L’aristoucracìo
en Franço ten toujour li bòni plaço à l’oumbro
di Coupolo.
Adounc vuei, es l’Acadèmi Franceso, uno acampado de gènt
dóu gros grum, segur de sa superiourita, que se creson lou dre de baia
sa verita uno e indivisiblo.
Li lengo regiounalo apartenon pas à soun mitan souciau… Éli
rafinon que lou francés.
Adounc vaqui sa paraulo divino:
Despièi mai de cinq siècle, la lengo franceso a farga la Franço.
Pèr un juste retour di causo, nosto Coustitucioun a, dins soun article
2, recouneigu aquelo evidènci: La Langue de la République est le
Français.
Or, lou 22 dóu mes de mai passa, li deputa an vouta un tèste que
si counsequènci porton atencho à l’identita naciounalo. An
souveta que siegue apoundu dins la Coustitucioun, à l’article 1,
que la proumiero fraso coumenço pèr aquéli mot: La France
est une République indivisible, laïque, démocratique et sociale,
uno fraso terminalo: Les langues régionales appartiennent à son
patrimoine.
Li lengo regiounalo apartenon à noste patrimòni culturau e souciau.
Quau n’en douto? espremisson de realita e de sensibilita qu’apartenon à la
richesso de nosto Nacioun.
Mai perdequé aquelo aparicioun subito dins la Coustitucioun?
Lou dre descriéu pas, engajo. Subre-tout quouro se parlo dóu dre
di dre, la Coustitucioun.
Demai , nous parèis que bouta li lengo regiounalo de Franço avans
la lengo de la Republico es un desfis à la simplo lougico, un refus de
la Republico, uno counfusioun dóu principe coustitutiéu de la Nacioun
e de l’óujèt d’uno poulitico.
Vièio Damo! dins uno Republico i’a de representant dóu pople
pèr decida d’acò, se dis la demoucracìo. Sian plus
au tèms di rèi, avès pas de legitimeta pèr impausa
que que siegue.
Ó ucupas-vous de vòsti cebo, lou plus bèu mot de la lengo
franceso,
vòsti davancié lou soun ana pesca dins uno lengo regiounalo , la
lengo prouvençalo , es lou mot “amour”.
N’en voulès plus d’aquéu patrimòni, enrichissès
aro lou parla francés rèn que de “sex-shop”, “hard”,
sias de bon lou “sexsymbol” d’un lengage francés “fast-food”,
chin fidèu de la lengo americano di mèstre dóu mounde.
Lou “fin amour” countuniara de viéure en Prouvènço
sènso voste faus patrimòni d’academician republican.
Basto, li senatour an bèn escouta la leiçoun de l’Acadèmi
franceso: fau pas leissa pouncheja uno lengo regiounalo dins la Coustitucioun.
Mau-despié l’ensistanço dóu Gouvernamen pèr
garda la decisioun di deputa, l’article sus li lengo regiounalo es esta
supremi pèr lou Senat emé 216 voues contro 103.
Moun Diéu qu’èro bèu d’entèndre la finoucharié d’aquéu
debat sus li lengo regiounalo au Senat.
Li senatour que soun contro l’apoundoun de la recouneissènço
di lengo regiounalo dins la Coustitucioun, mountèron, reiau, sus sa figuiero,
pas geina de moustra soun quiéu, lou faus quiéu, pèr magistera
en afourtissènt seriousamen que soun toujour esta pèr lou plurilenguisme,
que soun toujour esta estaca i lengo regiounalo, pamens aro, trop es trop, volon
pas sali la Coustitucioun emé la bavo de nòsti lengo…
“ Li lengo regiounalo apartenon pas au patrimòni de la Franço”.
Lou senatour bèn pansu, Michèu Charasse, a ramena tout acò à soun
nivèu, à la biasso, pèr irounisa sus la recouneissènço
patrimounialo emé “la potée auvergnate classée monument
historique!”.
Emai la Choucrouto que pausarié de proublèmo trasfrountalié pèr
uno recouneissènço au patrimòni d’un soulet Estat…
Lou senatour Jan-Lu Mélenchon, éu, vouguè ramena si coulègo
soucialisto óucitan e bretoun à la resoun, estènt qu’a
desbousca un coumplot: “Il existe un parti ethniciste qui veut faire introduire
dans la Constitution une référence à ces langues.”
L’etnicisto es l’espaventau, lou neoulougisme de racisto. Adounc
fau plus dire tout simplamen coume disié Mistral que sian d’uno
raço que regrèio… nimai que sian mèmbre d’uno
etnìo, i’a plus de coumunauta de lengo e de culturo en Prouvènço.
Aquelo etnicita es aro vergougnouso… se n’en pòu faire un
partit “etnicisto” dangeirous…
Basto, i’a long-tèms que n’avèn pres noste partit d’entèndre
de couiounado naciounalo.
Aquéu J-Lu Mélenchon, senatour soucialisto de l’Essono, es
un fourtas, n’en saup mai que lis autre. Afourtis quand parlo d’acò,
que li lengo minouritàri soun parlado rèn que pèr 7 % de
la poupulacioun. Ansin, la decisioun di deputa es absurdo e dangeirouso, sarié esta
preso souto l’enfluènci di coumunitaristo.
Vaqui mai uno envencioun lenguistico, aquéli que se replegon sus sa coumunauta
e foro-bandisson lis autre, de nouvèu fachisto.
Ié fau subre-tout pas dire que d’un pople fièr e libre sian
bessai la finicioun…
“ Lou risque poulitique es aquéu d’un coumunitarisme óuficialisa”,
que dis.
Aquéu Peppone de la laïcita franceso manjo de curat, mai soun lengage
es trop ermetique pèr nautre. “L’enracinement qu’idéalisent
aujourd’hui les urbains était avant tout porteur d’aliénation.
Quiconque a vécu dans un vilage sous l’œil de la bonne du curé saura
de quoi je parle!”
Avèn la responso di gènt dóu vilage :
- Vai t’en caga à la vigno !
Dins tout! rèn es perdu, lou deputa UMP di Costo d’Armor, Marc Le
Fur, es encaro fisançous:
Lou Senat es un fren à la moudernita, e aqui mai, fau saupre se i’óupausa,
es pas uno questioun de drecho vo de gaucho. Mai, vai i’avé uno
segoundo leituro à l’Assemblado e doute pas que parvenguessian à-n-un
acord.
Esperan dounc que lou Parlamen s’acampèsse en coungrès ,
sara belèu la court di miracle.
|
D’aquéli
cacalaus!
Vaqui
que, i’a quàuqui semano, un countourroulaire
de la SNCF fasié paga un bihet de suplemen à uno persouno
acoumpagnado de… Cacalaus. Uno bèsti coume uno autro que
dèu paga sa plaço.
Encaro urous que multipliquè pas lou pres dóu bihet pèr
lou noumbre de cacalaus...
Dins un coumunicat, la SNCF, generouso
que noun sai, anounciè que remboursavo “emai siguèsse pas óubligado
bord qu’aquélis animau se dèvon de paga sa plaço
coume tóuti lis animau doumesti”.
Me sèmblo d’abord que li cacalaus soun pas forço
fourça doumesti mai sauvage. E la SNCF aurié belèu
pouscu dreissa un proucès verbau bord que pènse qu’es
pas autourisa de prene lou trin emé un animau sauvage…
Mai tout acò me ramentè subre-tout un evenimen que faguè dato
dins la famiho de moun paire.
Soun grand, Cevenòu de Sauvo, traspourtè, éu tambèn
de cacalaus dins un panié.
D’aquéu tèms, ié faguèron pas paga
lou bihet de trin mai es à l’arribado à-n-Arle
que Clan-clan (èro soun escais-noum) aguè uno emoucioun.
Falié passa l’autré e paga pèr rintra dins
la vilo.
Aqui, Clanclan, soun sang faguè qu’un tour! E uno idèio
ié venguè:
—
Mai, moussu, s’èron vengu soulet, lis aurias pas fa paga… Alor,
tè, li vau espera de l’autre coustat.
E de vueja quatecant soun plen panié dins lou passage.
Imaginas l’escaufèstre !
La SNCF devrié tambèn pensa que de cacalaus podon s’esquiha
tout soulet, dins un vagoun .
Sarien alor de passagié clandestin, sènso papié e
sènso bihet.
Que faudrié faire?
|
