Editouriau dóu mes de febrié 2022
ENQUÈSTO
De bescomte pèr faussa lou noumbre de gènt
que parlon sa lengo regiounalo
La resulto d’uno grando enquèsto sus li regioun vèn d’èstre publicado. Es estado realisado pèr lou journau televisa de TF1 de Marìo-Soufìo Lacarrau, bono-di Sociovision.
Soun titre es “ L’unita dins la diversita: li regioun, uno passioun franceso ”.
E se dis, tout d’uno, “ L’óusservatòri di regioun, proumiero vago ”, pèr precisa coume s’es facho aquelo enquèsto sus tout lou territòri francés : dóu 8 au 22 de nouvèmbre de 2021 em’ un questiounàri autou-amenistra en ligno d’uno durado de 25 minuto. Se soun adreissa à-n-un chantihoun de 3 500 persouno, representatiéu de la poupulacioun franceso ajado de 18 à 74 an ( sus de critèri d’age, de sèisse, de regioun, de taio d’agloumeracioun, de CSP ).
Pecaire, countènt de sa metoudoulougìo, an pas vist qu’emé sa limito d’age anavon tout faussa dins soun chapitre “ Geougrafìo di lengo regiounalo ” en baiant un percentage di gènt que parlon uno lengo regiounalo. Li qu’an mai de 74 an soun li mai noumbrous à countunia de parla la lengo dóu brès, lou patoues de la famiho, valié miés pas li coumta, es ço qu’an fa. L’escuso es belèu qu’aquéli vièi barrulon pas sus internet e n’i’a gaire en ligno pèr li questiouna…
Basto, l’entrèvo s’es pamens facho emé tres milo cinq cènt persouno pèr presenta aquelo enquèsto toucant li 13 regioun franceso.
E de s’avisa en entrouducioun que soulamen 16 % di Francés counèisson lou noumbre eisat de regioun, la maje part dison encaro 22, soun de noustalgique, resta tanca sus l’ancian decoupage territouriau. Un decoupage qu’aurié servi de rèn senoun d’afebli l’identita di regioun que pènson li tres quart di Francés.
L’estacamen dóu mounde à sa Regioun es pas grand estènt que quàsi la mita di Francés soun pas capable de cita lou noum dóu Presidènt de sa Regioun.
“ La regioun es is uei di Francés bèn mai qu’un afaire amenistratiéu : es uno realita i dimensioun multiplo : afeitivo, councrèto, naturalo, istourico, edounisto…” belèu bèn !
E de i’ana emé soun chapitre “ 01 La regioun : uno passioun franceso ”.
Lou sentimen d’estacamen à sa regioun sarié de 37 % au toutau, mai en Prouvènço-Aup-costo d’Azur es de 45 % e en Óucitanìo de 43 %. Sian li meiour emé li Bretoun.
Bèn mai encaro emé lou sentimen de bèn-èstre ounte abitan 87 % au toutau, e 91 % que siegue en Prouvènço-Aup-costo d’Azur o Óucitanìo.
Parié pèr lou sentimen de fierta de nosto regioun 83 % au toutau e 88 % que siegue en Prouvènço-Aup-costo d’Azur o Óucitanìo.
Cabussan emé la questioun : “ Siéu en favour de l’independènci de ma regioun ”, 33 % au toutau soun favourable, mai soulamen 30 % en Prouvènço-Aup-costo d’Azur e 27 % en Óucitanìo. Dóu vièi pople fièr e libre, la Coupo es vuejo, “ toumbara nosto nacioun ” ?
Empacho pas la bono responso pèr “ Siéu estaca au patrimòni naturau de ma regioun ”, 88 % au toutau, e 93 % en Óucitanìo, coume 92 % en Prouvènço-Aup-Costo d’Azur.
Demié li valour assouciado à la regioun, lou patrimòni e li tradicioun vènon en priourita.
Proutegi e proumóure li tradicioun regiounalo es un sujèt federatour pèr 94 % di gènt, e bèn mai en Óucitanìo 97 %, o en Prouvènço-Aup-Costo d’Azur 96 %.
Tant soulamen es lou Festenau de Cano qu’es intra dins la maje tradicioun de Prouvènço pèr 38 % di gènt, avans lou Carnava de Niço 21 %, lou Festenau d’Avignoun 19 %, la Fèsto dóu citroun de Mentoun 13 %, la Feria de Nime 10 % o la Fièro i santoun de Marsiho 5 %.
Pèr “ Siéu estaca au patrimòni culturau e istourique de ma regioun ”, n’i’a 85 % au toutau, emé 89 % en Prouvènço-Aup-Costo d’Azur e 86 % en Óucitanìo.
Se leissan la gastrounoumìo emé soun role clau dins la vitalita di tradicioun regiounalo coume l’estacamen à la culturo dóu vin, n’arriban à-n-uno autro clau, aquelo dóu Tresor dóu Felibrige, nosto lengo.
Aqui s’afourtis “ La Republico a pas eradica li lengo regiounalo : uno majourita di Francés se n’interèsson ”.
Questioun clau : “ Parlas uno lengo regiounalo ? ”, 54 % di Francés parlon uno lengo regiounalo vo soun interessa pèr n’aprendre uno.
Malurousamen dins la geougrafìo di lengo regiounalo, lou percentage d’aquéli que parlon uno lengo regiounalo es que de 18 % pèr la poupulacioun toutalo, emé 23 % en Óucitanìo, e 18 % en Prouvènço-Aup-Costo d’Azur. De tout biais, aquéu percentage es faus, fourçadamen menimisa li mai de 74 an an pas agu dre de parla.
E pamens lou percentage d’aquéli que parlon pas uno lengo regiounalo mai qu’amarien bèn la parla es de 35 % au toutau, siegue 39 % en Óucitanìo e 38 % en Prouvènço-Aup-Costo d’Azur .
La bono questioun toujour d’atualita : “ Trobe daumage que la pratico di lengo regiounalo siegue pas mai encourajado ”, 61 % au toutau lou dison e 64 % que siegue en Prouvènço-Aup-costo d’Azur o Óucitanìo.
Rèsto l’acènt regiounau que 60 % di gènt ié soun estaca, emé 77 % en Óucitanìo e 78 % en Prouvènço-Aup-Costo d’Azur .
L’enquèsto countùnio emé “ La regioun : uno passioun franceso ”.
À la demando : “ Quento soun pèr vous li dos plus poulìdi regioun de Franço ? ”: La Bretagno 35 % e la Prouvènço-Aup-costo d’Azur 32 %. L’Óucitanìo es tresenco emé 23 %.
I’a pamens “ Li poun feble à amelioura : rèndre lou poudé i regioun ”.
Pèr li Francés, la descentralisacioun di poudé es insufisènto 88 % au toutau. En Prouvènço-Aup-costo d’Azur es 89 % e en Óucitanìo 87 % que lou dison.
D’aqui entre aqui, fau baia mai de poudé poulitique i regioun, 83 % di gènt soun d’acord emé 83 % en Óucitanìo e 82 % en Prouvènço-Aup-Costo d’Azur.
Se noto pièi lis efèt negatiéu de la desendus-trialisacioun emai l’insufisanço di service public emé l’inegau acès à la santa e l’inegau acès à l’emplé.
Un atous pamens recouneigu pèr 67 % di Francés es la qualita de vido en regioun. Encaro mai en Óucitanìo 81 % e en Prouvènço-Aup-Costo d’Azur 76 %.
E, pièi, de n’en veni à recounèisse que la regioun proutegis soun patrimòni pèr 74 % de la poupulatioun toutalo, siegue en Óucitanìo 80 % e en Prouvènço-Aup-Costo d’Azur 71 %.
N’es parié pèr la prouteicioun de la naturo.
Li menaço sarien lou pres de l’inmoubilié qu’aumento d’en pertout e rènd dificile de trouba un loujamen. Em’ acò la preóucupacioun majouro dins li regioun touristico es lou cost de la vido, mentre que l’urbanisacioun s’endevèn uno menaço pèr li païsage.
Percéupudo tambèn coume uno menaço sarié l’inmigracioun pèr 53 % de la poupulacioun toutalo, siegue en Prouvènço-Aup-costo d’Azur 57 % e Óucitanìo 48 %.
Darniero menaço, es la migracioun di Parisen dins li regioun que fai pòu à 48 % di gènt, 58 % en Prouvènço-Aup-costo d’Azur e 55 % en Óucitanìo.
Dins tout, aquéli qu’an pas envejo d’ana dins uno autro regioun represènton 68 % de la poupulacioun toutalo, encaro mai en Prouvènço-Aup-costo d’Azur 79 % e Óucitanìo 78 %.
De gènt fièr de sa regioun, se redis, n’i’a 81 % en Óucitanìo e 76 % en Prouvènço-Aup-Costo d’Azur.
Li regioun ounte li gènt se veirien bèn viéure soun la Nouvello Aquitàni 22 %, l’Óucitanìo 19 % e la Prouvènço-Aup-costo d’Azur 19 %.
Enfin s’avisan que dins li regioun, la qualita de vido primo sus lou dinamisme ecounoumique, valènt-à-dire la naturo, lou calme e la tranquileta.
E de counclure emé lou role moutour di regioun dins l’unita de la Franço : es ansin uno vertadiero passioun pèr li regioun qu’aquelo enquèsto met à jour, uno passioun qu’adus i Francés ensemblamen de bounur individuau e de bonur couleitiéu. La regioun es uno sourso de fierta i tradicioun vivaço, uno identita pousitivo, acueiènto, duberto sus lou mounde, uno façoun de se proujeta pousitivamen dins la soucieta franceso, un maioun souple vers la descentralisacioun que permet de trouba de soulucioun i criso ecounoumico, e la poussibleta de desvouloupa d’ecousistèmo dinamique vers uno ecounoumìo à forto douminanto loucalo e ecoulougico.
Vaqui la fin “ Lou futur sara regiounau, o sara pas ”.
Adounc, basto, anan pas repepia sus noste regiounalisme, la chifro 13 di regioun d’aro porto bonur, malurousamen lou comte di lengo regiounalo vai pas em’ aquéu di regioun amenistrativo, sian luen d’abulo e sèr de rèn d’ana demanda au mounde aparisenqui quente patoues parlon souto sa tourre Eiffel emé la baragno d’interdicioun facho i mai de 74 an en perdo de memòri.
Au bout dóu comte, lou futur de nosto lengo regiounalo lou podon pas devina à l’avanço emé si calcul mesquin. La respelido e seguro.
Nautre en plen jour
voulèn parla toujour
La lengo dóu Miejour
Bernat Giély
|
