Editouriau dóu mes de juliet e avoust 2022
MOULIN DE VÈNT
Lis àutis eouliano dóu mount Ventùri
tènon toujour emé l’alo basso…
Li venturiero, vint-e-dos eouliano, soun toujour tancado sus lou mount Ventùri pèr cassa lis aucèu e escoundre lou cant di cigalo.
amens au mes de mars de l’an passa, au Tribunau amenistratiéu de Touloun s’èro demanda de li derraba. Li nouvèu moulinié reguignèron, mai la Court amenistrativo d’apèu de Marsiho apoundeguè qu’aquéli mecanico brassejarello dóu ventoulet di cimo èron estado emplantado mentre que lou permés de coustruire èro cadu. Qu’enchau aquelo caducita, te plantèron la ferraio d’aquélis alo mouliniero e, aro, ié soun ié rèston pèr embeli la mountagno e roumpre lou triste silènci dóu païs.
Boudiéu, fau pas se plagne, lis eouliano terrèstro founciounon qu’à 25 % de si capacita, fan proun calanço, viron pèr intermitènci. Quouro fai pas un pèu d’èr s’arrèston, e quouro lou vènt boufo trop fort n’es parié, aqui, fau clavela lis alo en dangié d’esclapage.
Vire que vire, li 22 mast soun toujour aqui coume d’aubre de coucagno pèr apoulidi la campagno.
Se fau pas faire de marrit sang, la rampelado davans lou Counsèu d’Estat à Paris demando de tèms e se n’en gagno. Pecaire, an pas lou vènt d’à poupo. Parton pas lou jour qu’embaston, se pòu pas teni sesiho tant vite, soun travai es perdurable. Ansin sian toujour à l’espèro de sa decisioun maduramen pesado…
Basto ! se pòu pas perdre un parier embelissamen de la colo de Santo Ventùri, pèr acò lou Prefèt dóu Var a pres lou davans en counvidant lou proumoutour à presenta un nouvèu proujèt que permetra de regularisa, envers e contro tout, la presènci d’aquélis eouliano…
Es belèu un fach esprès, acò se dis la poulitico dóu fach acoumpli que fai toujour mirando !
Se pòu pensa que lis interès de l’Estat van de coutrìo em’ aquéli dóu proumoutour de la moulinarié venturiero.
Lou presentatour Estefane Bern peirinejo toujour la peticioun que lou Presidènt de la Republico vòu pas entèndre, pamens es bèn claro :
“ Moussu lou Presidènt de la Republico,
Avès declara, lou 14 de janvié 2020, que “ lou counsènsus sus l’eoulian es en trin de netamen s’afebli ”, voste menistre de la Transicioun ecoulougico e soulidàri denounciant davans lou Senat, lou 18 de febrié 2020, de situacioun de cou-vesibleta “ incoumprensible ” emé d’elemen de noste patrimòni. Aquéli paraulo forto, rejougnènt lou coustat que se fai sus lou terren dóu rejèt d’aquéli machino, dèu aujourd’uei s’encarna. La criso sanitàri e ecounoumico moundialo inedito que traversan ranforço aquéu besoun d’un mounde mai apasia, mai soucitous di païsage coume de la bioudiversita e dóu sèns de la despènso publico. La mountagno de Santo Ventùri - indissouciablo de Cezanne e d’àutris amiraire - es un di simbèu universau de noste païs, que n’en sias lou garant naturau. Aquéu site unique es, despièi aro 15 an, menaça pèr un proujèt de centralo de 22 eouliano de 125 mètre d’aut, situa sus de relèu perloungant sa ligno de crèto, à soulamen 10 km de sa cimo dóu Pi di Mousco.
Aquéu proujèt coumoulo tres defaut majour :
- destruirié un païsage emblematique, en bourdaduro dóu site classa que sa limito es esta fissado à la frountiero amenistrativo dóu despartamen di Bouco-dóu-Rose, sènso realo justificacioun païsagiero. Aquel ensèmble naturau e geoulougique, preserva de touto atencho endustrialo, es tambèn vesible despièi la remirablo baselico de Sant-Meissemin-La-Santo-Baumo, que sarié tambèn vitimo dóu proujèt.
- Dóu fa de soun amplour e de soun pousiciounamen à l’endedins de la zono Natura 2000, pèr sa partido nord, e en bourdaduro, pèr soun alignamen sud, li 22 eouliano que coumporton pourtarié atencho à la bioudiversita d’un espàci naturau eicepciounau en terme de floro e subre-tout d’animalun proutegi.
- Coustituïrié un precedènt jutificant d’àutri proujèt eoulian is abord dóu mount Ventùri.
Aquéu proujèt es esta amagistra à parti d’un regime perima, aquéu anteriour au classamen, en 2011, dis eouliano demié lis istalacioun suscetiblo de pourta atencho à l’envirounamen (ICPE). Aquéu regime óufris ansin pas rèn di garantido esperado en un liò sensible.
Dins aquéu countèste, vous demandan de bèn vougué suscita touto soulucioun metènt un terme à-n-aquéu proujèt qu’aurié jamai degu èstre envisaja e que coumproumetrié definitivamen li païsage e la bioudiversita dóu mount Ventùri.”
Vai, vuei lou Presidènt redoublant troubara belèu un pau mai de tèms pèr leva lis iue sus li mount clafi d’aquéli nouvèllis espingasso dis alo bastounarello.
Mancara pas de nous dire qu’aro la mountagno de Santo Ventùri mostro uno coustrucioun soulido, chasco eouliano es supourtado pèr un pèd de 1 500 touno de betoun ferraia, li palo, coustrucho en fibro de vèire, soun acaminado despièi la Chino emai la fourèst dóu mount es estado desbousigado sus 25 000 m2 pèr crea de pisto fin de permetre i semi-remorco d’acedi au chantié.
Pièi demié li Coumuno de l’endré n’i’a que soun ravido pèr la coumpensacioun financiero acourdado e, pèr pas prene part à-n-aquéu coumbat, dison qu’es de rèiro-gardo.
Escouton pas la vièio, dins soun mas en coustiero d’aquelo mountagno, rena dóu brut de quicon que crussis e cracino emai dóu lume que gisclo e s’amousso emé lou claqueja de si preso d’eleitricita, espaventant sis bèstio espaurido.
Qu’enchau, lou courrènt eleitrique passo… À bèl èime, la poulucioun sounoro e luminouso comto pas, fau pas cerca de rougno pèr se grata…
Tout acò, crèmo au lume, tant que viro fai de tour… e li gràndis alo escoutelon que li rato-penado, ansin n’en sara fini d’aquéli mousco de l’infèr.
Bernat Giély
leetchi.com (cagnote solidaire) :
Sauvons ensemble la montagne Sainte-Victoire
d’une centrale de 22 éoliennes !
|
