Editouriau dóu mes de juilet e avoust 2019

Eleicioun éuroupenco

Un que vèngue e n’i’a proun pèr bounda d’esperanço !

La darniero voutacioun

Zóu mai, lou gros pres-fa dis eleicioun éuroupenco a trouba soun acabado.
De femo e d’ome d’elèi, forço bèn emparaula, van teni sesiho, en balanço, quouro à Brussello quouro à-n-Estrasbourg pèr faire quouro lou chin, quouro lou loup.
Saupre se van buta à la rodo pèr faire respeta pèr la Franço la Charto éuroupenco di lengo regiounalo !

Tout comte fa e rebatu, demié li nouvèu deputa éuroupen elegi dins noste païs n’avèn encapa qu’un que nous pòu baia espèr, es lou Corse, Francés Alfonsi, baile de Regioun e Pople Soulidàri que participavo à l’eleicioun sus la listo Éuropo ecoulougìo menado pèr Yannick Jadot que finiguè tresenco darrié li quiéu e camiso de La Republico en Marcho e dóu Rassemblamen Naciounau.

Em’ acò se n’en mancavo de gaire de voues pèr trouba uno autro regiounalisto elegido, Lydie Massard de l’Unioun Demoucratico Bretouno. Pecaire, sus la listo Éuropo ecoulougìo n’i’aguè trege que daverèron li joio e, elo, se capitavo quatourgenco, mai se poudrié que rejougneguèsse lou parlamen éuroupen en cours de mandat.

Basto ! noste deputa-éuroupen, Francés Alfonsi, es pas un incouneigu pèr nous-autre. Recupèro un sèti qu’avié óucupa de 2009 à 2014. Nous avié reçaupu óuficialamen au Parlamen éuroupen, en nouvèmbre 2012, en sa qualita de presidènt de l’intergroupe
“ Minourita naciounalo, coumunauta naciounalo e lengo ” un groupamen de deputa que s’encargavo de tóuti li questioun de lengo regiounalo e di minourita en Éuropo. Avien de faire counèisse li proublèmo qu’eisiston sus aquélis item. N’èron à signala l’urgènci que i’avié de sauva la lengo d’oc en Franço e pèr prepausa de soulucioun voulien l’avejaire dóu mounde que militavon pèr acò.

“ Prouvènço d’aro ” èro dins la delegacioun e tre lou proumié rescontre  dins lou burèu de Francés Alfonsi, nous espliquè que i’avié quàsi pas ges de finançamen pèr li lengo regiounalo mai ratrapavo aquéu manco en s’esquihant dins lou “ Prougramo culturo ” vo lou “ Prougramo pèr l’educacioun ”.

Pièi, ço qu’a seguramen pas chanja, nous revelavo que i’avié uno fausso egalita au Parlamen, ounte 23 lengo soun óuficialo e 3 soun lengo de travai dis istitucioun éuroupenco emé priourita à l’anglés. Ansin li lengo regiounalo espandido un pau à bóudre soun d’à mita escoundudo, sarié que pèr la dificulta de li bèn destria : lou russe qu’es lengo regiounalo dins lis Estat de soun anciano Unioun es pas menaça de desparèisse, a pas besoun d’ajudo.

La lengo d’oc, au contro, es dins lou peloutoun d’eisecution, cargado d’uno coundanacioun à mort pèr lou revouluciounàri abat Grégoire, enfeisselado pèr lou republican Jùli Ferry e definitivamen badaiounado pèr lou presidènt Francés Mitterrand, fièr de soun article 2 de la Coustitucioun nivelarello, qu’impauso qu’uno lengo, emé li poun sus lis i, la lengo de la Republico es lou francés ! La Republico es toujour uno ouligarchìo, lou pople que barjaco soun patoues à que de se teisa !

Dins tout, lou deputa, Francés Alfonsi, presidènt dóu groupe “ Prougramo culturo ”, lou sabié que quouro durbiguè la sesiho óuficialo lou lendeman dins l’emicicle manquè pas de dire que nosto lengo èro abandounado, menaçado de desparèisse e prepausavo de la sousteni d’urgènci. Èro tou vist que la lengo d’oc, la proumiero lengo literàri de l’Éuropo mouderno èro à mand de s’escafa d’aquelo encountrado !

A passa d’aigo au Rose, e sus soun pont se ié danso plus sus li mémi paraulo dóu refrin.

La lengo franchimando dóu gros grum parisen es aro la souleto lengo universitàri de Franço, la casto inteleitualo l’a fa siéuno en la saupouscant d’anglicisme avans que de jargouneja li chinesarié d’un nouvel empire lenguisti moundiau. Basto, nàutri avèn toujour de barjo, en prouvençau sarra, e se vesèn encaro de tèms davans pèr sauva lou parla de famiho.

L’Éuropo après soun vote en 1992 de la Charto éuroupenco di lengo regiounalo vo minouritàti a rendu en 1993 sa ratificacioun óubligatòri pèr tóuti li nouvèus Estat membre, mai la Franço, elo, se n’en cago, s’assèto sus lou quèli de soun éuroupeanita… pretèsto soun article 2 pèr toujour que mai refusa aquelo ratificacioun que sarié pamens mai simboulico qu’autro causo. Noun, nòsti gouvernaire t’an toujour d’àutri priourita coume lou prouclamavo à bèl èime la tèsto de listo dóu partit gouvernamentau à-n-aquélis eleicioun éuroupenco. À la chut chut, bèn de garapachoun, se countènton de courdura soun linçòu pèr lou mourtuorum tant espera di lengo regiounalo.

Belèu qu’escampan d’òli pèr pas rèn, vuei, l’eleicioun de Francés Alfonsi, deputa éuroupen, nous coumoulo d’espèr.

Mai, aro, fau adeja vira la pajo, uno nouvello toumbado de mounde, li caud di partit pouliti chanjon de coucardo, mando lou le pèr gagna lis oustau coumunau. Li proumesso de moussu lou maire fan deja flòri… dins quento lengo ? Chut fasen escouto !

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com