Editouriau dóu mes de mai 2018
Souveni, souveni…
Lou poulit mes de Mai de 1968 restountis mai !
Moun mes de Mai 1968
Aviéu 20 an. Fasiéu mis estùdi de medecino à Marsiho, en proumiero annado.
Siéu Corse e aviéu fa la debuto de mis estùdi enjusquo lou bac à Bastia. Pièi, pèr faire medecino, siéu vengu à Marsiho, à la Fac.
Restave dins un pichot estudiò dóu coustat dóu quartié Dromel.
À la debuto, poudian ana dins lis anfi pèr segui li cous. I’avié pas trop de trebouladisso dins li cous, mai, pièi, pau à cha pau, i’aguè plus ges d’essènci, plus ges de bus, quàuquis arlèri óucupavon lis anfi, mai li cous se perseguissien riboun-ribagno.
Moussu lou proufessour Enri Gastaut, lou néuroulogue, èro lou Decan de la Faculta. Un jour nous diguè que falié evacua la Fac.
Erian touto uno chourmo de Corse, erian un pau isoula : la Fac èro barrado, lou restò U servié plus la biasso. Nòsti gènt poudien plus nous manda de dardèno que lou courrié passavo plus.
Lou 13 de mai 1968, li campano de N.-D. de la Gardo dindèron à brand : èro la grèvo generalo. La Franço èro paralisado pèr de gràndi manifestacioun. La Canobiero èro negro de manifestant, de bas en aut.
Lou telefone èro pas coume aro, avian pas de nouvello dóu païs, mai au païs, nòsti gènt èron en soucit. Se bouleguèron : anèron vèire lou prefèt pèr demanda lou rapatrimen de si pichot.
Es coume acò que lou prefèt de Marsiho prenguè la decisioun de nous tourna tóuti manda sus nosto isclo.
Avèn sachu que se falié recampa sus lou Port Vièi. De càrri nous menèron à Touloun, dins l’arsena ounte un batèu de la Marino nous esperavo. Mai èro pas un batèu de 1ero classo, èro un vièi batèu, dóu founs plat, pèr traspourta li troupo e lou materiau militàri. Mai qu’en chau, avian 20 an, e èro la fèsto !
Nous vaqui tóuti sus lou pont vers 8 ouro de vèspre pèr 24 ouro de travessado enjusqu’à Bastia. Fuguè espetaclouso : avèn pas dourmi, que d’ùni avien mena sa guitarro e avèn canta tout la niue. Erian soulet emé li mititàri.
Au matin, avèn fa uno intrado triounflanto dins lou port de Bastia. Nòsti gènt èron vertadieramen mai inquiet que nautre…
Li vacanço poudien coumença !
Un que i’èro.
Moun enfumado de Mai 1968
Se fau ramenta qu’en 1968, èro encaro un tèms ounte li jóuini Miejournau s’escapavon dóu païs pèr plus trima au travai coume si gènt. Lou bonur, la panacèio soucialo èro d’ana faire lou founciounàri, un bèu mestié sènso soucit e assegura pèr la vido. Fuguè la draio que m’èro moustrado, necito pèr lou countentamen de touto la famiho.
Camino que caminaras, m’encapère nouma pèr moun proumié posto dins la vilo di lum, Paris… e fuguè mis annado de purgatòri avans lou retour tant espera en Prouvènço. Mai es coume acò que dins mi quàuquis an de presènci amoundaut, se ié troubè l’annado 1968 e soun poulit mes de Mai.
Adounc lis evenimen lis ai viscu de proche, moun travai me menavo chasque jour de vèspre vo de niue dins lou Quartié Latin. Countourroulaire dis espetacle que me disien dins li Countribucioun Indirèito, es-à-dire que verificave, en arribant subran sènso avisa, lis establimen que baiavon de representacioun tiatralo, lirico, cinematougrafico, couregrafico, etc. La toco èro de countourroula la bihetarié coumtablo dóu noumbre d’intrado e se i’empegavo uno “ tausso sus lis espetacle ”. Pèr acò virave dins lou Quartié Latin que m’èro atribuï pèr doumaine d’acioun.
Un bèl asard, qu’aqui dins la librarié d’en fàci la Sourbono croumpère moun proumier eisèmplàri dóu Pichot Tresor de Savié de Fourviero, mai subre-tout es en davalant lou balouard Sant-Michèu, qu’en ribo de Seino, troubère devers un bouquinisto lou libre que me fuguè uno revelacioun, “ Calendau ” de Frederi Mistral. Aguère pas de forço legi la debuto dóu tèste, “ Iéu d’uno chato enamourado…” qu’adeja ausissiéu noste patoues de l’oustau famihau, aro, pecaire, abandouna. Sai-que ! Degun m’avié dich à l’escolo que noste parla naturau èro uno lengo literàri !
Revelacioun qu’anavo deveni revòuto pèr l’aparamen de nosto lengo, crido publico e manifestacioun pèr carriero. L’aprendissage fuguè de-bon aqui au mes de Mai 1968, long dóu balouard Sant-Michèu à Paris.
Prenguère pas part à-n-aquéli rassemblamen que soun plagnun èro estudiantin, mai me ié troubère pèr la forço di causo.
Lou proumié cop, au sourti dis escalié de la bouco de metrò agachère lou balouard mita despava, mita barricada, em’ uno boulegadisso de manifestant bèn ourganisa dins li mounto-davalo. M’anère vèire devers lou cinema que deviéu countourroula, dreissavo imbrandable sis aficho à bello visto. Lou baile m’aculiguè coume à l’acoustumado e anavian coumença de verifica la coumtabilita, quand de cridadisso furiouso clantiguèron davans lou lindau. Fauguè lèu-lèu s’aplanta dins nòsti comte. Uno bando de manifestant nervous e proun eicita menaçavon d’envahi la salo dóu cinema. Se beissè tant vite li grasiho de prouteicioun pèr enebi l’intrado. Iéu, ère dedins, restère pas pèr ausi li rancuro que countuniavon de plòure, me troubèron uno sourtido de secours pèr m’escapa dins uno pichoto carriero de l’en darrié.
Riboun-ribagno, acabère moun pres-fa dins lis àutris establimen di carriero d’alentour.
Lou cop d’après, quouro me presentère tourna-mai au cinema dóu balouard Sant-Michèu, ma suspresso fuguè grando, tout l’endavans se vesié saqueja… aguère pas de demanda d’esplico que me fuguè moustra la barricado dreissado aqui à l’en travers d’un trepadou à l’autre. — Moun paure, se voulès countourroula lou roulèu de bihet e sa numeroutacioun, es eila dins sa caisso au mitan di post, di gravèu, di pavat e dis escoubiho de touto meno pèr aussa la baragno !
D’efèt cadiero e taulo esclapado fasien bàrri pèr coupa lou balouard à la circulacioun… subre-tout de la pouliço.
Sarien aquéli marrit-pèu de blousoun negre di banlègo parisenco qu’ourganisavon lou saquejamen di boutigo e que mountavon li restanco pèr afrounta li Coumpagnié Republicano de Segureta. Acò ié semblavo de-verai, lis estudiant, d’aquéu tèms, èron rèn que de fiéu de bono famiho, bourgesié vo aristoucracìo ensignarello, avien pas besoun de quita l’escolo à 14 an coume lis enfant dóu pople pèr ana faire l’oubrié, ço que fai qu’èron bèn à l’aise pèr peroura dins l’anfitiatre de la Sourbono, emai veni arenga li gouvernaire sus li barricado tout preparado pèr aquelo meso en sceno que n’en faguèron lis eros evenimenciau.
Iéu, pecaire, me pausave pas la questioun, me falié establi uno meno de proucès-verbau pèr racounta coume tóuti li biheto e contro-marco d’aquéu cinema èron pedudo e se poudié plus coumta lou noumbre d’intrado dins la salo pèr n’establi au pres coutant lou mountant de la tausso à preleva.
Basto, tout èro pas perdu, à despart dóu balouard, lou restant dóu Quartié Latin assajavo de garda sa vido. Poudiéu encaro countunia de mena moun pres-fa de countourrole dins lis àutri establimen di carriereto e androuno, e me pausa dins lou mai pichot di tiatre pèr escouta “ La Cantatriço chauvo ” d’Ionesco.
Tant soulamen acò durè gaire, li manifestacioun s’enverinavon… Pièi un bèu jour, à la sourtido de l’estacioun Sant-Michèu dóu metrò, me retroubère dins un camp de bataio. Li petarado ensourdissien l’encountrado, mentre que lou fum blancas di boumbo lacrimougèno tapavo la visto e subre-tout picavo lis iue.
Aguère pas de faire quàuqui mètre en plourant coume un cadèu que deja dous C.R.S. bèn casca e carapaçouna m’ourdounavon de leva lis bras e lacha moun cartable… M’eisecutère sènso rebeca… Nè coume un couioun, me leissère chaspa e paupa de la tèsto à la planto… Segur, me troubèron desarma e me demandèron pas rèn, senoun de m’entourna d’aquéu quartié. Ço que manquère pas de faire tant lèu, un pau desabusa… e quand arribère à l’oustau, fuguè l’estounamen qu’esbléujo de me vèire tant bèn ploura… la pougnesoun dis iue d’aquéli gaz lacrimougène m’avié pas quita, plourave coume uno Madaleno.
Partènt d’aqui, moun travai dins lou quartié en insurreicioun fuguè óuficialamen suspendu. Seguiguère lou restant dis evenimen à la radio e dins la prèsso.
E ma darniero aprocho d’aquéli meno de manifestacioun istourico avans que de parti de Paris, fuguè d’èstre à l’acuei di tratour que mountavon dóu Miejour pèr tourna dire “ voulèn viéure au païs ”, mai èro deja la fin, lou camp militàri dóu Larzac anavo èstre abandouna e li gentièus estudiant, se gratavon l’embourigo countènt coume Batisto de s’èstre fach ausi emé si crido, afichage e deviso filousoufico libertàri pèr un mounde nouvèu. E o, tant que lou mounde sara mounde, diren Berto fielavo ! Un autre que i’èro.
|
