Editouriau
dóu mes de juin 2016
Couleitiveta territourialo
Vaqui la Metroupòli Ais Marsiho Prouvènço…
Avian la coumunauta urbano “ Marseille Provence Métropole ” que recampavo 18 coumuno dins lou despartamen di Bouco-dóu-Rose d’à l’entour de Marsiho e en ribo de mar.
Fuguè uno nouvello coucho pèr bèn pasta lou milo-fueio di couleitiveta territourialo franceso : Coumuno + coumunauta urbano, de vilo, d’agloumeracioun + despartamen + regioun + Estat.
À tè tu, tè iéu, tout acò rapugo de poudé. Es lou miracle de la multiplicacioun dis elegit pèr beileja li mémi tros de païs. À chasque cop falié bèn coumprene la toco d’aquéli nouvèllis istitucioun : la Regioun pèr supremi li despartamen, li coumunauta de coumuno, de vilo vo d’agloumeracioun pèr uno ourganisacioun raciounalo dóu terraire, valènt-à-dire qu’acò devié redurre quàuquis uno di 36 700 coumuno de Franço. Èro bèn pensa, mai aquélis óutis de la gouvernanço territourialo an fa chi. Li despartamen e li coumuno s’arrapon toujour au sòu de soun endré, entre que lis estruturo territourialo groussisson tranquilet e rapugon que mai lou dèime dóu countribuable tanca dins soun païs. Mai acò es de figo d’un autre panié.
L’intercoumunalita de-segur es necito. Es un remèdi à l’esparpai di vilo, vilage e vilajoun. Li regioun, éli, emai siegon nouvello, chanjon pas rèn, s’asseton toujour sus si despartamen inderrabable.
Urousamen, nous autre avèn pas de se plagne sian bèn fourni. La Regioun “ Prouvènço Aup Costo d’Azur ” es meravihouso emé soun nouvèu presidènt que, aro, interdis de ié dire PACA, estènt que vòu entèndre clanti sa Costo d’Azur.
Es de-bon vèire que noste Counsèu Regiounau cerno 6 despartamen emé si 958 coumuno pèr lou bèn-èstre d’aperaqui 4 953 675 abitant… poudèn pas dire 4 953 675 Prouvençau, estènt que mau-grat li soundage favourable à l’apelacioun touto simplo d’uno regioun “ Prouvènço ”, li presidènt soucitous de demoucracìo l’an jamai vougu, emai l’avans-dernié brandiguè soun drapèu de la separacioun, li Gavot, li Niçard d’un coustat e li Prouvençau de l’autre…
Pèr ço qu’es dóu nouvèu arriba à-n-aquéu gouvèr, éu, se coungousto que mai de la regioun tripartido, adounc es pas poussible de dire 4 953 675 de Prouvençau, nimai de Miejournau vo d’Óucitan, sian pas soulet. Fin finalo lou mot que fai flòri es Pacalian aplicable à-n-aquéli 4 953 675 d’abitant…
Ai ! ai ! ai ! Noun, noun, lou fau subre-tout pas dire, la prevousta dóu nouvèu segnour viho au respèt de l’interdicioun di mot PACA, Pacalian e Pacaliano en “ Prouvènço Aup Costo d’Azur ”.
Vai bèn, diren que sian 4 953 675 de bràvi gènt tanca dins aquelo couleitiveta territourialo fiero de sa tripleta, que pamens se multiplico pèr dous pèr coumta si sièis despartamen :
— li Bouco-dóu-Rose, emé 119 coumuno e 1 993 177 abitant
— lis Aup-Maritime 163 coumuno emé 1 080 771 abitant,
— lou Var, emé 153 coumuno e 1 023 583 abitant,
— la Vau-Cluso 151 coumuno emé 549 949 abitant
— lis Aup-d’Auto-Prouvènço, emé 200 coumuno e 161 916 abitant,
— lis Àutis-Aup, emé 172 coumuno e 139 279 abitant,
Aqui mai, à despart di Varés e di Vau-Clusen, s’es pas pouscu trouba de noum pèr aquéli que demoron dins lis àutri despartamen de la Regioun “ Prouvènço Aup Costo d’Azur ”.
De-tout biais la despartamentalisacioun es à l’artimo, l’anóuncio se fai, se desfai e se refai à l’aflat de chasque gouvèr en plaço, tant soulamen acò tirasso, ço que l’un a prepara counvèn pas à l’autre qu’arribo…
Basto, tout acò rèsto… quand pamens pèr s’aligna sus li gràndi metroupòli éuroupenco fau remoudela tóuti aquéli couleitiveta vieianchouno.
E aqui mai lou bast maco, la cououperacioun territourialo desagrado i pichot o grand segnour coumunau que volon pas parteja soun poudé.
Lou bèl eisèmple es baia vuei emé la creacioun, aquest an, de la nouvello intercoumunalita “ Metroupòli-Ais-Marsiho-Prouvènço ”. Regroupo 92 coumuno sus un bèu terraire de 3 173 km2 dis alentour de z-Ais e de Marsiho emé aperaqui 1 800 000 d’abitant, es la segoundo agloumeracioun de Franço, la proumiero pèr soun espandido, creado, coume es di, pèr ourganisa e desvouloupa aquéu terraire, proutegi si ressourço, facilita lou quoutidian e li desplaçamen, l’acès à l’emplé e au loujamen, etc. etc.
La metroupòli raiouno sus l’envirounamen regiounau, naciounau e internaciounau.
Bèn segur li coumuno recampado soun pas gaire d’egalita emé Marsiho e si 850 636 abitant e Sant-Antounin-sus-Baioun de 131 abitant.
Es esta precisa : aquelo aire urbano counjugo d’especificita qu’apellon uno estruturo de gouvernanço óuriginalo poulicentrico.
Es belèu acò que permeteguè la fusioun di sièis EPCI ( Establimen Publi de Cououperacioun Intercoumunalo ), la coumunauta urbano “ Marsiho-Prouvènço Metroupòli ”, li coumunauta d’agloumeracioun “ Païs d’Ais-en-Prouvènço ”, “ Païs d’Aubagno e de l’Estello ”, “ Seloun-Estang de Berro-Durènço ”, “ Païs dóu Martegue ”, e lou sendicat d’agloumeracioun nouvello “ Ouest Prouvènço ”.
L’unificacioun s’es adounc facho au proumié de janvié 2016 emé la creacioun de la “ Metroupòli-Ais-Marsiho-Prouvènço ”, mai faudra espera lou proumié de janvié de 2018 pèr que fuguèsse doutado de l’ensèn de si coumpetènci e poudra decida plenamen de la reparticioun de l’eisercice de si coumpetènci entre lou counsèu de la metroupòli e si counsèu de territòri qu’à coumta dóu proumié de janvié de 2020, enjusqu’aqui sian dins li mesuro transitòri.
Santo Paciènci !
Mai n’i’a que prenguèron paciènci en enrabiant, aquelo tempouro efemèro coumencè pèr de garrouio poulitico mai o mai bastardo que lis estrifage de cop que se fasien entre partisan d’un meme partit. Cadun pèr sa pèu.
D’en proumié d’ùni Maire voulien pas muda si catoun e criticavon à bèl èime aquelo nouvello metroupòli, pièi à cha pau lou criticun s’apasimè, soubravo lou mes passa que li Maire de z-Ais e de Pertus pèr reguigna. Èron toujour de se plagne que sus li 240 counseié territouriau, 108 siegon de Marsiho. Acò sarié pas trop counforme à d’ùni principe d’egalita davans la lèi e respetarié pas la Charto éuroupenco de l’autounoumìo loucalo qu’impauso justamen uno counsulto di couleitiveta loucalo.
Zóu, pèr acò d’aganta à-de-rèng lou Tribunau amenistratiéu, lou Counsèu d’Estat, e lou Counsèu coustituciounau, e d’abena tóuti li poussibleta de recour, pèr pecaire, se trouba desbouta definitivamen lou mes passa.
Adounc la “ Metroupòli-Ais-Marsiho-Prouvènço ” es bèn en plaço emé Jan-Glaude Gaudin counfourta coume presidènt.
Uno bono causo es que dins soun apelacioun aguèsson bouta “ Prouvènço ” la metroupòli marco ansin sa prouvençalita.
Mai, segur pèr aro, acò anara pas plus liuen, l’aparamen de la lengo e de la culturo prouvençalo es pas de sa coumpetènci.
Bernat Giély
|
