Editouriau
dóu mes de juin 2015
Oubradou senatouriau…
La Charto di lengo regiounalo
dor dins li croto dóu Senat
D’aise ! Anas d’aise !
Tout vai bèn dins li caminado parlamentàri, lou Gouvèr a pas besoun d’aplica sa limitacioun de vitesso, li senatour se l’aplicon tout soulet, caminon au pas de biòu :
Quau va plan
Vai san,
Quau courre
Se fènd lou mourre.
Aqui se vèi la sagesso d’aquéli bràvi gènt que fan la molo pèr faire la lèi en Franço.
De-bon parton jamai lou jour qu’embaston, se veson toujour de tèms davans… uno bono vòuto de tèms…
Pèr coustumo e memòri perdudo, leisson courna l’auro emé toujour l’esperit en coumessioun.
D’aquéu Senat !
Soun 348 senatour, mai li vesèn pas… pecaire, l’emecicle dóu Palais dóu Lussembourg es trop pichot pèr éli, alor s’abstènon de ié veni pèr leissa la plaço is autre, que vènon pas mai.
30 senatour es aperaqui l’afluènci mejano coustatado sus li banc d’aquelo assemblado.
Rèn qu’en Prouvènço se n’en trobo un bon proun dins la tiero d’aquéli resquihaire patenta.
L’ipoucresìo d’aquéli entartufat es de faire crèire que descuerbon vuei l’absenteïsme d’aquelo assemblado.
Bon-Diéu ! li volon plus paga pèr rèn faire ?
Que noun, ié retendran qu’un pichot pau de sòu en punimen pèr espera ansin ié faire passa sa pereso.
“L’absence au cours d’un même trimestre, à plus de la moitié soit des votes solennels, explications de vote incluses, soit à des réunions de commissions permanentes, soit à des séances de questions au gouvernement, entraînera pour le trimestre suivant la diminution de la moitié de l’indemnité de fonctions, pour un de ces items, soit 700 euros par mois”, avèn ausi canta la graio ! lou presidènt dóu Senat, Gerard Larcher.
Podon manca tant que volon, sus soun pagamen de founcioun de 3 000 éurò ié poudran pas mai reteni que 1 400 éurò, valènt-à-dire auran toujour 1 600 éurò pèr rèn faire… Es pas bello la vido coume se dis aro à Marsiho.
Tant soulamen aquéli qu’an la cagno coume aquéli que fan la radasso pèr pas travaia soun aqueste cop repertouria.
Coume de rèi !
Dins la tiero di 348 senatour, li manquant soun majouritàri, e li meiour soun bèn-segur li quaranto darnier en bas de la listo que riscon d’en proumié de paga soun dèime de punicioun.
Lou journau “ La Provence ” dóu 15 de mai passa, a pouscu destria li rèi de l’absenteïsme de nosto regioun, li dous mai couneigu soun d’ilùstri rivau e bons ami, li senatour Jan-Nouvè Guérini e Jan-Glaude Gaudin.
Sus li 52 semano de l’an, lou proumié Jan-Nouvè Guérini a coumpli 7 semano d’ativeta e lou segound Jan-Glaude Gaudin qu’es pamens proumié vice-presidènt dóu Senat, a fach un pau mai emé 17 semano… tout lou restant de l’an de qu’an fa chascun dins soun partit ?
À tèms mai coumplèt, l’un èro presidènt dóu Counsèu Generau di Bouco-dóu-Rose e l’autre Maire de Marsiho e vice-presidènt de la coumunauta urbano “ Marsiho-Prouvènço-Metroupòli ”, acò lis acaparavo proun, mai perqué alor ana se faire elegi senatour ? Pèr vougué que mai s’empli li pocho d’ùni diran…
Noun, s’es pas pouscu dire acò !
Cumul daura !
Lou cumul de mandat, que parié coume li fedo van à la sau vo pulèu lis ase à la grùpi, nòstis elegit arribon pas de se n’en dessepara, tant i’anavo coume un bast à l’ase e se lou volon pas perdre… e bèn d’aquéu cumul de mandat en sauvamen à l’ouro d’aro au parlamen se n’es mesura l’empielamen que chasque elegit a pouscu s’acapara.
Lis eleitour an deja fisa à Jan-Glaude Gaudin 120 annado de mandat cumula de 1965 à 2015, sènso coumpta soun role de ravi dins la pastouralo Maurel…
Lou presidènt dóu Counsèu Generau di Bouco-dóu-Rose, Jan-Nouvé Guérini, éu, emé rèn que 92 an de mandat, sèmblo, coume s’es di, un amatour dins la sciènci cumulardo.
Basto, pèr aro sian fourça de faire fisanço à soun travai achinissènt de senatour de Prouvènço… Mai soun pas soulet demié li rèi de l’absenteïsme prouvençau, de tras en tras, trouban lou senatour Bruno Gilles, secretàri despartamentau de la federacioun UMP13 e Maire di 4enc e 5enc arroundissamen de Marsiho, un ome forço atravali de-segur pèr s’esbigna dóu Senat, e un autre tambèn clafi d’obro, lou senatour Ubèrt Falco, Maire de Touloun e presidènt de la Comunauta d’agloumeracioun “ Touloun-Prouvènço-Medi-terragno ” que fai pas plagne sa peno, un cop davans lou Senat pèr faire pet sus fueio coume se dis en parla roudanenc e maritime.
Avèn aqui cinq oumenas emé de mousco sus lou nas… e la parita es pas respetado, se trobo qu’uno souleto rèino prouvençalo de l’absenteïsme, es la senatriço Samia Ghali, Meiresso di 15enc e 16enc arroundissamen de Marsiho, counseiero municipalo, counseiero coumunautàri de la coumunauta urbano “ Marsiho-Prouvènço-Metroupòli ”, presidènto dóu group soucialisto. Trimo e tiro lou lignòu tant que pòu dins li bourgado marsiheso, mai davans lou Senat pren la descampeto…
Tout acò pèr dire qu’es dificile de faire fisanço en de senatour de parado.
Quento Charto !
Fan tirassa li doursié tant que podon, li laisson en som de mes de mes, e lou penequet perduro en esperant que s’óublide lou doursié dourmènt.
Lou vesèn bèn emé lou tèste adóuta pèr l’Assemblado Naciounalo qu’es esta trasmés au Senat lou 28 de janvié 2014 toucant la ratificacioun de la Charto éuroupenco di lengo regiounalo vo minouritàri aplicado pèr l’Éuropo despièi lou 5 de nouvèmbre 1992, aquelo proupousicioun de lèi coustituciounalo que soun vote pèr lou Senat pausarié pas de proublèmo, i’a d’elegit aparaire di lengo regiounalo dins quàsi tóuti li partit pouliti, sènso óublida qu’es à l’Assemblado naciounalo que revèn lou mot de la fin, la bello counclusioun qu’an deja voutado em’ uno forto majourita.
Sufirié dounc i senatour de legi li quatre paragrafe, de faire soun vote e la ratificacioun d’aquelo Charto sarié autourisado, e pièi enfin li lengo regiounalo de Franço sarien aparado coume lis àutri lengo d’Éuropo.
Mai volon pas entèndre nosto crido… pèr éli tambèn anaren brama nosto revòuto lou dissate 24 d’óutobre à Mount-Pelié.
Bernat Giély
|
