Editouriau dóu mes de Febrié

La part bello de la diversita

Lou presidènt de la Regioun, Michèu Vauzelle es ana baia soun avejaire à noste journau counfraire "Coumboscuro" lou "periodico della minoranza provenzale in Italia".

Lengo e païs langues régionales part entière de la diversité
Vaqui ço que noste baile de la Regioun dis en francés, asata en prouvençau :

La Coustitucioun franceso recounèis enfin despièi l’an passa que li lengo regiounalo apartènon au patrimòni de noste païs.
Es uno avançado sènso precedènt pèr tóuti li ciéutadan de noste païs e que n’en fau èstre fièr. L’unita de la Franço à laqualo sian tóuti forço estaca emplico pas pèr autant que tóuti li diversita culturalo, qu’an countribuï e countribuïsson encaro à basti noste oustau coumun, deguèsson èstre marginalisado vèire ignourado. La grandour de la Franço e soun aurado dèvon, en efèt, forço à-n-aquelo richesso culturalo multiformo e is identita particulieramen forto que marcon durablamen la vido quoutidiano e l’istòri de tóuti li territòri que coumpauson noste païs.
Li lengo regiounalo coustituïsson uno dis espressioun li mai vivènto, li mai enventivo e li mai generouso d’aquelo culturo partejado e d’aquelo coumunauta de vido e de destin.
Dins nosto bello e meravihouso regioun Prouvènço Aup Costo d’Azur, la lengo prouvençalo coustituïs un dis elemen d’aquelo identita e aquelo noucioun de viéure ensèn pèr tóuti lis abitant de nosto regioun.
Es adounc essenciau que nosto lengo prouvençalo siegue toutalamen recouneigudo coume uno di coumpausanto à part entiero d’aquelo diversita culturalo tant preciouso pèr noste païs e tóuti sis abitant.
Afierma aquelo counvicioun es en rèn countraditòri emé li principe republican que nous n’en referèn de façoun permanènto e countinuo, e que noun cèsson de guida nosto acioun.
Mai lou proumié respèt que dèvon is abitant de nosto regioun coustituïs justamen à afierma noste estacamen couleitiéu à la pluralita e à la diversita de sis espressioun.
Touto culturo pretendumen counsensualo devendrié en fa qu’uno culturo unifourmo e sènso vertadier ancrage dins l’istòri, la vido quoutidiano e l’imaginàri dis abitant de nosto regioun e de noste païs.
Es perqué tène de reafierma moun soustèn lou mai toutau is acioun engajado vo à veni dóu mouvamen assouciatiéu que se moubiliso pèr que la lengo prouvençalo siegue recouneigudo coume uno lengo regiounalo au meme titre que lis autro.
Sachès que poudrés toujour coumta sus l’engajamen à vòsti coustat de la regioun Prouvènço Aup Costo d’Azur car devèn èstre li proumié defensour de la culturo que nous an lega li generacioun que nous an precedi e qu’avèn lou devé imperious de trasmetre à tóuti li generacioun que nous seguiran.

A bèn parla, mai de qu’a di ?

Es pamens clar, vòu que la langue prouvençalo siguèsse recouneigudo coume lengo regiounalo.

Sai-que, es presidènt de la regioun Prouvènço Aup Costo d’Azur, adounc perqué coumenço pas pèr faire vouta pèr si counseié regiounau la recouneissènço d’aquelo lengo coume lengo óuficialo de la regioun, emplegado à egalita emé lou franchimand ?

Nous baiara, de-segur, d’esplico judiciouso avans que de se tourna faire elegi.