu simbole d’uno Prouvènço unido.
Lou prèmi en francés anè, éu, à-n-un que rèsto e travaio à Marsiho, Jan-Cristòu Duchon-Doris pèr lou voulume tresen d’uno trilougìo que se debano en 1702 à Marsiho, pourtant pèr titre «Les Galères de l’Orfèvre», un bèu rouman, que d’ùni dison poulicié, mai un raconte sabourous e bèn doucumenta.

Jan-Cristòu Duchon-Doris

Jan-Cristòu Duchon-Doris es deja un escrivan counsacra, publiquè d’en proumié dos nouvello, "Les Ours Polaires" en 1991, "Les lettres du baron" en 1994.
"L’autre Singe" fuguè soun proumié rouman en 1997. Seguiguèron "Les nuits blanches du Chat botté" en 2000, "L’ordure et le soleil" en 2001.
Tourna-mai de nouvello en 2002, "Portraits des dames d’Egypte".
E mai de rouman "L’Embouchure du Mississipy" en 2003 segui dóu libre d’aro "Les Galères de l’Orfèvre" en 2004.
Coume l’a di, lou proufessour Jan Chelini, passiouna pèr l’obro de l’autour, la jurado esperavo qu’un de si rouman se debanèsse en Prouvènço pèr lou guierdouna, es causo facho.

Bernat Giély