Editouriau
dóu mes de jun
Pas ges de dre coustituciounau
Uno decisioun
Counsiderant qu’i terme de l’article
75-1 de la Coustitucioun: “Li lengo regiounalo apartènon
au patrimòni de la Franço”, lou Counsèu coustituciounau
afourtis, declaradamen, qu’aquel article istiuïs pas un dre
vo uno liberta.
Disènt acò, lou Counsèu Coustituciounau a óuficialamen
decida lou 20 de mai 2011, que partènt d’aqui l’article
L. 312-10 dóu code de l’educacioun èro counforme à la
Coustitucioun franceso pèr remouca li requerènt que soustenien
que si dispousicioun garantissien pas uno prouteicioun efetivo de l’ensignamen
di lengo regiounalo.
Lou miraiet di lengo regiounalo, patrimounialo, dins la Coustitucioun
a fini de vira.
Acò brulavo au lume, aro es de bon vèire e ausi:
—
En enounciant que li lengo regiounalo apartènon au patrimòni
de la Franço, lou coustituènt a egalamen manifesta qu’entendié pas
crea un dre vo uno liberta…
Aquelo espouscado qu’amosso noste pichot lume d’espèr,
partiguè d’en Mousello emé la barraduro de dos classo
bilengo. Un doursié de recours contro acò es esta depausa
au tribunau amenistratiéu, bono-di dos famiho de Sarrague-mino.
Aquéu tribunau s’esquihè en mandant l’afaire
au Counsèu d’Estat, e aquéu d’aqui, bandiguè mai
lou doursié au Counsèu coustituciounau que, fin-finalo,
pousquè pas s’esbigna.
Pas proun de dire que li lengo regiounalo an pas de dre vo de liberta à revendica,
es esta bèn precisa que l’ensignamen óubligatòri
d’uno lengo regiounalo èro enebi.
Vaqui l’item :
—
Pèr èstre coumplèt, counvèn de rapela que,
s’agissènt di lengo regiounalo, lou counsèu a desvouloupa
uno jurisprudènci restritivo, tenènt noutamen i terme de
l’article 2 de la Coustitucioun la langue de la République
est le français. A d’abord juja que la Charto éuroupenco
di lengo regiounalo vo minouritàri coumporto de clauso countràri à la
Coustitucioun… A tambèn juja, s’agissènt de
l’ensignamen publi, que l’ensignamen d’uno lengo regiounalo
dins lou tèms escoulàri es pas countràri au principe
d’egalita d’alor que revesti pas un caratère óubligatòri… Eisisto
dounc pas ges de dre coustituciounau à-n-un ensignamen di lengo
regiounalo au proufié dis elèvo. La revisioun coustituciounalo
dóu 23 de juliet de 2008 a rèn cambia sus aquéu
poun”.
Tout vai bèn, vènto toujour dóu vènt que
vènto.
Lou batejat patrimouniau di lengo regiounalo dins la Coustitucioun èro
uno galejado de farcejaire que nous an bèn fa dindouneja.
Saupre s’aquélis afiermacioun de la mai auto autourita de
l’Estat vai pas escracha lou debat que se dèu teni lou 30
de jun au Senat sus lou desvouloupamen di lengo regiounalo ?
Uno proupousicioun
D’efèt, li senatour s’empegon dos proupousicioun de
lèi sus lis esquino, mai ié van plan-planet, li faren pas
veni lèbre pèr acò. Adounc, van coumença
sa discutido sus uno souleto proupousicioun de lèi, aquelo di
soucialisto. Mai fau saupre que lou tèste establi pèr lou
deputa bretoun Marc Le Fur de l’UMP s’es entrigassa em’aquéu
dóu deputa alsacian, Armand Jung, dóu PS. Un pedassage à l’aflat
dóu senatour catalan, Jan-Pau Alduy, semblavo acountenta la drecho
e la gaucho, quand tourna-mai un senatour de l’Eraut, Roubert Navarro,
dóu PS, venguè depausa un tèste moudifica.
Lou proujèt ambicious s’aléujo de touto meno de supressioun
pèr soulaja touto meno de senatour. De parpello d’agasso,
que pamens chanjon tout: l’Estat en coulabouracioun emé li
couleitiveta territourialo garantis plus l’ensignamen di lengo
regiounalo, mai permet l’ensignamen di lengo regiounalo.
Se fan passa de mot dous, que s’endevènon aigre pèr
nous-autre.
Subre-tout, lèvon lou meiour que disié que l’ensignamen
devié èstre prepausa en tóuti, eiceptat pèr
aquéli qu’èro de-bon óupausa e poudien demanda
uno derougacioun.
Aro, l’ensignamen saran prepausa rèn qu’is “enfant
di famiho interessado”. Adounc, li faudra ana cerca, e n’en
trouba proun, au bon endré pèr aganta un proufessour sus
plaço.
Coume lou dis tant bèn lou tèste, en estile amenistratiéu,
forço eisa de coumprene : “En tout estat de causo, quouro
eisisto uno demando de la part d’aquéli, dèu èstre
satisfacho de maniero aproupriado, es-à-dire dins lou respèt
di principe de proussimeta — l’acès à-n-aquéu
service dèu pousqué èstre garanti à-n-uno
distanço resounable dóu doumicile —, e de countinuëta — counvèn
de counsulta de fihiero couërènto”.
Sian bèn countènt
de lou saupre !
Basto! noste journau vai parti à l’estampaire, mai sabèn
qu’un acamp dis aparaire de la lengo d’oc, es previst pèr
lou 25 de mai, à Beziés, emé lou senatour Roubert
Navarro, poudrié encaro ameioura aquelo proupousicioun, subre-tout
sus aquéu darnié poun, que senoun ié fai perdre
tout soun interès.
Pas proun d’acò l’ensignamen de la lengo porto de
mai en mai soucit. L’Educacioun naciounalo a publica, lou 19 de
mai, qu’en 2012, pèr lou CAPES, i’aura pas ges de
councours estèrne nimai interne pèr li lengo regiounalo,
franc dóu creole.
La FELCO e tóuti lis assouciacioun d’ensignamen d’uno
lengo regiounalo, coume li Basque, Bretoun, vo Catalan, an tant lèu
rena qu’acò èro la negacioun de tóuti li discours
tengu sus li lengo regiounalo “patrimòni naciounau” de
preserva.
L’óupousicioun fuguè tant forto, qu’à l’ouro
d’aro, lou menistèri de l’Educacioun naciounalo sèmblo
recula, e fin-finalo li councours restaran dubert, mai sabèn pas
encaro se li 4 poste de CAPES d’óucitan-lengo d’oc
dubert l’an passa saran mantengu.
Aqui mai la partido es pas gagnado, avèn pas acaba de crida.
Uno manifestacioun
Acò di, la crido pèr uno nouvello manifestacioun de carriero
coumenço, sabèn plus souto quento bandiero, mai es pèr
sauva nosto lengo, lou dissate 31 de mars à Toulouso.
Sara uno dato de revendicacioun coumuno pèr tóuti li lengo
regiounalo, adeja li Basque e li Bretoun se moubilison.
Tourna-mai, tout bèu just avans lis eleicioun presidencialo permetra
belèu de miés se faire entèndre pèr li candidat
e lou futur presidènt de la Republico. |
