Editouriau dóu mes de mai 2024
Prouvençalisto
Sian clafi d’identita que siegue pèr la culturo,
la lengo, o li tradicioun nostro.
Avèn vuei un terme que s’aboulis pas, mai sèr à nous demouli, es l’identita.
Emé l’identita pensavian soulamen à ço que mostro nosto persounalita, assegurado pèr uno pèço vo carto d’identita que se ié trobo noste noum, pichot-noum, dato e liò de neissènço, fotò, enumeracioun d’ùni particularita fisico, emprento dóu det e signaturo.
Aqui, ié sian ! Segur de teni la fourmulo de Parmenide : “ L’èstre es, lou noun-èstre es pas ”.
Mai acò es l’identita persounalo dins l’espàci individuau.
L’identita es devengudo multiplo, couleitivo e soucialo, estènt que se pòu destria en identita naciounalo, regiounalo, lenguistico, culturalo, etnico, racialo, religiouso emai seissualo.
L’identita s’endevèn uno forto marco de recouneissènço dins un groupe vo uno coumunauta.
Mai d’ùni afourtisson que l’individu s’alieno ansin dins la dependènci, se nègo dins l’assimilacioun is autre.
Nous-autre, sian de regiounalisto que voulèn sauva la lengo istourico e la culturo tradiciounalo de la Prouvènço e de tout lou païs d’oc, adounc en voucable mouderne sian d’aparaire de l’identita lenguistico e de l’identita culturalo dóu terraire miejournau, ressentèn encaro uno apartenènci à-n-uno prouvinço.
Adeja sian de “ xénophobes ” dins lou lengage francés, en causo d’aquelo councepcioun estrecho, esclusivo, bigoto, simplisto que redus l’identita entiero à-n-uno souleto apartenènci, prouclamado emé ràbi, coume l’escriéu Amin Maalouf dins soun libre “ Les identités meurtrières ”, e que fau belèu se n’en mesfisa estènt que i’a d’Éuroupen que ressènton, - dóu Païs basque enjusqu’à l’Escosso -, uno apartenènci puissanto, prefoundo, à-n-uno regioun, à soun pople, à soun istòri e à sa lengo.
Vaqui, aro, uno revendicacioun regiounalisto es devengudo uno recriminacioun identitàri.
Alsacian, Basque, Bretoun Catalan, Corse, Creole, Prouvençau, Óucitan, etc., tout acò es d’identitàri tanca dins sis esfèri d’apartenènci soucialo e istourico.
E aquélis identitàri soun bèn segur critica pèr ço que destruison l’identita naciounalo, e l’Estat ié vai de denouncia soun identitarisme que meno à la descoustrucioun de la Republico franceso uno e indivisiblo. Se i’empego mai l’etiqueto dóu “ wokisme ” de gènt que luchon pèr se reclama d’uno identita propro, óupausado au moudèle dóu poudé douminant.
D’aqui entre aqui, l’identitàri que vòu apara sa lengo e sa culturo escrachado pèr un gouvèr centralisaire, se vèi trata de racisto qu’amo pas lis autre qu’éli respèton li règlo e li normo coumuno au noum de l’interès dóu païs douminaire.
Pàuris identitàri, li grand mèstre dóu païs te li mandon dins li cafourno de marrit óupousant poulitique e nòstis assouciacioun regiounalisto sarien devengudo vergougnouso dins la mescladisso identitàri : “ Des mouvements “identitaires” situés à l’extrême droite militent pour la défense de formes de vie et de pensée qu’ils jugent menacées par les autres, les étrangers, les envahisseurs ”, questioun resouludo dins lou libre “ Que devient l’identité ? ” de Roger-Pol Droit e Monique Atlan.
Pecaire, sabèn proun que l’envahissaire de la Prouvènço, l’Estat francés, lou poudren jamai deslouja, sian uni à la Franço coume un principau à-n-un autre principau emé la proumesso de garda nosto lengo emé nòstis us e coustumo.
Basto ! Tant-pis se li militant di groupamen culturau que volon sauva soun patrimòni lenguistique soun d’identitàri maufatan.
Pièi, se faire trata de militant d’estrèmo drecho, ié sian acoustuma en counservant lou majourau dóu Felibrige Charle Maurras dins nòsti grands escrivan, counsacra qu’èro pèr èstre esta bèu proumié manifestant federalisto en vouguènt baia mai d’autounoumìo à la Prouvènço. Grand pouliticaire francés lou poudrien pas bouta demié lis identitàri luchavo pèr un resounable bilenguisme que disié : ramena li dos lengo à sa sourso unico, ço que permetrié à-n-un pople bèn douta, viéu, dubert d’esperit e d’amo, de n’en fini emé un caos lenguistique desounourant.
Acò èro à passa tèms, vuei, fau pas rèn revendica au noum d’uno councepcioun tribalo de l’identita prouvençalo sarié uno atitudo seitàri.
Adounc pèr pas se nega dins lou seitarisme identitàri fau tourna prene lou batèu de Tesiéu qu’èro ana coumbatre lou Minoutaure. À soun retour aculi en vincèire dins sa vilo d’Atèno, Plutarque raconto qu’aquéu veissèu fuguè counserva en souveni pendènt de siècle pèr lis Atenian. Malurousamen li plancho de bos dóu batèu se gastavon e la devien ramplaça pèr uno plancho novo soulidamen jouncho is anciano e plan planet, de siècle plus tard, s’endevenguè un batèu forço mai bèu qu’à l’óurigino.
Alor, Plutarque se demandavo se s’agissié toujour dóu batèu de Tesiéu ? S’avié pas ansin perdu soun identita quouro la majo part di plancho èron estado chanjado ?
Coume que fugue lou deveni di causo se pauso toujour, pamens l’etimoulougìo dóu mot identita es la “ qualita de ço que rèsto parié ”.
Aro, saupre se lou batèu de Prouvènço es resta lou meme que dóu tèms de Frederi Mistral, tant s’es rafistoula e s’es repoupla.
L’identita sarié pas uno engano, en un brèu de tèms tout boulego, pas rèn rèsto perfetamen identique.
Sian dins un autre mounde e sarié uno ilusioun de lou crèire de-longo parié à-n-éu-meme.
“ Tout coulo ” que disié Eraclite, se poudèn jamai bagna dous cop dins lou meme flume estènt qu’es plus idendique à-n-éu-meme d’un moumen à l’autre.
Manteni sarié belèu s’embarra dins ço que se dis uno essencialisacioun identitàri. L’estacamen à l’apartenènci d’un tèms passa sarié plus de modo.
Viro que viraras, nous-autre voulèn garda nosto lengo en bouco e revendicaren toujour aquelo identita lenguisitico estènt que noste parla es toujour lou meme.
De tout biais lou mot “ identita ” s’emplego, alor arresten de se plagne e counserven-lou, coume sèmblo counveni is autourita naciounalo e regiounalo :
Au Menistèri de la cuturo de l’Estat francés dison bèn que i’a tres categourìo de Regioun à respèt de soun identita :
- li regioun à forto identita territourialo: la Corso d’abord, mai tambèn la Bretagno, l’Alsaço, lou Nord-Pas-de-Calais i qualo se pòu ajougne Miejour-Pirenèu.
- li regioun à feblo identita territourialo;: l’Isclo-de-Franço, lou Cèntre, la Picardìo, la Bourgougno, li Païs de la Lèiro, ansin que Rose-Aup, Peitou-Charento e la Basso-Nourmandìo.
- li regioun à identita territourialo intermediàri: Lengadò-Roussihoun, Aquitàni, Lourreno, Prouvènço-Aup-Costo d’Azur ansin que lou Lemousin. (valènt-à-dire, la Regioun Óucitanìo e la Regioun Sud).
Dins nosto Regioun l’afichage es tambèn clar :
L’identita culturalo especifico de Prouvènço-Aup-Costo d’Azur se foundo sus un ensèn de tradicioun, de memòri couleitivo e sus uno pluralita lenguistico remarcablo, rebat di divers territòri e especificita dins l’espàci d’oc.
Aquel eiretage lega pèr li tradicioun regiounalo noun sauprié èstre dissoucia de l’eiretage memouriau dis evenimen tragique de l’istòri countempourano. En counsequènci, l’acioun de la Regioun dins lou doumaine inmateriau se perlongo em’ un soustèn atiéu is ouperatour qu’obron au devé de memòri.
Vai, fai bon saupre que nosto identita es pas imaginàri, mai intermediàri… Noste batèu navigo plus entre dos aigo !
Bernat Giély
|
