Editouriau
dóu mes de janvié 2015
Fin di celebracioun…
Teni l’eisservo dins la draio de Frederi Mistral !
Mistralejado
Sus lou lindau d’aquel an nòu poudèn pas óublida lou tant grand estrambord de l’an passa pèr counmemoura lou centenàri de la despartido de Frederi Mistral. La grand messo es esta dicho à Maiano autant pèr l’anniversàri de sa mort qu’aquéu de sa neissènço, mai es tout de long de l’annado que li celebracioun se faguèron d’en pertout dins l’alegresso.
Aquel entousiasme lou devènt, bèn proumié, au Felibrige qu’a prepara counscienciousamen l’ourganisacioun di festiveta, e à soun capoulié, Jaque Mouttet qu’a pas manca d’alen pèr se capita toujour presènt en tout liò pèr ounoura lou Mèstre.
Aquelo counmemouracioun a de-segur permés de faire mai que mai counèisse Frederi Mistral, soun obro e subre-tout la lengo qu’emplegavo, patrimòni culturau de la Franço que fau preserva.
Li pelot dóu Menistèri de la Culturo e lis àutis autourita coustituïdo que se soun assoucia à-n-aquelo celebracioun poudran plus aro s’escoundre darrié lou vèu de la descouneissènço. Lou parla de Frederi Mistral se vai perdre dins l’indiferènci di Gouvèr assassin que volon toujour pas de la Charto éuroupenco di lengo regiounalo e que fan tirassa tóuti li refourmeto que permetrien d’ensigna decentamen nosto lengo.
Rempelado
Nosto lengo crebo, poudèn plus countunia de faire la fèsto, fau lèu lèu parti en batèsto.
2015 sara tourna-mai uno annado d’eleicioun : lis eleicioun cantounalo que s’endevènon eleicioun despartamentalo e lis eleicioun regiounalo dins si nouvèu terraire.
Sara dounc l’escasènço de se faire entèndre dins nosto lengo proche lis elegit de touto ligo.
De se radassa pèr ana plourineja devers li candidat sarié mai faire pertus dins l’aigo, auren sa benedicioun e si proumesso bèn ensacado, enfeisselado, que se poudran pièi pas escapa un cop l’eleicioun gagnado.
Souto aquélis engajamen, i’a un tèms que trempo e un tèms que destrempon, lou sabèn proun.
Pèr acò, nous fau, aro encaro, moustra que sian pas qu’uno pougnado de fraire gardian, e davala en troupo pèr carriero crida nosto revòuto pèr sauva riboun-ribagno nosto rebello lengo d’oc, fidèu à la rampelado de Frederi Mistral, en proufichant se n’es de besoun dóu benefice d’aquelo annado de counmemouracioun qu’a fa flòri.
Fau pamens pas plega lis iue davans la Mantenènço óupiniastro de nòsti divisioun. Li garrouio seculàri de grafìo davalon belèu de sa cimo, mai lou chaplage nouvèu d’uno lengo unico e unenco en tros de petoulo pèr garda sa rato pourcioun à la sousto dins soun recantoun, acò gounflo lou desfèci pèr la glòri unenco de quàuquis esplumassa que pavounejon dins sa sciènci unico à-n-éli.
Aquéu fanatisme que vai tuia nosto lengo s’esperlongo tambèn en guerro d’apelecioun countourroulado… e lou grand mot que l’ome óublido es l’Óucitanìo, que pamens Frederi Mistral meteguè dins lis estatut dóu Felibrige de soun vivènt.
Chut lou fau pas dire ! L’Óucitanìo vai belèu reprene de service, es lou journau Midi-Libre que l’anóuncio après agué prepausa à si legèire lou vote pèr lou futur noum de la nouvello regioun qu’embessouno Lengadò-Roussihoun e Miejour-Pirenèu :
“ Vous avez choisi, pour votre future région, le nom d’Occitanie”.
Lou quoutidian de Mount-Pelié avié prepausa un desenau de noum poussible. Li voues, bèn segur, se soun esparpaiado e darrié l’Óucitanìo es “ Sud de France ” e “ Pays d’Oc ” qu’empourtèron li meiour sufrage pèr aquéu batisme.
Pèr aro, l’Óucitanìo es gagnanto !
Em’ acò, auren Vilo-Novo d’Avignoun en Óucitanìo e Avignoun en PACA. D’Óucitan à Bèu-Caire e de Pacalian à Tarascoun. La ligno de demarcacioun sara di mai bello à Trenco-Taio. Faudra metre un óusservatòri sus li segounau dóu Rose.
Basto ! d’entre eici e eila n’en passara d’aigo.
Bernat Giély
|
