Editouriau dóu mes de juliet e avoust 2023

Dins la prèsso

Lou papié journau s'enfioco
souto la boufarado de l'internet…

Publicacioun de prèsso

Un vèi media de coumunicacioun

Nosto istòri  de prèsso es simplo.
Après uno decenìo passado à beileja lou mesadié Prouvènço Dau !, ourgane dóu Mouvamen Parlaren se n’en sian tira en 1986 en creant un nouvèu journau independènt Prouvènço d’aro que publican tóuti li mes, aro, desempièi 1986.

Prouvènço d’aro, redegi en entié en prouvençau, es pamens publica sus papié au fourmat d’un journau sus li prèsso dóu quoutidian La Provence à Marsiho.
Sa toco proumiero es toujour la defènso de la lengo e de la culturo prouvençalo pèr lou biais d’aquéu mejan de coumunicacioun journalistique.
Ansin sènso relàmbi, meno batèsto contro li gouvèr parisen pèr uno recouneissènço óuficialo e un ensignamen coumplèt de la lengo d’oc.

La realisacioun de Prouvènço d’aro es l’obro de militant benevole, soulet l’estampaire es paga pèr lou tirage e la Posto pèr l’espedicioun.
Triman toujour bountousamen vuei sus lou numerò 400 emé encaro que mai de voio.
Lou countengut de nòstis article es bèn segur destina i legèire qu’amon la lengo istourico de Prouvènço e is estudiant que l’aprenon.

Li redatour soun libre dins la chausido e la presentacioun de sis article, basto que siegon bèn escrich en prouvençau e pas toujour trop lounguet pèr agué coume se dis aro “ un interès mediatique ”.

Atala que sian despièi quaranto-sèt an, tóuti li mes, à la messo en pajo, n’avèn vist de tóuti li coulour… Pèr countenta tout lou mounde, i’a toujour de grame à tria… segur parlan trop à la favour de nosto lengo, mai fasèn targo.

Tant soulamen, lou proublèmo es qu’aquéu mejan de coumunicacioun, aro, atrivo plus gaire, la prèsso papié es mouriboundo sa fin toutalo es previsto pèr l’an 2027.

Li jouine vuei se volon plus sali li det em’ un journau papié, tènon que de meno de telefone dins si man, lis esmarfone vo tableto. An besoun d’escran pèr vèire lou mounde. Internet es sa principalo sourso d’enfourmacioun.
Prouvènço d’aro es à mand de veni lou journau di papet e mamet encaro estaca à la leituro sus papié.
Lou Word Wide Web es arriba, emé li nouvèlli teinoulougìo, lou manjamen d’enfourmacioun en ligno a pres la plaço dóu journau papié. Es la coumunicacioun numerico. Lis image e la videò soun l’estandard d’aquelo trasfourmacioun. La jouinesso i’es mai sensiblo, pièi pèr éli la leituro sus lis escran de si tableto sarié mai facilo e subre-tout li resau souciau ié permeton d’interagi emé li nouvello atualo e d’espremi sis óupinioun persounalo dins lou mounde entié, lou ciberespàci.

Pièi l’escolo vèn à l’ajudo, vuei quàsi tóuti lis universita soun doutado d’uno plato-formo en ligno que baio acès à d’ùni cours.

Tambèn que siegue pèr carriero vo dins de salo de counferènci, de reünioun, de cours e meme à la taulo di restaurant se vèi de mai en mai d’ourdinatour, de tableto vo d’esmarfone prene plaço.

Basto, se saup aro que d’ana à la pesco sus internet es lou mejan lou mai simple e eficace pèr trouba d’enfourmacioun. I’a de liame ipertèste que permeton de multiplica rapidamen lis sourso, e tant pis se l’internaute se nègo dins touto la moulounado d’enfourmacioun… emé lis espressioun anglou-sassouno qu’espelisson à bóudre.
Aqui dedins l’usage tradiciounau de nosto lengo risco de s’escapa pèr leissa plaço i neoulougisme mal eisa de prouvençalisa dis Hardware i software dóu computer-dependent language. Tè ! pamens aurian pouscu aganta lou computer que “ coumputa ” es dins noste voucabulàri…
Noun fau s’asata i Fake News pèr la rapideta e la moulounado d’enfourmacioun que baion, pièi que fai s’aquéli nouvello soun fausso vo doutouso, es de news de qualita scientifico.

Bèn segur, i’a la gratuita de l’internet, mai pecaire lou pres d’un eisèmplàri de Prouvènço d’aro es toujour de 2,10 éurò, la reviraduro de soun pres en franc au cambiamen de mounedo en Éuropo, avèn pas jamai aumenta, fasèn pas de negòci pèr gagna d’argènt, sian tóuti dins lou militantisme pur e dur.
Lou web, éu, bèn segur a crea uno aparènci de gratuita, mai pèr li pescaire à la ligno baio pas encaro proun d’enfourmacioun en ligno sus l’aparamen de nosto lengo.

Eh ! O ! Acò es l’anamen dóu mounde, pièi de-bon verai, uno lengo es d’abord un parla, e li media capable de soun sauvamen soun d’en proumié, la radiò, la televisioun e belèu internet s’aquelo telaragno nous estoufo pas.
Adounc sara à-n-aquéli porto-voues mouderne que se faudra fisa, pèr aro assaja encaro de teni la draio, laboura emé la raio coume à passa tèms.

Lou journau papié tèn encaro coume uno meno de rituau… mai vuei encaro si journalisto militant benevole an fisanço, sabon en quau fau que s’arrambon pèr manteni soun acioun e riboun ribagno la sauvaren nosto rebello lengo d’oc.

Segur, lou numerique, aro, es dins la vido vidanto e adus un nouvèu biais de s’enfourma, un biais segur mai mouderne e coumplèt.

En Prouvènço, lou C.I.EL. d’Oc l’avié vist veni aquel essor d’internet, mai lis ajudo financiero di couleitiveta loucalo fuguèron pas proun grando pèr bèn moustra que nosto lengo èro toujour aqui presènto dins touto sa majesta.
Ansin soun acioun rèsto subre-tout dins la sauvo-gardo dis escrit papié tremuda en libre eleitrounique. Prouvènço d’aro n’aprouficho pamens, estènt que si numerò plan planet se cargon sus lou site dóu C.I.E.L. d’Oc e se perdran pas. ( cieldoc.com ).

Parié tambèn avèn noste site e poudèn assaja d’atriva de nouvèus aparaire de la lengo vers la leituro de nosto publicacioun papié.
( https : //www.prouvenco-aro.com).

Mai aro saupre s’anaren au bout dóu cabedèu, se poudren teni enjusqu’en 2027, la fin de la prèsso papié ?

I’a un tèms que trempo e un tèms que destrempo, se dis sus l’endarrié que pòu pas ana liuen !
Basto, sian toujour pas à la perfin.
Fau faire avans… tóuti coutrìo.

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com