Editouriau
dóu mes de juliet/avoust 2015
La bello proumesso…
Li lengo enfin sauvado dis aigo souprouso ?
La Charto éuroupenco di lengo regiounalo
Sai-que, lou cap de l’Estat se vai pas defauta de sa proumesso ?
La barco es pas routo, sian sauva ?
Bourrin-bourrant, tarabin-taraban, quente tarabastage, lou mes passa pèr mai entèndre parla de la ratificacioun de la Charto éuroupenco di lengo regiounalo, revelacioun espetaclouso d’uno letro adrèissado lou proumié de jun au deputa dóu Finisterro, Jan-Jaque Urvoas, pèr lou cap de l’Estat, Francés Hollande, que ié dis vougué tourna-mai ratifica aquelo Charto, coume lou garantissié dins sa proumesso n° 56 de candidat à la presidènci.
D’uno bello meloudìo, nous n’en fai aro un comte d’abouticàri.
A bèn di : “ Je souhaite que le parlement permette la ratification de la Charte ” emai de precisa : “ La voie du Congrès me paraît la plus appropriée ”.
Sai-que, aurié óublida que l’afaire es en camin, soun assemblado naciounalo a vouta lou tèste, que soumiho tranquilet au Senat despièi lou 28 de janvié 2014, à l’espèro d’uno poussiblo presentacioun à-n-un vote… mai despièi la majourita a chanja, urousamen dins aquelo meno de causo i’a pas de coulour poulitico, franc dis irredutìbli jacoubin, li senatour soun, de-principe, estaca à soun terraire, sis us, si coustumo… e sa lengo.
Tant soulamen quand li deputa e li senatour se van acampa en Coungrès, aqui sara pas tant facile, ié faudra davera uno majourita di 3/5en.
Basto ! L’afaire es esta fisa à la menistro de la Justiço, Crestiano Taubira pèr prepara un proujèt de lèi sus aquelo ratificacioun. Pèr acò ié poudèn faire fisanço, soun passat de militanto regiounalisto fai qu’es touto endicado pèr buta à la rodo d’aquelo sauvo-gardo di lengo regiounalo… Saupre aro lou tèms que fau coumta ?
Saupre tambèn s’es un nouvèu proujèt que sara presenta e qu’abandouno aquéu qu’es esta à mita vouta ?
Saupre se se vai tourna-mai demanda la permissioun au counsèu d’Estat, toujour tanca dins soun avis negatiéu, pèr mai s’entèndre dire que i’a pas de couërènci entre la Charto éuroupenco di lengo regiounalo e la Coustitucioun que dis “ le français est la langue de la République ” e pas mai ?
De tout biais, nous van dire qu’es un travai de paciènci, mai coume avèn pas uno paciènci d’ange, segur que renaren mai pèr acò lou 24 d’óutobre à Mount-Pelié.
L’Óufice publi de la lengo óucitano
Lou 27 mai passa, lou counseié regiounau d’Aquitàni, David Grosclaude, entamenè uno grèvo de la fam pèr desblouca uno situacioun creado pèr l’absènci de responso de la part di service de l’Estat à prepaus de la creacioun de l’Óufice Publi de la Lengo Óucitano ( OPLO ), pamens vouta en jun 2014 pèr lis assemblado regiounalo d’Aquitàni e de Miejour-Pirenèu. Aquel Óufice sara carga de metre en obro uno poulitico lenguistico coumuno au nivèu interregiounau. Tant soulamen s’espèro toujour la publicacioun dóu decrèt au Journau óuficiau. “ Que de deliberacioun de dos assemblado regiounalo siegon tratado emé tant pau de counsideracioun e meme emé de mesprés, es pas acetable…” d’aqui la grando moubilisacioun de soustèn à David Grosclaude: “ N’i’a proun d’èstre mespresa ”. Lou 2 de jun fuguè uno moubilisacioun generalo pèr manifesta davans lis Oustau de Regioun, Bourdèu, Clarmount, etc. Nous-autre erian presènt davans lou bastimen dóu Counsèu regiounau de Prouvènço-Aup-Costo d’Azur pèr crida nosto revòuto…
La crido e l’acioun courajouso de David Grosclaude fuguè lèu entendudo pèr lou gouvèr parisen, lou 3 de jun arribavo la letro óuficalo signado de la menistro de la Culturo Fleur Pellerin e de la menistro de l’Educacioun naciounalo, Najat Vallaud-Belkacem :
“ Nous partageons pleinement votre volonté que l’occitan puisse bénéficier rapidement d’un office public permettant de coordonner à l’échelle territoriale les politiques publiques impulsées par l’Etat comme par les collectivités locales pour la promotion de la culture et de la langue occitane, à l’exemple de ce qui existe depuis plusieurs années, sous des formes diverses, pour le breton, le basque ou l’alsacien… Aussi, nous avons le plaisir de vous informer de notre décision commune d’associer l’Etat à la création et à la gestion du futur Office public de la langue occitane… Les instructions ont été données pour que l’arrêté d’approbation de la convention constitutive du GIP OPLO soit rédigé et publié dans les meilleurs délais…”
Aqueste cop se poudra plus ana de-reculoun, l’Óufice vai èstre crea… Mai lou Counsèu regiounau de Prouvènço-Aup-Costo d’Azur a toujour pas vouta aquéu proujèt, de-coutrìo emé lis àutri regioun. Faudra dounc espera lis eleicioun pèr n’en faire pièi la demando au nouvèu presidènt…
Multiplicacioun di manifestacioun
pèr lou 24 d’óutobre
Prouvènço d’aro
Dis Aup i Pirenèu, e la man dins la man, saren lou 24 d’óutobre à Mount-Pelié, pèr apara nosto rebello lengo d’o, coume lou voulié Frederi Mistral.
Lou Couleitiéu Prouvènço
Volon pas d’aquelo man dins la man de Frederi Mistral, e manifestaran en Arle en bon prouvençau pèr garda la lengo, la bouvino, la terro, lou prouvençau à l’escolo, lis assouciacioun de culturo prouvençalo… De-verai chanjon pas de draio, contro-iston toujour lou singulié de nosto rebello lengo d’o
Lou Felibrige
Se n’en lavo li man, saup toujour pas ço que cerco d’ajusta : “la counfourmita à l’esperit mistralen ” e laisso li felibre n’en faire à sa tèsto pèr ana justamen, à l’asard Bautezard, à la manifestacioun que batejaran d’esperéli “ en counfourmita emé l’esperit de Frederi Mistral ”.
Vaqui lou tèste dins l’esperit de Ponce Pilato de la pousicioun felibrenco adóutado pèr lou Counsistori e passado davans lou Counsèu generau dóu Felibrige à la Santo-Estello de La
Roco-Brou :
“ En conséquence, le Félibrige encourage les félibres à participer aux manifestations qui leur sembleront les plus conformes à l’esprit mistralien.”
La Mantenènço de Prouvènço que publico acò a trouba coume counfourmita à l’esperit mistralen que falié ana lou 24 d’óutobre à Pelissano pèr l’inaguracioun d’uno lauso en l’ounour de Marìo-Louiso Jullien.
“ Divide ut regnes ”… L’Estat francés, éu, se freto li man… davans aquéu chaple de nosto lengo, ourganisa de man de mèstre pèr nòstis assouciacioun dins l’esperit lou mai counforme à la divisioun, mai toujour unitàri pèr baia lou bastoun pèr se faire batre.
Bernat Giély
|
