Editouriau dóu mes de mai 2017

Eleicioun, Elo vo Éu ?

Li lengo regiounalo soun pas encaro au prougramo

Li 11 Sansoun-derrabo-ferigoulo de la Presidencialo an fa mai de brut que de besougno pèr nous rassegura…

Coume l’avian di lou mes passa, es esta demanda en tóuti sa pousicioun à respèt di lengo regiounalo… à soun grand chut avian coumprés que se n’en trufavon dóu rout coume de l’entié…

Demandan escuso i dous valènt candidat que despièi nous an respoundu, Benezet Hamon e Jan Lassalle.

Benezet Hamon afourtis bèn qu’es “ l’un des seuls candidats à faire de la reconnaissance et de la diffusion des langues et cultures régionales une priorité ”, e après uno esplico di principe que soun li siéu acabo sa responso pèr :
“ La reconnaissance des langues et cultures régionales découle évidemment de ces principes. C’est pourquoi je me suis prononcé pour que la France se donne tous les moyens pour ratifier la charte des langues et cultures régionales, y compris en prenant les mesures nécessaires dans le cadre de la réforme constitutionnelle que je porte.”

Pèr Jan Lassalle èro de blad ensaca… cantavo en lengo nostro, vaqui de tros de sa responso :
“ Nos langues régionales vivantes, le breton, le basque,…, font partie du patrimoine national. Il faut les transmettre avec respect.” - “ Ce ne sont ni le basque, ni le béarnais, ni l’occitan, ni le breton, ni le corse qui mettent le français en danger.” - “J’ai voté la ratification de la Charte européenne des langues régionales, et je soutiendrai encore sa ratification.”

Malurousamen, pecaire, soun pas li dous gagnant dóu proumié tour d’aquelo eleicioun à la presidènci de la Republico Franceso.

Benezet Hamon daverè 6, 3 % di voues e Jan Lassalle 1, 2 %.
Fan pas l’empèri, mai pèr nautre emporton la bandiero !
Aro, avèn que lis ounglo pèr se grata, li cambo pèr ana manifesta e la voues pèr crida que voulèn sauva nosto lengo, valènt-à-dire que faudra countunia la lucho que siegue l’uno vo l’autre que mounte sus lou sèti de majesta : Marino Le Pen emé si 21, 4 % di voues o Enmanuèl Macron que pren la tèsto emé 23, 9 % d’eleitour favourable.

Arribe ço qu’arribe, se gardaren bèn de baia counsèu pèr faire la trìo, fasèn cachiero en degun e coume diguè Mistral dins sa Rèino Jano : “ Vai, vai, laisso lou tèms amadura li nèspo ! ”

“ La Rèino Jano coume l’on la vòu ”, valènt-à-dire… de proumesso… de proumesso… aqueste cop n’avèn pas.

Mai, sai-que ! esperaren pas à l’oumbreto, bastoun planta davans lou flume presidenciau que porto plus ges d’espèr. S’anan mai boulega !

Lou bos d’assemblage, aro, es dins nòsti mitan à nous-autre de Prouvènço vo d’Óucitanìo, de-coutrìo poudèn mai faire fais de tout bos e tourna parti en batèsto à masso pèr pas leissa s’avali noste parla.

Bernat Giély

Nàutri, li bon Prouvençau,
Au sufrage universau
Voularen pèr l’òli
E faren l’aiòli

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com