Editouriau
dóu mes de Mai 2014
Regioun e Pople Soulidàri
Sian à mand de vouta aqueste mes pèr elegi nòsti deputat au Parlamen éuroupen, mai fau pas crèire que sèr en rèn. Es de se souveni que lou 11 de setèmbre 2013, li deputat éuroupen acampa en coungrès à-n-Estrasbourg èron counvida à se prounounça sus lou raport pèr li lengo menaçado presenta pèr Francés Alfonsi.
Aquéu raport s’adreissavo à la Coumessioun e à l’Unioun Éuroupenco coume tambèn is Estat membre ié demandant de “ déployer des politiques ambitieuses et volontaristes de revitalisation des langues concernées ”.
À la Coumessioun demandè noutamen la relanço d’uno poulitico éuroupenco en favour di lengo en dangié ansin que lou soustèn i prougramo de sauvo-gardo d’aquéli lengo mena pèr li coumunauta lenguistico pertoucado. Apello en particulié lis Estat membre que l’an pas encaro fa de ratifica e metre en obro la Charto éuroupenco di lengo regiounalo e minouritàri. S’adrèisso tambèn is “ autourita regiounalo ” pèr qu’emé l’Unioun e lis Estat membre participon à la prouteicioun di lengo menaçado en tenènt comte noun soulamen dis aspèt culturau e educatiéu mai tambèn di dimensioun ecounoumico e soucialo d’aquelo questioun.
Counfourmamen au vote prealable de la Coumessioun Culturo dóu Parlamen Éuroupen, li deputat éuroupen an aprouva à-n-uno forço largo majourita lou raport de l’éuroudeputat Francés Alfonsi, porto-paraulo de Regioun e Pople Soulidàri. Sus 700 deputa qu’an pres part au vote, n’i’aguè que 26 que voutèron contro.
Regioun e Pople Soulidàri a pouscu se rejouï d’aquelo moubilisacioun pèr la preservacioun de la diversita lenguistico en Éuropo.
Au countràri de si vesin, la Franço, mau-grat li proumesso presidencialo, la Franço a toujour pas ratifica la Charto éuroupenco di lengo regiounalo e minouritàri.
Regioun e Pople Soulidàri espèro qu’emé aquéu pousiciounamen clar de l’Éuropo pèr la preservacioun dóu patrimòni culturau, la Franço finira pèr segui li recoumandacioun dóu Parlamen Éuroupen.
Vaqui l’acioun que fuguè menado e que capitè à l’aflat de noste éuroudeputa Francés Alfonsi, poudèn toujour coumta sus éu pèr faire de-longo avança la presso en comte di lengo regiounalo dins li poulitico publico dóu païs éuroupen.
Vuei se presènto tourna-mai souto la bandiero de Regioun e Pople Soulidàri pèr tourna mena soun coumbat au Parlamen Éuroupen, ié poudèn faire fisanço e apourta noste soustèn à sa listo Regioun e Pople Soulidàri que recampo lis aparaire di lengo regiounalo tóuti de-coutrìo e li Prouvençalo e Prouvençau ié soun pèr buta à la rodo.
Tricìo Dupuy
Regioun e Pople Soulidàri
Lou centenàri
Li counmemouracioun dóu centenàri de la mort de Frederi Mistral fan flòri, après la grando celebracioun d’aquel anniversàri de Maiano, lou 25 de mars, venèn de counèisse l’óumage de la vilo de Marsiho e l’ounouranço de la Prefeturo di Bouco-dóu-Rose, en mai lou 15 d’aquest mes es la Regioun Prouvènço-Aup-Costo d’Azur qu’ourganisara uno cermounié simboulico en l’ounour dóu Pouèto emé la pauso dins l’hotel de Regioun d’uno placo souveni d’aquel anniversàri mistralen.
Segur que fai gau de vèire uno pariero recouneissènço pèr lis àutis autourita de noste païs, mai ié faudrié pas óublida l’acioun proumiero de Frederi Mistral, la sauvo-gardo de la lengo de soun païs, adounc la meiour marco de respèt sarié de buta à la rodo pèr faire recounèisse e ensigna à bèl èime aquéu parla istouri, la lengo di troubadour, proumiero lengo literàri de l’Éuropo mouderno. Segur dins chasque discours aquelo verita s’esquiho… s’entènd belèu… mai auren encaro de-segur proun de peno pèr bèn faire ausi aquelo voues à d’ùni que la volon encaro estoufa !
Vai ! sian belèu pas proun finocho pèr aprouficha coume se dèurié d’aquelo proupagando benesido que nous aporto lou centenàri de Frederi Mistral… mai avèn pas encaro di lou darnié mot à la fin dóu darnié di discours counmemouratiéu… embrassant encaro l’aubre de la paciènci… avèn toujour agu d’enduro. Toujour à l’espèro de quicon vo de quaucun, coume li Senatour que se prèsson pas pèr vouta l’autourisacioun de ratifica la Charto éuroupenco di lengo regiounalo e minouritàri… e nous fan langui…
Lou langui tambèn de saupre, après l’anóuncio qu’es estado facho pèr lou nouvèu proumié menistre de moudifica lou relarg di regioun, coume la nostro se vai alarga…
Vuei, pèr lis eleicioun éuroupenco la fusioun de tres regioun es deja coumplido pèr elegi nòsti deputat emé uno circouscripcioun unico que reünis bèn li tres regioun Rose-Aup, Prouvènço-Aup-Costo d’Azur e Corso batejado Circouscripcioun Sud-Est. Mai se dis deja que se farié uno poulido bessounado di regioun Lengadò-Roussihoun e Prouvènço-Aup-Costo d’Azur.
P.A.
2014, e zóu…
Un nouvèu vote éuroupen pèr li lengo regiounalo
Lou vote pèr l’Éuropo
Lou Parlamen éuroupen pòu sembla sus uno autro planeto, li regioun franceso soun toujour en orbito à l’entour de l’astre parisen que ié fai lume.
Pamens, avèn de-bon aro uno autro sourso de lumiero que nous vèn de l’Éuropo la fau pas leissa s’amoussa…
La Charto éuroupenco di lengo regiounalo e minouritàri autant qu’un soustèn e uno prouteicioun, es un simbèu d’uno fraternita éuroupenco pèr fin que chasque pople garde sa lengo.
Pèr acò fau pas manca d’ana vouta lou 25 de mai, pèr elegi nòsti deputat éuroupen.
Segur, demié li candidat, n’i’a pas gaire que se souciton d’apara li lengo regiounalo. Sabèn malurousamen que quouro s’es vouta lou raport pèr espandi uno poulitico ambiciouso e voulountaristo de revitalisacioun di lengo regiounalo, la mita d’aquéli qu’an vouta contro èron de deputat francés.
Urousamen en Prouvènço avèn lou mèstre d’obro d’aquelo voulounta de toujour faire avans pèr sauva li lengo regiounalo, Francés Alfonsi, l’autour dóu raport pèr la preservacioun de la diversita lenguistico en Éuropo.
Francés Alfonsi meno la listo “ Regioun e Pople Soulidàri ” dins nosto circouscripcioun, es lou soulet que pòu tourna-mai oubra pèr l’aparamen di lengo regiounalo au Parlamen éuroupenco, adounc mancaren pas de lou gramacia e de l’ajuda lou 25 de mai en voutant pèr éu e sa listo que recampo pèr d’aparaire de nosto lengo, Ano-Marìo Hautant, Tricìo Dupuy, Arvè Guerrera, Jouèu Bouc, Michèu Prat...
“ Regioun e Pople Soulidàri ” presènto tambèn de listo dins lis àutri regioun qu’an un pople estaca à soun païs e sa lengo:
Circouscripcioun Ouèst : regioun Bretagno, Païs de Lèiro e Peitau-Charento.
Circouscripcioun Est : regioun Alsaço, Bourgougno, Champagno-Ardeno, Lourreno e Francho-Coumtat.
Circouscripcioun Sud-Ouèst : regioun Aquitàni, Lengadò-Roussihoun, e Miejour-Pirenèu.
Circouscripcioun Massis centrau-Cèntre: regioun Auvergno, Limousin e Cèntre.
Circouscripcioun Isclo-de-Franço que reünis la regioun Isclo-de-Franço e li Francés de l’estrangié.
Circouscripcioun Outro-Mar que recampo Sant-Pèire e Miqueloun, La Martinico, La Guiano, La Reünion, Maioto, La Nouvello-Caledounìo, La Poulinesìo franceso e Wallis e Futuna.
L’espèr regiounalisto es pertout presènt.
Eleicioun éuroupenco 2014
Lis eleicioun éuroupenco venènto se debanaran en Franço, lou 25 de mai 2014, emé un soulet tour. Dóu 22 au 25 mai, 500 milioun d’Éuroupen chausiran li 751 representant que siejaran au Parlamen éuroupen cinq annado de tèms.
28 païs voton e 72 deputa soun à elegi pèr la Franço.
Quau voto is eleicioun éuroupenco ?
- Li citouien francés aja d’au mens 18 an, restant dins la coumuno ounte volon vouta e iscri sus li tiero eleitouralo.
- Li ressourtissant coumunautàri aguènt lou dre de vote dins soun estat d’óurigino, restant dins la coumuno ounte volon vouta, e iscri sus li tiero eleitouralo.
Quau se pòu presenta à-n-aquélis eleicioun ?
Tout citouien d’un estat membre de l’Unioun Éuroupenco, aja de 18 an, restant en Franço despièi au mens 6 mens e jouïssènt dóu dre d’eligibilita dins soun païs d’óurigino.
Coume soun elegi li deputa éuroupen ?
Li règlo coumuno.
Li deputa éuroupen soun elegi au sufrage universau dirèit despièi 1979. Soun elegi pèr un mandat de 5 an. Lis eleicioun se fan la memo semano dins tóuti li païs éuroupen. La representacioun proupourciounalo es retengudo.
Quete mode d’escrutin pèr lis eleicioun éuroupenco en Franço ?
Lou territòri francés es decoupa en 8 circouscripcioun eleitouralo : 7 pèr la metroupòli, 1 pèr l’outro-mar.
Li sèti soun reparti entre li tiero aguènt agu au mens 5 % di sufrage espremi. Soun atribuï segound l’ordre de presentacioun sus la tiero.
Quete es lou role dóu deputa éuroupen ?
Lou deputa éuroupen eiserço 3 poudé :
- legislatiéu : lou Parlamen es partido prenènto dins l’adóucioun dis ate juridi coumunautàri,
- budgetàri : establis, emé lou Counsèu de l’Unioun Éuroupenco, lou budget annau de l’Unioun éuroupenco,
- de countourrole : intervèn dins la prouceduro de designacioun dóu presidènt de la Coumessioun éuroupenco.
Ounte sièjo lou Parlamen éuroupen ?
Soun sèti óuficiau es à-n-Estrasbourg, en Franço, e sèr i reünioun pleniàri ( un cop lou mes ). Li coumessioun, coume d’àutri sesiho se tènon à Brussello ( Belgico ). Soun secretariat generau es istala à Lussembourg.
De qu’es un groupe parlamentàri e quéti soun li groupe parlamentàri siejant au Parlamen éuroupen ?
Au Parlamen Éuroupen, un groupe dèu èstre coumpausa de deputa apartenènt à mai d’un estat membre. Lou noumbre minimon de deputa necite pèr coustituï un groupe poulitic es fisa à 23 deputa s’apartèn à dous Estat, à 18 deputa s’apartènon à tres Estat e à 14 deputa s’apartènon à quatre Estat o mai.
Dins lou Parlamen éuroupen d’aro, sèt groupe pouliti soun representa.
De qu’es la citouianeta éuroupenco ?
Istituïdo pèr lou tratat de Maastricht ( 1992 ) la citouianeta de l’Unioun coumplèto mai ramplaço pas la citouianeta naciounalo.
La citouianeta éuroupenco baio de dre coume lou de barrula libramen dins li païs de l’Unioun Éuroupenco, lou dre de vouta e d’èstre candidat is eleicioun municipalo e dóu Parlamen éuroupen.
Quente es lou role dóu mediatour éuroupen ?
Sèr d’intermediàri entre li citouien e lis autourita éuroupenco. Es abilita à reçaupre li plang di citouien, dis entrepresso e dis istitucioun de l’Unioun Éuroupenco. A lou poudé de mena uno enquisto pèr aquéli plang. Lou mediatour es elegi pèr lou Parlamen éuroupen pèr un mandat renouvelable de cinq an.
|
