Editouriau
dóu mes de désembre
"La Charto interregiounalo"
L’an s’acabo, se fasèn
dins l’age, mai sabèn pas s’avèn fa de l’avans
pèr apara nosto lengo en 2011.
La Charto éuroupenco di lengo regiounalo e minouritàri
es toujour pas ratificado pèr la Franço, l’article
2 de la Coustitucioun fai toujour d’empacho emé lou francés
souleto lengo de la Republico, e li proujèt de lèi pèr
la recouneissènço di lengo regiounalo s’amoulounon,
tè tu pèr lou Senat, tè tu pèr l’Assemblado
naciounalo, mai jamai trobon l’intrado en debat que menarié à-n-un
vote.
Sian toujour tanca, nòsti deputat
e senatour rivalison pamens d’audaci pèr escriéure
sa proupousicioun de lèi, bèn despariero dóu partit
vesin, se jogo sus li mot, li cercon, abstra, afirmatiéu, counsacra,
counvenable, espressiéu, estrange, incoumprensible, incountestable,
judicious, pitouresc, prestigious, sourneirous, vague, vuege…
Alignon bèn li voucable farlambica, en sachant bèn qu’auran
pas de lis articula de bouco, soun tèste es pas fa pèr
passa en sesiho dins lis acamp deserti de sis assemblado autourouso,
es soucamen reialamen pourgi à la discutido di militant aparaire
di lengo regiounalo pèr ié faire passa lou tèms.
Bedigas que sian, levan la crèsto, s’escaufan la niéuleto,
cercan de pountiho, pèr barjaca sus aquel item clafi de resoun
traucado.
D’entre eici e eila passo d’aigo au Rose.
Quand avèn tout acaba… fasèn lou branle di gramaci
:...- voste proujèt es aro un tèste de qualita e que si baso
courrespoundon bèn i preoucupacioun qu’espremissèn
regulieramen.
E aqui plus rèn se passo, senoun lou tèms.
D’escampo, n’en vos n’en vaqui : la sessioun parlementàri
es acabado e un cop li vacanço finido, bèn-segur, se capito
de sujèt mai serious à trata, li lengo regiounalo podon espera… laisson
courna l’auro, entre que la criso couvo.
Basto! I’aura toujour un treboulèri amenistratiéu
vo financié pèr cassa d’escuso e óublida lou
restant…
Se boulegan pas mai, n’en sara toujour ansin… pèr
acò, fau tre aro se prepara à davala pèr carriero
crida nosto revòuto.
Tóuti lis aparaire di lengo regiounalo soun counvida à manifesta
lou dissate 31 de mars.
La manifestacioun pèr la defènso de la lengo d’oc es
previsto à 2 ouro de l’après-dina à Toulouso.
I’anaren tóuti…
Acò di, i’a pamens uno avançado
au nivèu de nòsti regioun. Lou Counsèu regiounau
d’Aquitàni dins sa sesiho dóu 24 d’óutobre
2011 a presenta e signa uno “Charto de cououperacioun interregiounalo
e trasfrountaliero de desvouloupamen de la lengo óucitano vo lengo
d’oc”.
Dins l’encastre de la poulitico lenguistico publico councertado
en favour de la lengo d’oc en Aquitàni, la Regioun entènd
se douta d’óutis de messo en obro dis óurientacioun
estrategico, à la fes au nivèu regiounau, interregiounau
e trasfrountalié, bouto 200.000 éurò sus la taulo
e demando is àutri regioun de faire parié, valènt-à-dire
la Regioun Auvergno, la Regioun Lengadò-Roussihoun, la Regioun Lemou-sin,
Miejour-Pirenèu, Peitau-Charènto, Prouvènço-Aup-Costo
d’Azur, Generalitat de Catalunya, Regione Piemonte, Conselh generau
d’Aran.
L’enjo d’aquéu partenariat
es double: countribuï à la trasmessioun de la lengo d’oc
i generacioun futuro e participa à la proumoucioun universalo
de la divesita lenguistico e culturalo.
La toco es claro sus l’ensignamen, la fourmacioun e la trasmessioun
famihalo e soucialo. La vesibileta publico de la lengo. Li media e endustrìo
culturalo. L’espetacle vivènt. Lis óutis lenguisti.
L’evoulucioun di poulitico lenguistico. Lou patrimòni. La
couourdinacioun e lou seguit de l’acioun. Li counvencioun annualo
e pluriannualo.
Li Regioun Miejour-Pirenèu, Lengadò-Roussihoun e Rose-Aup
soun adeja d’acord emé la Regioun Aquitàni.
Malurousamen van trouba uno pèiro sus soun camin d’Arle… Lou
presidènt dóu Counsèu regiounau de Prouvènço-Aup-Costo
d’Azur rèsto dins soun cantoun, nosto rebello lengo d’O
dis Aup i Pirenèu, que cantavo Frederi Mistral, es pas soun afaire.
Li lengo de clouchié ié fan mestié. Chapla, divisa
e regna es la deviso dis emperaire d’Arle. Ave imperator, morituri
te salutant!
Segur, faudra mai rena pèr counvincre lou poudestat, senoun lou
faudra, un bèu jour d’eleicioun, foro-bandi sènso plancho.
Dins tout, acabaren pèr uno bono
nouvello.
Après lou CREDD’O, es la Federacioun foulclourico mediterragno
e l’Unioun prouvençalo pèr lou biais d’uno Unioun
culturalo prouvençalo 2013 que demandon d’èstre presènt
pèr l’annado de Marsiho, capitalo de la culturo.
Acò baiè idèio au quoutidian "La Provence" de
pausa la questioun à si legèire : — Les traditions
provençales doivent-elles occuper une part importante dans la programmation
de Marseille 2013 ?.
Lou soundage n’espantè mai d’un.
Oui = 83 % — Non = 16 %
Li Marsihés soun, de-bon, toujour estaca à soun identita
prouvençalo.
|
