Editouriau
dóu mes de febrié 2017
Ensignamen nostre…
L’Óufice Publi de la Lengo Óucitano a capita…
L’Óufice Publi pèr la Lengo Óucitano a fa mirando. A capita de presenta e faire aceta uno counvencioun cadre pèr l’ensignamen de la lengo dins li cinq acadèmi di dos regioun, Nouvello Aquitàni e Óucitanìo.
Aquelo counvencioun asseguro l’ourganisacioun emai la countinuëta d’aquel ensignamen e la priéureta es baiado à la coustrucioun o au ranfourçamen de cursus coumplèt. De mai es bèn precisa que se fara “ à d’ouràri nourmau ” e plus en deforo coume se fasié trop souvènt. La toco es bèn segur de groussi, tant lou noumbre d’escoulan qu’an un nivèu B1 ( diplomo éuroupen CECRL ) qu’aquéu di bilengue. Emé li Calandretas pèr aro aquelo chifro avesino li 10 000 escoulan dins li dos regioun. Un pache es previst emé lou resau Canopé pèr la prouducioun de materiau pedagougi que lou CAP’OC de Pau n’es partenàri e vai presta ajudo pèr uno mountado rapido en puissanço. Pèr lou proumié cop, un libre de Matematico nivèu CP sara destribuï à gratis dins li site bilengue.
En clar, enjusqu’aro la reformo di coulège autourisavo qu’uno ouro d’óucitan en 5enco, aro la counvencioun marco bèn que i’aura dos ouro pèr un ensignamen óupciounau e dos ouro e miejo en LV2. Es previst encaro que l’afetacioun di proufessour certifica d’óucitan sara limitado s’es poussible à dous establimen, pèr evita de li faire courre d’en pertout.
Pèr li poste d’ensignaire, se fara d’estùdi regulié d’evaluacioun di besoun e pèr palia au manque de proufessour, se cercara pèr lou biais d’enquisto de l’acadèmi li que podon ensigna l’óucitan.
Dins l’ensignamen superiour es bèn di que l’Estat dèu viha à de fourmacioun en óucitan dins li diferènti filiero universitàri. Aqui de bourso “ ensigna ” se baiaran is estudiant que voudran deveni proufessour.
Uno carto dis ensignamen sara facho tóuti lis an pèr l’Óufice Publi pèr la Lengo Óucitano via un Óusservatòri de la lengo óucitano. Se ié veira lou noumbre d’elèvo fourma, li couourdounado dis establimen, la resulto dis evaluacioun, lou taus de penetracioun di fourmacioun en óucitan pèr raport au restant. L’Óufice Publi pèr la Lengo Óucitano sara tambèn carga de difusi l’enfourmacioun sus lis ofro d’ensignamen, de prevèire de campagno d’enfourmacioun dins li diferènts establimen escoulàri.
Lou tèste d’aquelo counvencioun es dounc esta signa e aprouva lou 26 de janvié 2017, pèr la Menistro de l’Educacioun Naciounalo, Najat Vallaud-Belkacem, la presidènto de la Regioun Óucitanìo, Carolo Delga, lou presidènt de la Regioun Nouvello Aquitàni, Alan Rousset, e la presidènto de l’Óufice Publi pèr la Lengo Óucitano, Charlino Claveau-Abbadie.
De bon verai l’Óufice Publi pèr la Lengo Óucitano, crea lou 23 de setèmbre 2015 a pas perdu soun tèms, sis acioun s’escrivon dins l’encastre d’uno poulitico partenarialo duberto is istitucioun publico interessado pèr sa demarcho : - Trasmessioun de l’óucitan, - ranfourçamen dóu desvouloupamen di media d’espressioun óucitano, - soucialisacioun de l’óucitan, ranfourçamen de la culturo óucitano, - recerco e óutis sus l’óucitan…
Emé un budgèt de 2 milioun d’éurò fai avans dins la draio de si davancié pèr sauva li lengo regiounalo coume l’Óufice publi de la lengo bretouno, l’Óufice publi de la lengo basco o l’Óufice publi de la lengo e la culturo alsaciano.
Tout vai charmant, mai de qu’espèro la Prouvènço ?
Li presidènt de nosto regioun Prouvènço-Aup-Costo d’Azur podon chanja, mai un cop l’un un cop l’autre refuson toujour d’ana dins aquelo draio… An crento !
Pecaire, soun pas toujour fautible… quand ausisson que demié lis aparaire de la lengo que sian, lis un cridon isso, lis autre cridon molo !
Lou doursié que pourtavon creacioun d’un Óufice publi de la lengo prouvençalo fuguè mounta, fai uno estirado de tèms d’acò… Presenta à d’ùnis elegit favourable baiavo d’espèr, mai la mesenteligènci dis aparaire de noste parla faguè tout cabussa… Tout acò toumbè en douliho, nous rèsto li rouino… trouban dins lis escombre qu’aquel Óufice avié pèr óujeitiéu la definicioun e la messo en obro dis acioun à entre-prene pèr la proumoucioun e lou desvouloupamen de la lengo prouvençalo dins tóuti li doumaine de la vido soucialo e publico…
Segur, aro es acaba, la Regioun Prouvènço-Aup-Costo d’Azur recounèis e soustèn “ la diversita di lengo regiounalo praticado sus soun territòri ” coume es esta vouta lou 24 de jun 2016. Faudrié dounc un óufice publi pèr lou nissard, un pèr lou gavot e un pèr lou prouvençau roudanen o maritime.
Fau pamens pas se plagne auren dins gaire un “ Óusservatòri de la lengo e de la Culturo prouvençalo ” au Mas Sant-Pau de Chivau-Blanc, bono-di l’enavans dóu Couleitiéu Prouvènço que vai èstre bèn ajuda pèr la Regioun. Auren de n’en tourna parla.
Basto, pèr aro, osco pèr l’Óufice Publi pèr la Lengo Óucitano !
Bernat Giély
|
