Editouriau dóu mes de mai

Nosto-Damo dóu Lau

Lou amèu dou Lau, en dessus de Sant-Estève dins lis Àutis-Aup, vai èstre à l'ounour aqueste mes.
D'efèt, lou 4 de mai 2008, Mounsegnour Jan-Miquèu di Falco Léandri, evesque de Gap, vai prounouncia lou decrèt de recouneissènço toucant lou caratère subre-naturau dis aparicioun de la Vierge Marìo à Benezeto Rencurel. Es un escaloun de mai vers la beatificacioun de la vesènto. D'aquéu biais tambèn lou santuàri de Nosto-Damo dóu Lau s'aubouro au nivèu di santuàri de Lourdo vo de La Saleto.

La Glèiso recounèis aro óuficialamen que la Vierge es apareigudo au mes de mai 1664 pèr parla à-n-uno bergiero de 17 an que sabié pas legi nimai escriéure.

- Je suis Dame Marie, la Mère de Jésus… Ço qu'es subre-naturau es lou biais de dire… Degun se pauso pas plus la questioun de saupre quente lengage parlavo la damisello… Lou despartamen dis Áutis-Aup es en Franço, la lengo de la Republico es lou francés segound l'article 2 de la Coustitucioun, i'a pas de discussioun.

Sian pamens d'avis que Benezeto parlavo fourçadamen, coume nous autre, la lengo d'oc e que la Vierge parié coume à Lourdo e à La Saleto baiè si message dins aquelo lengo.

Benezeto Rencurel èro nascudo en 1647 dins uno famiho de pacan de Sant-Estève d'Avançoun, aqui l'Escolo èro pas encaro arribado pèr faire ensigna lou parla óuficiau dóu Reiaume.
De tout biais, pecaire, à sèt an, perdeguè soun paire, e deguè, pèr gagna soun pan, s'ana louga vers un vesin. Gardavo li bèsti pèr orto. Èro nourrido, mai coume i’avié pas proun à manga pèr touto l'oustalado, espargnavo sa biasso pèr n'en baia i drole de sa patrouno.
I'avien ensigna la dóutrino crestiano pèr aceta soun sort. Se dis qu'esgrunavo un capelet tout lou sanclame dóu jour en recitant si preguiero. Es ansin que Dono Marìo i'apareiguè un bèu jour, e la venguè retrouba quatre mes à-de-rèng pèr lou trescoul d'uno colo d'en dessus lou vilage.
D'en proumié silenciouso, la Vierge pièi espandiguè plan-planet si message pèr messiouna la jouino pastresso.
Sarié esta en setèmbre de 1664 au Lau que Marìo i'aurié demanda de basti aqui uno glèiso em' un oustau pèr li prèire.
La toco èro d'establi un liò de counversioun dins la draio de l'Evangèli souto cubert de la misericòrdi de Marìo. Li capelan demourarien aqui pèr assegura de-longo lou menistèri de la counfessioun.
Benezeto Rencurel se bandiguè dins sa messioun, malurousamen lou Clergié forço marca d’aquéu tèms pèr lou jansenisme tirassè di pèd pèr la crèire e la segui.
L'empachè pas de countunia soun obro. Deguè coumbatre touto meno de forço dóu Mau, endura li doulour dis escoussuro dóu Crist que pourtavo sus elo, pièi quand lou roumavage tirè lou mounde, supourta lou lassige dóu service i pelerin.

En 1666, s'engagè dins lou Tiers-Ordre doumenican, “Coumpagnié di Sorre de la Penitènci”, que ié pourgiguè uno meno de counsecracioun.
Dins un soucit de santificacioun persounalo, vai pratica la penitènci segound l'ensignamen baia pèr la Vierge.
Es uno di santo doumenicano que i'apareiguè lou 22 de juliet de 1678, santo Catarino de Sieno pèr ié presenta la courouno d'espino.
Mai fuguè en juliet de 1673 que Benezeto, au pèd de la crous d'Avançoun avié agu la vesioun de Jèsu crucifica e reçaupeguè dins soun cors li marco e li soufranço de la Passioun. Partènt d'aqui, chasco semano, nòuv an de tèms, entrecoupa de dos annado, la doulour dóu crucificamen la clavelè dins soun lié, ounte restavo en estàsi coumuniant dins la passioun dóu Crist. Fuguè aqui à la cimo de soun educacioun esperitalo.

Benezeto pregavo sènso relàmbi pèr la Glèiso, lou Rèi, li pecadou e li mouribound, ié pourgissènt si penitènci.
Se dis qu'avié lou carisme dóu cor e poudié counvida li penitènt d'ana de mai en mai luen dins sa demarcho pèr fin que siguèsse coumplèto.
Mai trop envestido dins sa toco, subiguè lis ataco sournarudo dóu demòni.

Mourriguè dins si 71 an, abenado pèr l'austerita de sa vido.

Despièi li roumavage countùnion, li garisoun tant fisico que mouralo soun acourdado à mouloun, subre-tout pèr l’entre-messo dis ouncioun de l'òli de la lampo dóu Santuàri aplicado emé fe, segound lou counsèu de la Vierge Marìo à Benezeto.

- J'ai demandé le Laus à mon Fils et il me l'a accordé.
La “gràci dóu Lau“ es aro de tremuda nosto lengo en francés rafina.
Anan pas, vuei, se mourtifica pèr acò. Nosto lengo es pas en oudour de santeta, lou sabèn que trop.

Nous empachara pas de restabli la verita, que siegue à Lourdo, à La Saleto vo au Lau, la Vierge a parla qu'uno lengo, la nostro.

Em' acò, l'Estat franchimand crèis que sa lengo franceso es souleto de dre divin. L'ouncioun de l'article 2 l'a degudo divinisado en plen.

Basto! Nous-autre sian fisançous, nosto lengo d'oc es la lengo inmourtalo di miracle. Es bèn lou signe de sa qualita.

De mai, aro, après Lourdo, La Saleto e Lou Lau s’es fa menti lou prouvèrbi :
“ Jamai sant de païs a fa miracle”

Es à la messo dóu dimenche 4 de mai que se prouclamara lou decrèt de recouneissènço. Aquel óufice sara retrasmés en dirèit pèr la cadeno de televisioun “France 3”.

Coulòqui Benezeto Rencurel

Divèndre 2 de mai
9 ouro e miejo : Duberturo dóu coulòqui pèr Mgr J-M. di Falco Léandri
9 ouro 45 : Les apparitions de la Vierge. (Patrick Sbalchiero, istourian)
10 ouro 45 : Comment Benoîte incarne l'Ecriture Sainte : elle voit ce qu'elle croit. (Jacques Ruff, filousofe)
11 ouro e miejo : Messo.
15 ouro : L'histoire d'une reconnaissance. (P. René Combal, carga de la causo de beatificacioun)
16 ouro : Une approche scientifique des apparitions. (François de Muizon, escrivan)
16 ouro 45 : Taulo redouno : Coume Benezeto fuguè trasfourmado pèr lis aparicioun.
20 ouro 30 : Councert de l'ensemble voucau de l'Escolo naciounalo de musico de Gap.

Dissate 3 de mai
9 e miejo : Le christianisme aux XVIIème et XVIIIème siècles : Benoîte Rencurel (M.-A. Vallart-Rossi, istouriano)
10 ouro 45 : Présomptions et preuves de la réalité des faits. (René Humetz, magistrat)
11 ouro e miejo : Messo.
15 ouro : La réconciliation au cœur des apparitions mariales. (P. Pierre Fournier)
16 ouro : Signification des apparitions mariales et impact sur la société. (Vittorio Messori, journalisto)
16 ouro 45 : Taulo redouno : coume faire entèndre lis aparicioun marialo de Nosto Damo dóu Lau vuei?
20h30 : Counferènci à plusiours voues : Se réconcilier avec soi-même, avec les autres et avec Dieu.
(Marcel Rufo - Marek Halter - Fabrice Hadjadj).

Un debat sus li lengo regiounalo

Lou deputa bretoun, Marc Le Fur, souto presidènt de l’Assemblado Naciounalo a touca ferre.
“ Me regaudisse que lou proumié Menistre tengue l’engajamen qu’avié pres sus ma demando sus li lengo regiounalo… Avié proumés un debat à l’Assemblado sus li lengo regiounalo prealable à la reformo istituciounalo.
Sara lou cas lou 7 de mai que vèn”.
E d’apoundre:
“ Aquéu debat es istouri. Es lou proumié cop qu’a lioc à l’Assemblado…
Forço deputa eissu di regioun pertoucado se moubilison d’aro en lai
sus aquéu sujèt e li counvide tóuti à èstre presènt lou 7 de mai que vèn
dins l’emicicle”.
Lou deputa di Costo d’Armor, Marc Le Fur, es un aparaire inalassable de la lengo bretouno e di lengo regiounalo.
En quatre an, aguè tres cop l’escasènço de depausa un amendamen à la Coustitucioun pèr la recouneissènço di lengo regiounalo.
Ié fasèn fisanço.