Editouriau dóu mes de febrié La lengo meiralo di valado oulimpico Aqueste mes, se van debana li Jo Oulimpi d’ivèr à Turin.

Turin es rèn que lou cap-liò de la prouvinço dóu Piemount, tóuti li coumpeticioun espourtivo se tendran à l’entour dins li valado e mountagno piemounteso, sus aquelo esquino dis Aup que desseparo l’estat francés de l’estat italian.

Un païs, uno lengo

Di dos man d’aquéli mountagno se parlo la memo lengo, lou gavot, lou piemountés, lou prouvençau, la lengo d’oc, l’óucitan segound lou biais de pensa de chascun manco pas de sinounime pèr dire parié. La lengo nostro s’es pas leissado embarra dins de frountiero, en mai d’acò s’es pas recouneigudo en Franço, l’es óuficialamen en Itàli emé la publicacioun de la lèi dóu 15 de desèmbre de 1999 n° 482.
Pas proun d’acò, à l’aflat de la Presidènto de la Regioun Piemount, Mercedes Bresso es à mand de se crea uno « Associazione di rete dei comuni dell’area occitana, franco-provenzale e walser pèr l’attuazione de la legge 482/99 ».
Tout acò, pèr ramenta que lis esquiaire, e li patinaire internaciounau se van bandi dins un relarg ounte se parlo nosto lengo.
D’aqui entre aqui, dins la grando tradicioun oulimpico, se déurié emplega la lengo dóu païs qu’aculis li Jo. Fuguè lou cas à Barcelouno ounte lou catalan troubè sa plaço.
En Piemount faudrié que siegue parié.

La Chambro d’Oc

Lis assouciacioun de defènso de la lengo emé la Chambro d’Oc de l’encountrado anèron bèn-segur revendica aquéu dre. Li peticioun de touto meno plóuguèron. Lou coumitat d’ourganisacioun di Jo ressoulavo li pèd.
La darniero iniciativo venguè de dous gascoun, Miquéu Dantin e Fabrici Beinissan, qu’emé sa caravano trans-óucitano anèron pourta lou message sus plaço en troubant tout plen de mounde en camin pèr li sousteni.
Daverèron un rendès-vous e, acoumpagna dis óucitanisto di valado e de la Chambro d’Oc, fuguèron reçaupu. Li baile de la Prouvinço de Turin aduguèron soun soustèn, mai lou travai dis aparaire de la lengo avié camina dins la tèsto di ourganisaire, estènt que quouro ié faguèron vesita l’Atrium, lou grand liò de rescontre di Jo Oulimpi s’avisèron qu’uno mostro en plaço pèr li vesitaire èro presentado en italian, francés, anglés e óucitan.
Fuguè pièi lou vice-presidènt de l’ourganisacioun di Jo Oulimpi d’Ivèr que prepausè de faire uno enfourmacioun à la Prèsso que dèu manda aperaqui 10.000 journalisto dóu mounde entié.
Lou doursié sara alesti pèr la Chambro d’Oc.
E coume sian pas en Franço ounte tout se fai à l’esquicho-anchoio, es uno ajudo de 160.000 éurò que fuguè atribuïdo à la Chambro d’Oc pèr realisa aquéu plan de coumunicacioun.
L’enfourmacioun se fara dins li cinq endré principau dóu relarg di Jo.
Un vintenau de jouine fourma pèr la Chambro d’Oc saran presènt pèr enfourma e espandi li doucumen toucant la lengo e la culturo d’oc.

Lou voucabulàri de la nèu

Li journalisto poudran tambèn escouta nosto lengo. Auran un leissique dóu voucabulàri de la mountagno e de la nèu, emai uno broucaduro quadri-lengo em’ un cederom que lis avisara que soun dins un païs de lengo d’oc.
D’espousicioun, d’espetacle musicau e tiatrau se faran dins la zono oulimpico e d’ùni coumuno recebran lou drapèu óucitan à pausa óuficialamen pèr lou tèms di Jo.
Soubravo l’inne óuficiau à faire clanti, mai sian pas uno nacioun recouneigudo, pamens se dis que nosto cansoun «Se canto » troubarié uno pichoto plaço dins la ceremounié de duberturo di Jo.
Osco pèr la Chambro d’Oc.
Urousamen que li Jo Oulimpi d’Ivèr se debanon sus lou bon pendis dis Aup, sarien esta de nostre coustat, sarian encaro à ploura lou pan que manjan.