Editouriau
dóu mes de Juin 2014
2014, ié sian …
E zóu ! deja 300 numerò de
Prouvènço d’aro…
Ouf ! 300 numerò, un bèu comte redoun pèr Prouvènço d’aro aqueste mes.
Tres cènt journau papié es pas rèn : quatre milo cinq cènt pajo au fourmat tablouïde, aperaqui trento dous milo article pèr de centèno de redatour e dessinatour, toujour tóuti benevole.
Acò fai mirando e pamens avèn dous suport que soun malaut, pas de la memo malautié : nosto lengo e lou papié journau.
Urousamen l’un coundano pas l’autre. Nosto lengo, despièi de siècle, d’ùni dison qu’es à l’artimo, mai es toujour aqui proun gaiardo e sian fisançous countinuara d’èstre escricho, publicado e difusado, pèr provo lou bon milié de redatour que se soun deja atela en aquelo obro, emai la relèvo di jouine qu’es toujour aqui.
Lou soucit es pulèu materiau… emé la mort anounciado dóu suport papié pèr l’escrituro, la fin de l’empremarié… Gutenberg es enterra pèr de bon.
Rèn que pèr nous-autre, dins lou brancan dóu journalisme veguerian la fin di letrino en ploumb emé l’arribado dis ourdinatour e la messo en pajo enfourmatico. Un virage teini que nous fuguè proufitable pèr la mestrìo dóu tèste en lengo nostro que lis estampaire encapavon plus gaire.
D’aqui entre aqui, la mai grando revoulucioun teinico se proufilavo e l’avèn bèn vist veni, l’aragno teissavo tout bèu just sa telo. Internet emé soun ciberespàci nous anavo permetre d’espandi nosto lengo dins lou mounde entié. Lou grand tresor à moustra èro lis escrit, de moulounado de libre despièi lou tèms di troubadou enjusqu’à vuei que poudian moustra pèr provo de nosto eisistènci. Aquélis oubrage, li falié numerisa, pèr acò avèn crea lou Cèntre Internaciounau de l’Ecrit en Lengo d’Oc e se sian tant lèu mes à l’obro. Ansin de milierat de libre e publicacioun eleitrounique soun aro sus internet dins la Biblioutèco La Tour Magne telecargable à gratis. Uno ajudo di grando pèr lis ensignaire e lis escoulan.
Tant soulamen, se fuguerian li primadié, aro, li libre d’aquelo meno, « i-book » que ié dison, se trobon sus de moulounado de site internet bèn mai fourtuna que nous-autre.
Anan pas se plagne, li libre en prouvençau se legisson, aro, à bóudre sus li site de mant ùni biblioutèco, de Paris enjusquo Toronto.
Mai d’acò, n’avèn lou respousc, la leituro se fai de mai en mai sus l’escran d’un ourdinatour vo d’uno tauleto numerico, plus besoun d’empremi li libre sus de papié, plus besoun d’estampaire, la sesido dóu tèste e la presentacioun se fan emé de lougiciéu aproupria.
Lou cost d’un libre en raport à soun noumbre de pajo a cabussa dins lou gaudre sènso founs de l’enfourmatico mouderno.
Mai, pecaire, bèu proumié, es li journau que se trobon coundana. S’anóuncio d’en pertout qu’internet vai tuia la prèsso papié.
La puissanço d’enfourma sus la telaragno es demultiplicado. Li journau eleitrouni counèisson pas la restricioun de l’espàci de coumunicacioun que poudié pas debourda dóu papié.
D’ùni an previst la desparicioun quàsi toutalo di journau papié devers l’an 2017 e deja dins li gràndis escolo de journalisme predison que la grando majourita di journau american cessaran d’èstre empremi d’aqui cinq an. Lou comte à rebous a parti.
Prouvènço d’aro peso pas lourd dins la balanço… fau pamens assaja de teni.
Segur li publicacioun de prèsso an perdu l’esclusiveta de la trasmessioun de l’enfourmacioun emé la radiò e la televisioun, pèr nous-autre èro un grand soulas, la lengo parlado devié countenta tout lou mounde, tant soulamen s’es estranglado dins lou pichot fenestroun de sis emessioun courteto pèr un public averti. Aro, internet recupèro tout, la paraulo, l’image e l’escrituro.
Adounc que faire ? Segur faudra faire lou pas e abandouna l’escrit-papié simbole de la culturo di generacioun vieissènto.
Tant couioun que sian, fau bèn recounèisse que lou journau vo lou libre eleitrouni facilito la recerco rapido d’enfourmacioun emé un simple mot-clau sènso besoun de tout legi. Es verai tambèn coume lou dison li néurouscientifique de l’universita de Califournìo que l’estimulacioun cerebralo engendrado pèr la counsultacioun de l’internet es mai forto qu’aquelo generado pèr la leituro tradiciounalo, mai coume coustaton tambèn qu’es dificile de saupre quau dóu papié vo de l’eleitrounico nous rènd mai inteligènt, prendren pas de risco, anan pas chanja de culturo, assajaren encaro de teni l’empento dóu Prouvènço d’aro papié emé vosto ajudo, ami leitour e redatour.
Anen avans e veiren Berro.
Bernat Giély
|
