Editouriau dóu mes de janvié 2020
Manifestacioun
La fauciho de l’Estat francés
sagato li lengo regiounalo…
O, ié sian esta, manifesta davans lou menistèri de l’Educacioun naciounalo à Paris, roundina contro li decisioun dóu menistre Blanquer finocho derrabaire de l’ensignamen di lengo regiounalo emé si fàussis óupcioun e seleicioun que barragnon d’avanço la chausido dis escoulan.
Aprene un patoues ajudo pas, aporto pas gaire de poun pèr uno bono reüssido escoulàri.
Rena em’ acò es de rapepiage que lou grand mèstre de l’Educacioun rebufo ardidamen, vòu pas entèndre, fai lou sourd, paro pas l’auriho.
Ié faudrié tira lis auriho, mai acò se fai plus, fau charpa degun. Li rousto soun enebido pèr l’Estat dreissaire dóu pople.
Tant pis, envers e contro tout, sian ana crida à Paris pèr faire ausi noste mau-countentamen davans lou bastioun centralisaire de l’Educacioun aparisenquido que gouverno de sa grando autour li prouvinço luenchenco coume sa doucilo banlègo asservido e doumesticado.
Bèn segur, lou gouvèr interdiguè aquelo manifestacioun.
Li maufatan, foro la lèi, que sian avèn pas coumprés l’esplico d’aquelo interdicioun mandado en francés sarra.
Basto ! avèn pas courba l’esquino, ié sian ana e venian pas faire lou genoueit nimai l’esquineto…
Tant soulamen, pecaire, aquéu dissate 30 de nouvèmbre, de-matin à pouncho d’aubo la fourtaresso dóu menistèri de l’Educacioun naciounalo èro enciéuclado pèr de bataioun de gendarmo vo poulicié pourtant lis armo di chivalié mouderne, falié pas aproucha.
Dins quento lengo regiounalo que se demandèsse l’autourisacioun de passa, èro refusado autamen pèr aplanta li sacamand.
Basto, coume à passa tèms, a faugu se vira vers la glèiso, lou planet de la catedralo procho d’aqui s’endevenguè lou liò de rassemblamen, mai tant lèu fuguè dificile de se n’aproucha sènso moustra pato blanco. La chourmo de Prouvènço d’aro aguerian pas pausa nosto saco pèr sòu, fin de n’entira nosto bandiero qu’adeja un poulicié nous vouguè arresta vo empacha d’ana sus la plaço. Sourtiguerian lèu la bandeirolo pèr la desplega davans éu e bèn moustra que i’avié rèn de marrit dins nosto bassaco. Soun desroulamen que moustrè lou bèu dessin caricaturau de Gezou, lou deguè rassegura emai de-segur aguèsse pas coumprés lou simbèu presentant aquelo Franço de la diversita que bouto li lengo regiounalo is escoubiho.
Ansin se sian retrouba au bèu mitan de nòsti counfraire alsacian, basque, bretoun, catalan, corse, óucitan… Aperaqui 800 persouno, emé de persounalita poulitico de trìo pèr mena batèsto, li deputa Francés Alfonsi e Pau Molac que manquèron pas de prene la paraulo pèr ramenta lou perqué de nosto revendicacioun.
Pièi pèr arresta de trepeja sus aquéu parvis de glèiso, s’es aganta la proumiero carriero pèr defila, tóuti à-de-rèng, e bèn moustra lou noumbre de participant emé si drapèu e pancarto enaurant sa lengo regiounalo. Malurousamen èro uno androuno li gendarmo en bout barravon lou passage.
Lou grand gèste segnouriau dóu Menistèri de l’Educacioun naciounalo fuguè tambèn, pèr uno finto caludo, de bèn vougué reçaupre cinq persouno. Lou Jan-Michèu Blanquer èro en vacanço, li souto-fifre de service, bèn educa, ié rapourtaran li prepaus, tant de cop bassaca… E acò fa, dira qu’es à l’escouto…
Lou bèu simbèu fin finalo fuguè quouro d’ùni representant de chasco lengo regiounalo s’estalouirèron pèr sòu à faire li mort davans la Franço sourciero emé sa fauciho dins li man pèr sagata li lengo regiounalo.
L’après-dina se tenguè encaro un ataié de rescontre e d’escàmbi entre li noumbróusis assouciacioun pèr mena batèsto de coutrìo, emai lou deputa bretoun Pau Molac avisè que travaiavo sus un proujèt de lèi pèr li lengo regiounalo.
Bernat Giély
|
