Editouriau
dóu mes de janvié 2013
Internet e televisioun ...
L'aveni de nosto lengo passo pèr l'audiouvisau
Bono annado, bèn granado ... pèr tóuti.
Pèr bèn coumença l’annado leissaren la marrido grano.
La graniho di bèlli proumesso de l’an passa pèr la recouneissènço de nosto lengo, facho pèr li granihaire de la poulitico… un bèu pantai pèr se desendourmi !
Emai la fin dóu mounde, bèn calculado sus un calendié d’à passa tèms, es remandado à l’an pebre, parié pèr la mort de nosto lengo, tant de cop anounciado pèr li proufèto rapai… e li rapaço que la volon, vuei, desoussa, reüssiran pas à la chapla… dis Aup i Pirenèu e la man dins la man, coume lou voulié Frederi Mistral, l’apararen riboun-ribagno nosto rebello lengo d’oc e cantaren encaro nosto fe dins l’an que vèn, davans l’escran de la proumiero televisioun en lengo nostro que vai espeli aquest an.
Vaqui lou dedu …
Lou cinema
Li 6 e 7 de desèmbre passa, li proufessiounau dóu cinema, de la videò e de la televisioun se soun recampa à Salias de Biarn à l’aflat de l’assouciacioun “ Accents du Sud ” pèr li “ Rescontre sus l’audiouvisuau e lou cinema óucitan ”.
Fuguè l’óucasioun de faire lou poun sus la situacioun de la creacioun cinematougrafico en lengo d’oc e, malurousamen, de coustata que sian court e coustié pèr lou noumbre de realisacioun dins aquéu doumaine.
Lou proudutour toulousan Estefane Valentin manquè pas de dire que la prouducioun èro maigro.
À l’ouro d’aro se coumtarié 96 filme proufessiounau en lengo d’oc.
Demai se chifro de centenat de doucumen etnougrafi, repourtage vo emissioun de televisioun.
En acò se pòu apoundre de milierat de filme amatour o escoulàri, ço que, pamens, fai pas forço.
Aquéli filme se veson pèr passage di mai rare dins de salo d’Art e d’Assai e quàsi jamai à la televisioun. Quand France 3 s’esquicho pèr n’en moustra un, trobo lou biais de lou trauquiha.
Acò di, se coustatè un manco d’estruturo. L’inmènso espandido dóu païs d’oc fai que lou mounde que s’óucupon de l’audiouvisau en lengo nostro se rescontron gaire.
Adounc la FIMOC ( Federacioun internaciounalo di media óucitan ) se vai carga, tant lèu, de crea un annuàri de la tiero dis atour, proudutour, difusour, e di soucieta de doublage coume dis ourganisaire de festenau.
L’autre proublèmo maje es lou manco de creatour. Lou finançamen n’es pas soulet l’encauso. Se pènso trop souvènt qu’un tournage en lengo nostro pòu pas faire un vertadié filme e es sènso valour.
Autambèn pèr chanja li mentalita e coungreia de voucacioun s’es prepausa, aro, de crea un councours de scenariot pèr encouraja li voucacioun.
Pèr ço que toco la prouducioun, l’ajudo legalo fai tiro-molo, saupre s’es dins lou bugèt dóu Cèntre Naciounau de cinematougrafìo vo s’es dins la bourso de l’aparamen di lengo regiounalo dóu menistèri de la culturo que fau trouba li sòu. Ço que faguè dire au Counseié regiounau David Grosclaude que sian dins la “ discriminacioun passivo ”… “ Pèr ço que pertoco l’óucitan, fau tout enventa, fau enventa un mounde audiouvisuau propre ”.
Aqui l’espèr es grand …
Rèsto la difusioun e la proumoucioun di filme. La souleto espousicioun caminarello de filme en lengo nostro, “ lanterna digital ”, es finançado pèr la Generalita de Catalougno, bono-di la lèi de 2010 sus l’óucitan en Vau d’Aran. Un partenariat emé lis ourganisaire poudrié permetre sa presentacioun dins tóuti li festenau d’Óucitanìo.
Mai l’assouciacioun “ Accents du Sud ” a tambèn dins l’idèio de metre en plaço un vertadié festenau dóu cinema óucitan tre 2014.
Pas proun d’aquélis ourientacioun claro pèr douna plaço à nosto lengo dins lou mounde dóu cinema, aquélis rescontre avien pèr toco la creacioun d’uno televisioun 100 % en lengo d’oc.
La televisioun
Adounc la proumiero televisioun óucitano vai naisse en setèmbre 2013.
Uno televisioun numerico, ouebe-tv, que sara uno filialo de Brezhoweb que difuso en Bretagno. Permetra lou partage di mejan teini, di coumpetènci, di fourmacioun, etc.
La croumpo di dre de doublage d’un filme que se fai pèr territòri, la Franço, ansin se pagara qu’un cop.
De mai e subre-tout, la cadeno bretouno qu’a, deja, la recouneissènço dóu CSA, permetra à la cadeno óucitano d’óuteni tant lèu li mémi autourisacioun.
Pèr li sòu, es-à-dire 127.000 éurò pèr le creacioun e aperaqui 400.000 éurò pèr an de founciounamen, acò sèmblo poussible que dis lou Counseié regiounau David Grosclaude.
Segur qu’aquel óutis es aro di mai necite pèr sauva nosto lengo, la rèndre à la vido vidanto, la desvouloupa e l’ensigna… uno missioun que d’ùni couleitivita territourialo an deja decida de coumpli.
Li cineasto prouvençau qu’èron presènt à-n-aquel acamp auran belèu de mau pèr faire boulega lis instànci regiounalo, mai butaren tóuti à la rodo.
Es de bon vèire que pèr li jouine d’aro, l’internet e la televisioun soun li nouvélli carriero de la vilo e de la vido, es aqui que la lengo de soun païs dèu èstre presènto.
Dicod’Oc
Uno autro realisacioun majo pèr l’aveni, es aquelo dóu Coungrès permanènt de la lengo óucitano que vèn de renouva soun site internet en presentant dicod’Òc, lou multidiciounàri francés-óucitan en ligno.
Aquelo istitucioun scientifico qu’a pèr toco la countribucioun à la vitalita e au desvouloupamen de la lengo d’oc en travaiant à sa couneissènço e sa coudificacioun bono-di la prouducioun d’óutis pertoucant mant un aspèt de la lengo ( leissicougrafìo, leissicoulougìo, terminoulougìo, neoulougìo, founoulougìo, grafìo, gramatico e toupounimìo ). Demié si principe d’acioun atau se trobo l’unita e la diversita de la lengo, l’estabilita, la representativeta di regioun lenguistico dóu territòri d’Oc, la coulegialita di decisioun e la difusioun de l’enfourmacioun.
Lou Coungrès recampo lis istitucioun e federacioun istourico de l’aparamen de la lengo d’oc de tres Estat Éuroupen, Franço, Espagno e Itàli.
Adounc soun site www.locongres.org óufris vuei, à gratis, aquel óutil remirable, lou multidiciounàri francés-óucitan que crouso sièis diciounàri de referènci ( aquéli cuerbon quatre varianto de l’óucitan) emé si 130.000 intrado. Es tambèn uno porto duberto i ressourço lenguistico majo : la toupounimìo ( Top’Òc ), la terminoulougìo ( Term’Òc ), uno bibliougrafìo lenguistico coumplèto ( Bibli’Òc ) e bèn lèu, la counjuguesoun de Verb’Òc, un counjugaire autoumati.
Pas proun de trouba acò sus lou site dóu Coungrès, tre aro li poudès telecarga e utilisa sus voste esmartfone vo tauleto numerico.
L’espèr es mai aqui…
Bernat Giély
Festenau videò e cinema
Dins aquelo draio de l’audiouvisuau, pourtaire d’aveni pèr nosto lengo, lou tresen Festenau videò e cinema “ Rescontre ” de Sant-Gervàsi dins lou Gard vèn moustra qu’es toujour à l’oubrage e counvido tóuti li debutant dins lou filmage videò e tóuti li videasto counfierma à presenta sis obro à Sant-Gervàsi : ficioun, doucumentàri, repourtage, couleitage, clipe musicau, animacioun, etc.
Un soulet imperatiéu : parla de la vido en païs d'oc, dubert i prouducioun en lengo d'oc, mai tambèn dins d'àutri lengo fourmat DVD o AVI de dos à quinge minuto.
Iscripcioun à gratis.
Entre-signe au 06 85 45 12 95.
ass.rayonsdoc@orange.fr
2, carriero Pasteur, 30320 Saint-Gervasy
Aquéu tresen Festenau videò e cinema “ Rescontre ” se debanara lou divèndre 1ié e lou dissate 2 de febrié au fougau souciou-culturau de Sant-Gervàsi.
Court metrage videò e long metrage cinema en païs e lengo d'oc saran à l'ounour e guierdouna coume se dèu.
Animacioun, mostro e vèndo de libre e DVD tout de lon dóu rescontre. |
