Editouriau
dóu mes de mars 2015
Eleicioun regiounalo…
En Prouvèneço, cresèn d'èstredins la coucagno
Biais de vèire
Es pas bello la vido, d’un cap de Prouvènço à l’autre, coume dins un fuietoun de televisioun, o! segur, que sian forço countènt d’aprene que tout vai bèn encò nostre, lou mounde es bèu pèr lis aparaire de la lengo prouvençalo :
- lis escolo se clafisson de jouine que volon aprene à parla prouvençau, lou courounamen annuau di prèmi de Ventabren n’es la bello provo,
- li counferencié-counmemouraire fan flòri, dins de salo emplido de bèu mounde que soun aqui tanca à li bada,
- li musician e cantaire baion de voues enjusquo dins li salo de la capitalo, l’Oulimpia es pas sourd,
- lis escrivan e pouèto prouvençau pouëtejon e fan mirando, coumble de perfecioun dins sa rimo,
- la televisioun, sènso parpeleja, la vaqui souto-titrado pèr lou bonur di felibre que se fan dins l’age, sourd coume de toupin, coume lou sian,
- li cadeno de radio en lengo nostro inoundon lis oundo de cansoun troubadouresco que piéulon à meraviho dins lis auriho dis ausidou prouvençau,
- lis atour de tiatre tènon la sceno dins de pèço chanudo qu’esbalaudisson l’espetatour dins aquéli salo pastouraliero que se ié pòu plus teni tant li gènt se ié sarron,
- li capelan di glèiso prouvençalo sermounejon toujour soun pople de praticant dins lou parla de la Vierge de Lourdo vo de La Saleto entre que clantisson à moulounado li saume e cantico au bèu mitan di santoun de la crècho prouvençalo,
- lou cinema prouvençau viro e reviro d’estirado de filme que se proujèton en bèu lume sus lis escran ensouleia davans li badaire toujour penja à la lengo dis atriço e atour dóu bèl acènt,
- lou mounde di gènt que gouvernon en Prouvènço es pas en rèsto, lou presidènt de la Regioun Prouvènço-Aup-Costo d’Azur a mes sa placo, mita escricho, en prouvençau sus la muraio de soun hotel, lou presidènt dóu despartamen di Bouco-dóu-Rose, éu, a fa parié, e li conse de touto meno an segui, se parlon pas prouvençau dins sis emicicle, acò vai veni, lis aparaire de la lengo an jamai agu tant de mounde en cadiero dins lis acamp dóu Counsèu Regiounau coume dins aquéli di Counsèu Generau, emai di municipe, coumunauta de coumuno, coumunauta urbano e groupamen intercoumunau que fan boui-boui en subre-mountacioun de sa representativeta territourialo,
- soun de l’avans, segur, lis assouciacioun nostro que prenon la defènso de la lengo prouvençalo dins sis estatut, e aro, soun en paradis, l’argènt di suvencioun di couleitiveta loucalo coulo à bèu rajoulet, tant que d’ùni n’en soun negado… I’a que de vèire li bastimen que se quihon dins tout lou terraire pèr auboura que mai nosto lengo prouvençalo…
- pèr lou bouquet vo pulèu lou panié di pruno de la noublesso assouciativo, avèn vist espeli la freirejacioun prouvençalo, en de groupamen, unioun, couourdinacioun, couleitiéu de tout meno que greion coume de blad e crèisson coume de boulet de bos. Tout acò pèr buta, à double entèndre, lou carretoun de l’acioun e de l’amista en lengo nostro.
Osco la Prouvènço se mantèn, e se coumpren que li ravi d’aquelo crècho vogon pas boulega de sa fiero i santoun !
Biais de revèire
Es eici que s’embouio l’escagno coume disié Mistral dins si rascladuro de pestrin. Sus aquel item, dos assouciacioun majo soun pas dóu meme dire, l’I.E.O federau e la counfederacioun di Calandreto. De coutrìo sonon à la moubilisacioun pèr uno manifestacioun unitàri de tóuti lis aparaire de la lengo d’oc à Mount-Pelié lou dissate 24 d’óutobre avans lis eleicioun regiounalo.
La recouneissènço óuficialo de l’ensignamen de nosto lengo es toujour en chancello e l’Estat se vai desbarrassa de la poulitico lenguisitico pèr n’en carga li regioun nouvello, adounc, sènso se descaussa pèr ié dire acò, fau avisa li futur presidènt de Regioun que dins soun païs i’a toujour uno lengo istourico à valourisa en coumençant pèr n’assegura l’ensignamen. Pèr acò, es à nous-autre de ié moustra à bèus iue vesènt que lis aparaire d’aquelo lengo soun encaro noumbrous e que se leissaran pas despousseda dóu patrimòni eireta de si gènt.
Sènso óublida que la ratificacioun de la Charto éuroupenco di lengo regiounalo es toujour pas ratificado pèr lou vote encaro à l’espèro di senatour treinassaire.
Acioun de segui… e de prepara…
Bernat Giély
|
