Editouriau dóu mes de jun

Marsiho, capitalo éuroupenco de la Culturo

L'èime dóu Gardo-Biasso

Se n'en soun pancaro assegura, li Marsihés soun pamens bèn parti fin que sa vilo siegue noumado dins tres o quatre an, capitalo éuroupenco de la Culturo … Ço que n'en sounjon li Marsihés ? De-segur un bregoun de fierta! Ço que n'en pènson li Prouvençau ? … S'ameritarié de n'en durbi un countèsto au trelus de l'istòri toucant au mot de capitalo senoun lou que i'an douna fai soulamen quàuquis annado.
Mai s'aquéu proujèt fai de Marsiho uno capitalo… soubro pamens ço que se poudrié bèn afourti pèr l'escasènço e d'en proumié de quente qualificatiéu se deurié douna à-n-aquesto vilo mieterrano raiounant adeja coume de la Regioun Prouvènço… desempièi un bèn pichot tros de tèms ?
Beléu soun à mand de se n'avisa e de vougué faire tripet pelòri pèr fin finalo óublida lou couiounige de PACA ! Aven bèn tóuti ausi lou presidènt regiounau Vauzelle que pèr n'en dereviha lis eleitour voudrié n'en faire un referendum. An-ti talamen besoun, nòstis elegi, pèr prendre uno decisioun qu'es just de santo couneissènço d'un referendum bord que se saup de quente biais li gènt respondon à-n-aquelo counsulto.
Subre-tout que veici uno siglo enarquisto adoubado d'uno pereso voucalo e inteleitualo qu'a ges de plaço dins uno recouneissènço culturalo requisto. Mai es pas tant sus aquel item que vouliéu vous entreteni vuei, mai puléu sus l'image de nosto capitalo que s'ameritarié uno longo dicho bèn analisado pèr ié bèn metre la façoun.
Degun ausarié cerca de pountiho sus aquelo chausido de Marsiho à respèt de soun passat - fenician, rouman, crestian e subre-tout bèn mieterran - que segur s'es basti sus de siècle de renoumado.
Pamens quau pourrié me faire lou reproche de ramenta que meme au lume de l'istòri soun titre de capitalo ié fugué souvènt contro-ista e subre-tout penchina la cato pèr z-Ais sus lou plan pouliti, amenistratiéu e universitàri, e perqué pas peréu pèr Arle pèr soun espàci inmense d'un reiaume à si counfins e meme Avignon - la Roumo papalo - sus lou dóu religious !
Aquéli tres vilo que - forço escrivan e istourian - ié diguèron lou triangle sacra an souvènti fes juga li proumié role en-deforo di pensamen e dis interèst de Marsiho.
Au trelus de l'istòri, vaguèn d'assaja de iè vèire un pau plus clar, noun pèr abranda quàuqui vièii garrouio, mai puléu n'en tira d'ensignamen de sapiènci e un cambiamen d'esperit pèr l'aveni.
Chasque sant vòu soun lume!
Bèn avans aquéli siècle encaro proche… li de nosto pountannado istourico es-à-dire despièi li tèms dóu crestianisme.
Despièi sa foundacioun, nosto ciéuta grèco s'es souvènt embarrado dins soun vièi port, s'acoutentant de si confins proche coume coumtadou de negòci: Louis Brauquier pouèto e escrivan marsihés diguè comme au creux de la main, e jugo que jugaras à reboussié à respèt di pople que vivien dins lou rèire-païs … qu'èron de gènt fèr!
D'eisèmple n'en vos n'en vaqui quasimen dins tóuti li crounico de nosto istòri coumuno.
An pensa à la debuto que li pople de soun terraire èron de barbare que n'en falié s'en apara… Veici que venguèron li Rouman… e pamens Marsiho devenguè pas uno ciéuta roumano tant coume Arle o Aurenjo… e coume pènse que lou crestianisme es puléu arriva en Prouvènço - au mens autant - pèr li camin que pèr la mar mau-grat la tradicioun di Santo! I'a que de s'avisa de trouba li proumié martire à Lioun en 170 de nosto èro e que demié li vilo presènto au Councile d'Arle en 314 i'avié: Vesoun, Embrun, Ate tres ciéuta dóu rèire-païs, pièi segur Arle e Frèju.
Lou raiounamen esperituau de Marsiho, venguè plus tard amé Cassian e l'abadié de Sant Vitour. Au plan de la pountannado dis envasioun barbaro, Marsiho soubro uno isclo, un recatadoun de prousperita. Passa lou raubatòri de Sant Maiéu, es bèn Guilhem d'Arle e sis eiritié que van dins lou siècle XII° mena lou gouvèr prouvençau enjusquo dins li garrouio di Seignour Baussen, e di comte de Barcelouno o de Toulouso.
Marsiho cerco e trobo uno alianço amé Genova !
Au siècle XIII° l'afaire Rouncelin basti un nouvèl isoulamen - aquéu cop religious - en deforo di païs de Prouvènço. Dins lou counflit mounte Ramon V e Ramon VII fan de pantai, la vilo grèco de Prouvènço soubro à l'embat parié uno pichoto republico italiano… Pièi vaqui mai Marsiho que saup garda di privilège de tout meno passa lou reignage de Louvis XI e meme de Francés Iié e coume l'escrivon Contrucci e Duchêne dins sa bello e luminouso istòri de Marsiho qu'au bout dóu comte se vesié meme pas coume un tros dóu terradou de Prouvençau.
Au siècle segen vaqui Marsiho la catoulico amé Carcès que vau rèn saupre de ço que se debano dins l'encastre de la Reformo en Prouvènço.
Se poudrian pamens metre en soun ounour d'agué estampa lis obro de Bellaud de la Belaudiero coume soun proumié libre. Nosto Marsiho au bèu mitan dóu siècle XVII° countùnio de viéure dins si bàrri que soun quàsi li meme que li de l'Age Mejan e proche l'epoco grèco.

Plantarai aqui ma darriero visto mau-grat que poudriéu persegui ma cansoun-sirventès sus lou meme item e que troubariéu sèmpre li mèmi rasoun e li mèmis atitudo tout-de-long di siècle … enjusqu'aro … ?
Siéu pas, d'aqui ana aqui, pèr n'en metre encaro sus la bugado en dessousterrant li vièii garrouio, mai au mens pèr faire assaupre à mi gènt estaca à soun patrimòni qu'es justemen de patrimòni e d'istòri que se n'en viro quouro se parlo de culturo! Bord que se voulèn pas douna un trop marrit image de nosto capitalo es segur pas d'ecoumouni que n'en faudrié faire tout un tian.
Me dounarès bessai permessioun de pausa ço qu'es devengudo Marsiho à respèt de l'ecounoumìo mieterrano o éuroupenco? Rèn que se pousquèsse faire aquéu vantat de canta glòri e vitòri sus quel item. E veici, s'avisèn alors ço que l'istòri nous ensigno proun souvènt: Marsiho noun vouguè parteja ço que se passavo darrié soun esquino.
Legissès lis istourian qu'an publica lou passa de Marsiho - la rebello - e encaro aquel image sarié pèr nous agrada… mai tout de long di siècle tout ço que se debanavo dins lou rèire-païs prouvençau, li Marsihés se n'en garçavon coume de sa proumiero camiso. Me digués pas que siéu de mau countenta, mai se soucamen la metèn en balanço amè Barcelouno la catalano, vous avisarés bèn trop lèu de l'espetaclouso diferènci.
Barcelouno canto, manjo, danso, musiquejo e escriéu en parlant catalan… acò l'entrepacho pas de faire flòri dins tòuti li disciplino de la moudernita.
Marsiho sarié-ti devengudo capitalo éuroupenco de la culturo, enterin que just s'es pancaro bèn assetado coume capitalo de sa Regioun ?…
Quau me fara lou reproche de ramenta - encusas-me moun ami Vitour Gelu - li paraulo de Mistral : - Li aubre que se fan li plus bèu e li plus grand soun li qu'an li racino li mai prefoundo.

Marsiho qu'es devengudo la renoumado de toun port ? … toun endustrìo e toun negòci maritime ? …
Fau recounèisse que desempièi quàuquis annado s'es fa uno chausido d'englouria li culturo mieterrano, e que beléu li proujèt de museon e l'encaminado di mostro, d'espetacle, de rescontre e de crousiero touristico faran flòri. Se n'en poudèn saupre grat.
E pamens… l'autre jour aguère uno vision, quàsi un miracle!
En regardant à la televisioun un moussèu de la trilougìo celèbro de Marcèu Pagnol - pèr quau teniéu soun teatre subre-tout escri beléu pèr faire rire li Parisen - me siéu avisa davans uno talo indigènci de touto meno espremido pèr de coumedian proufessiounau de Paris qu’aro siéu segur qu'eisisto uno culturo marsiheso.

Fau ana la querre au fin founs de soun passat pèr basti un aveni e d'agué lou fege de la diferènci à dre lou nivelamen nèsci di sinjarié repetitivo di media tre lou lourdun moundiau
Aqui li sian, se Marsiho vòu adurre quaucarèn de requist à l'Éuropo e au Mounde, ié faudra ana pesca pas soucamen li galejado dins soun Vièi Port, si grand mounumen e soun istòri maritimo, mai beléu s'avisa qu'es pau, vuei la capitalo d'uno Regioun que ié dison Prouvènço, mounte tout un patrimòni s'es basti e recouneigu universau (e pas soucamen pèr faire rire li gènt d'Uba). Sa vièio lengo roumano e sa literaturo de-segur, mai peréu soun biais de vièure soun terraire dins sa diversita qu'es pas la darriero di richesso que dèuriè èstre englouriado.

Alor Moussu lou Presidènt Vauzelle, se voulès que lou mounde entié vous ausisse e vous coumprengue, esperés pas lou referendum pèr crida coume un sacre : Marsiho es la capitalo de la Prouvènço.