 |
Editouriau
dóu mes
de febrié
Lou
coumtage di gènt se fai, aro, à chapoutarié
e sènso relàmbi.
Es quicon de perpetuau
— Quau viéu en coumtant, viéu en cantant,
dis un prouvèrbi nostre. Sian encanta.
|
Basto, cresian
que li registro d’estat civil, l’iscripcioun sus li listo eleitouralo,
lou pagamen de la tausso founciero, de la tausso d’abitacioun, de
la tausso pèr leva lis escoubiho emai de l’impost sus lou
revengut bastavon pèr saupre quau restavo dins uno coumuno. E bèn!
noun, n’i’a que passon pèr maio, s’esquihon dins
la poupulacioun à l’escoundudo, vo simplamen an la boulegueto,
van d’uno coumuno l’autro, d’amount, d’en-bas, dóu
levant au couchant de l’Éuropo. Adounc n’en fau faire
la rampelado.
Enjusqu’à
l’an 1999, à chasque recensamen chascun devié rampli
soun papié d’identita pèr respondre à touto
meno de questioun, ço que permetié de tira mai que mai
d’estatistico sus lou biais de viéure di gènt...
Emé l’avantage, dins d’endré, de saupre quente
lengage lou mounde parlavon.
Au bout dóu comte, li gouvernaire se soun avisa que la moubilisacioun
dis enquistaire se fasié trop lourdo e carivèndo. Pèr
acò s’es decidi que d’aro en lai, li coumuno que recampon
pas mai de 10.000 amo, sarien recensado pèr roulamen un cop tóuti
li 5 an e que lis àutri vilo de grando taio, lou sarien chasco
annado, tant soulamen rèn que sus un escapouloun de 8 dóu
cènt de la poupulacioun.
Acò bastarié pèr devina lou noumbre toutau di gènt
dóu païs e soun evoulucioun permanènto.
En Prouvènço dins li 76 coumuno de mai de 10.000 estajan,
i’a vue prouvençau sus cènt que soun aganta tóuti
lis an. Li 177 pichòti coumuno, quant-à-n-éli,
passon à la grasiho aqueste mes, lou tèms di cinq an abena.
Touto aquelo arimetico, sèmblo de comte de ma grand la borgno,
pamens au quicha de la clau, l’Estitut Naciounau de l’Estatistico
e dis Estùdi Ecounoumi, vèn de troumpeta la resulto: sian
aro 4 milioun 660 milo prouvençau e gagnant tóuti lis
an, aperaqui 33.000 abitant. Sabèn pas s’es de nistoun vo
de vacancié que demoron, mai la Regioun es eisemplàri
pèr soun dinamisme demougrafi.
À ié bèn regarda, es li Regioun de l’en-bas
de la Franço, Aquitàni, Miejour-Pirenèu, Lengadò-Roussihoun
e Prouvènço-Aup-Costo d’Azur que crèisson
forço.
Sai-que, i’aurié mai de pistachié encò nostre
que dins lou Nord pèr faire tant de pichot vo bèn es nosto
lengo que baio de forço e atrivo de mounde.
Fau pas pantaia, lis estatitician dins soun lengage farlambica parlon
d’eliotroupisme.
Lou
soulèu me fai canta. Li gènt se vènon souleia,
acagnarda dins lou Miejour, à passa tèms se disié
que venien se caufa à la chaminèio dóu Rèi
Renié. Li nouvèu rèi de la Regioun an plus ges
de fougau pèr faire un fiò que se pousquèsse, dins
soun palais regiounau, coumpara au soulèu.
Dins tout, Prouvènço fai flòri. Benefician d’uno
póulido flouresoun demougrafico coume se dis vuei. 33.000 prouvençau
de mai tóuti lis an, adounc coume sian dins li comte… poudèn
chifra. Quant fau d’ensignaire de mai, tóuti lis an, pèr
aprene nosto lengo à-n-aquéu nouvèu mounde ? Vau
miés dire sebo, acò es de figo d’un autre panié
!
L’an que vèn, se sian pas mai, saren pas mens.
Bernat
Giély
|
