Editouriau dóu mes de juliet / avoust

Lou pèd en poulitico…

Tricìo Dupuy la candidato is eleicioun legislativo…

Prouvènço d’aro: L’avian anóuncia lou mes passa à la lèsto, Tricìo Dupuy sias estado candidato is eleicioun legislativo à Marsiho dins la segoundo circouscripcioun di Bouco-dóu-Rose, coume s’es pouscu faire tant vite?

Tricìo Dupuy: Un bel asard, estènt qu’en Prouvènço i’a rèn que de partit pouliti parisen que se partejon la biasso, s’es capita que rescountrère lou deputat éuroupen François Alfonsi que beilejo lou partit “ Regioun e Pople soulidàri ” (R&PS) pèr touto l’Éuropo e que fedèro, pèr la Franço, li regiounalisto tant de Corso que de Bretagno e bèn segur, li dóu païs d’oc. Lou deputat Alfonsi qu’es membre tambèn dóu Partitu di a Nazione Corsa e aparaire afouga pèr sa lengo corso, me prepausè de parti à la batèsto eleitouralo pèr sauva ma lengo, escoundudo e escrachado dins lou païs marsihés. Bataière pas au mitan pèr coumprene l’enjo… lou trampelin pèr baia de voues à noste parla.

P. A.: Adonc avès aceta d’èstre candidato à la deputacioun. Mai sourti de vosto draio culturalo e vous trouba d’escambarloun emé la poulitico vous a pas enfeta ?

T. D.: D’ùni podon dire qu’a fai lou saut, d’àutre qu’ai vira lou pas… Siéu toujour uno militanto mistralenco qu’assajo de segui sa pensado qu’es encaro d’atualita: — N’en vaqui un d’eisèmple pèr nòsti gràndi famiho, qu’en rendènt sis enfant estrangié à la lengo e i coustumo dóu païs, an fini per li rèndre estrangié à la Prouvènço, indiferènt au pople, que li recounèis plus e que, au jour dis eleicioun, noumo lou proumié fourestié que vèn ié proumetre la luno !
Segur poudiéu pas proumetre la luno ( que l’ai pancaro... daverado ), mai vouliéu baia de lume à nosto lengo, un prougramo que dins Marsiho de vuei es gaire coumprenable…

P. A.: Es pèr acò que sus la grando aficho plancardado dins un centenau de burèu de vote se poudié legi en lengo nostro “ Reviha lou païs marsihés ” ?

T. D.: Acò es acò, falié moustra à bèus iue vesènt que dins Marsiho se parlo encaro prouvençau. Sian pas dins li minourita vesiblo qu’agradon tant à nòsti pouliticaire de babord à tribord, adounc se fau faire vèire… L’escasènço se presentavo, ai sarra l’anguielo…

P. A.: Segur, falié de courage pèr ana à la batèsto, e li legèire de “ Prouvènço d’aro ” counèisson voste enavans e soun gaire esta sousprés, mai dins li garrouio intestino que sevisson en Prouvènço, cregnias pas l’anatèmo di puristo barricada dins soun óusservatòri óucitanoufobe?

T. D.: Acò me fau pas pòu. Fau saupre se voulèn sauva la lengo vo bèn avança sa mort emé de disputo d’à passa tèms… li garrouio prouvençalisto soun esterlo, s’es vist pèr la darniero manifestacioun de Toulouso, li vertadiés aparaire de la lengo èron 30.000 à Toulouso… li Prouvençau que franchimendejon podon s’óusserva l’embourigo dins lou campèstre arlaten, e rena tant que volon, me n’en garce pas mau. De que fan en deforo d’escupi sa bilo !

P. A.: Vous cresèn. Mai sabès ounte lou bast maco, es toujour lou mot óucitan sus voste aficho: Partit óucitan?

T. D.: — “Ah! coume acò ’s verai, que l’ase dóu coumun es toujour lou plus mau basta ! ” coume disié Frederi Mistral. Aqui mai, es la bello provo qu’en Prouvènço avèn pas sachu crea uno forço poulitico, adounc afilia au partit éuroupen “ Regioun et pople soulidàri ”, i’avié que lou Partit óucitan dins noste païs pèr me presta ajudo. Un partit dubert, emé d’ome toulerant, bèn en deforo de nòsti querèlo de clouchié, qu’acetè tant lèu de bouta sus moun aficho lou tèste en grafìo mistralenco: “ Reviha lou païs marsihés ”. Lou Poc es de bon en acord emé lou Felibrige de Frederi Mistral qu’afourtissié dins sis estatut èstre “ establi pèr garda longo-mai à la nacioun óucitano sa lengo, sis us, soun gàubi e tout ço que coustituïs soun èime naciounau ”.

P. A.: Dis Aup i Pirenèu, faudrié resta la man dins la man se voulèn sauva nosto rebello lengo d’O. Mai lou Mèstre de Maiano a pas gaire fa de poulitico e n’en faire sarié pas sourti de sa draio?

T. D.: Ai pas tóuti si paraulo en tèsto, mai renavo proun contre li pouliticaire de Paris pèr comprene que souvetavo prene lou poudé:
— Zóu! poulitiquejas, à touto zuerto, sus la fe di centralisto de Paris. Entanterin lou mounde viro: e chasque tour de rodo, dóu tèms que badas la dragèio, vous escracho quaucuno de vòstis esperanço. …e aqui mai moustra que noste pople  se laisso pau à pau tout leva, tout derraba, meme l’usage de sa lengo, de-que vendra se plagne se ié refuson meme lou dre pèr sis enfant de s’estruire sus plaço ! 
Sa cridadisso es toujour d’atualita, e moun engajamen vai dins si piado. Faire saupre au mounde qu’eisistan encaro emé noste parla.

P. A.: Avèn bèn coumprés que voste engajamen èro d’en proumier un ate militant pèr l’aparement de nosto lengo e nosto culturo e qu’uno eleicioun pariero se poudié pas gagna?

T. D.: Bèn segur, ai pas jamai pensa me retrouba sus li banc de l’Assemblado naciounalo. Ma candidaturo èro un simbèu, uno mostro, uno rampelado pèr faire saupre que dins Marsiho i’a encaro de Prouvençau afouga pèr sa lengo. Lis aficho qu’avèn empegado d’en pertout e li papafard de reclamo qu’avèn destribuï à moulounado l’an moustra. E subre-tout li 76.759 eleitour de la circouscripcioun an reçaupu ma proufessioun de fe em’ un tèste redegi en lengo nostro. Se n’en parlo encaro...

P. A.: Segur qu’acò es uno bono proupagando. I’a plus ges d’assouciacioun culturalo en Prouvènço capablo de touca 76.759 persouno en un cop. Mai pèr lou resultat de la voutacioun es un pau decevable ?

T. D.: Fau dire que se capitavo pèr lou proumié cop, 0, 25 %, 112 voues, siéu pas estado la darniero, ni dins la circouscripcioun, nimai dins lou Partit... Mai, es tout vist que li gènt an jamai agu à vouta pèr de regiounalisto, an descubert e soun resta dins lou vote utile. Lou mounde soun toujour prudènt davans quaucarèn de nouvèu que risco d’èstre pas fisable.

P. A.: Aro farés coume Frederi Mistral que s’esbignè: — Coume que vague, de l’afaire, leissère esta, e pèr toujour, la poulitico empurarello, coume aquéli rabasto que l’on abandouno en routo pèr camina plus lóugié. Anas  reprene la draiolo culturalo e pas mai ?

T. D.: Noun ! poudèn plus camina lóugié quand nosto lengo s’estripo d’escoundoun. Tant que i’aura de coumbat à mena, sarai aqui e se fau tourna ana is urno, perqué pas. Crese qu’avèn proun plourineja après nòsti poulitician pèr davera de brenigo en favour de nosto lengo, aro es tèms d’intra dins soun jo e ié faire la nico… en se presentant dins tóuti lis eleicioun rèn qu’en nosto qualita de regiounalisto aparaire de la lengo istourico de noste païs. Fau que la Charto di lengo regiounalo siegue tant lèu ratificado.

P. A.: Pèr un parèu d’an sian tranquile, mai l’obro de Tricìo Dupuy es encaro desmesurado, sian bèn plaça pèr lou saupre.

Un regiounalisto à l'Assemblado Naciounalo

Un deputat autounoumisto de Région & Peuples Solidaire intro à l'Assemblado naciounalo, es pèr lou proumié cop.
Paul Molac ( cantaire bretoun, presidènt dóu Counsèu Culturau de Bretagno ), de l'Unioun Demoucratico Bretouno, membre de la federacioun R&PS fai soun intrado au Parlamen, coume deputat dóu Mourbihan emé 52, 56 % di voues.
Li Regiounalisto, de mai, soun en prougressioun i legislativo 2012 - En 2007, li 57 candidat R&PS reculiguèron 60.970 voues; en 2012, li 35 candidat an ramena 88.704 voues. La mejano di resultat óutengu es de 5, 58 %.
Sus li 35 candidaturo, 25 passon lou 1 % e 12 despasson li 5 %.

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com