Editouriau
di mes de juliet e avoust
Sènso
lèi
Uno decisioun
L'ana-veni di proupousicioun de lèi
toucant li lengo e culturo regiounalo es pas acaba.
Avisas-vous que la darniero prepausado pèr Armand Jung à l'Assemblado
naciounalo agué pas l'ur de plaire en tóuti… Adounc “comte-tengu
de l'ensèn di remarco facho pèr li camarado noun signatàri” es
uno proupousicioun de lèi reitificado que nous pourgis lou senatour
de l'Eraut, Roubert Navarro, pèr “metre un terme à l'ipoucrisié frapant
nòsti lengo e culturo regiounalo”.
De-segur, l'ipoucrisìo a fa lume lou 20 de mai passa, quouro lou
Counsèu coustituciounau a rendu sa decisioun n° 2011-130 QPC.
Bravas e bedigas, avian cresegu à la recouneissènço óuficialo
di lengo regiounalo, quand pèr la reformo de la Coustitucioun
en 2008 nous an acourda un pichot article 75-1, que dis “li lengo
regiounalo apartènon au patrimòni de la Franço”.
Èro qu'un miraiet, lou Counsèu coustituciounau a fini pèr
dire lou verai dins si argumen : “aquel article n'istituïs
pas un dre vo uno liberta que la Coustitucioun garantis”.
Fidèl à-n-uno jurisprudènci coustanto, valènt-à-dire “toujour
parié”, d'assetoun sus lou preambule de la Coustitucioun
refuson “de recounèisse de dre especific à d'ùni
categourìo de citouien, que mai quand es sus de territòri
determina”.
Sian lis indian de Franço.
Ansin quouro la proupousicioun de lèi reitificado n° 251 fuguè baiado
en coumessioun, Savié North, lou delegat à la lengo franceso
e i lengo de Franço, manquè pas d'auboura aquelo bello
restanco coustituciounalo.
Zóu mai, de sourti “la lèi dóu 4 d'avoust
1994, dicho lèi Toubon, qu’adoursado à l'article
2 de la Coustitucioun - la lengo de la Republico es lou francés
- creo un dre rèn qu’au francés. Or, se se n'en tenèn à la
decisioun dóu Counsèu, i'a pas dins noste païs de
dre à d'àutri lengo qu'au francés”.
Adounc, tóut aquéli proupousicioun de lèi, se podon
discuti d'un coustat de l'autre, mai n'en faudra pas faire uno lèi,
senoun tout sara tant lèu passa au trenchet de l'espaso dóu
Counsèu coustituciounau.
Pèr aro, riscan pas rèn, la discussioun publico se debanara
lou 30 de jun 2011.
Nòsti valènt senatour despassaran pas lou capelet.
|
