Editouriau dóu mes de decèmbre 2016

Avis dóu Counsèu d’Estat
Significacioun binàri de la crècho de Nouvè

Ounte faren la crècho

Dins lou numerò de janvié se sian pausa la questioun : “ ounte faren la crècho ? ” Lou Counsèu d’Estat, emé 17 juge, l’anavo decida en founcioun dóu code de la laïcita Article 28 de la lèi dóu 9 de desèmbre 1905 que dis “es enebi, à l’aveni, d’auboura vo d’apausa aucun signe vo emblèmo religious sus li mounumen public o en quènte emplaçamen publi que siegue», emé uno reservo facho pamens pèr lis edifice que servon au culte, dis emplaçamen funeràri, di museon o dis espousicioun.

Adounc aquéli Counseié d’Estat se soun pas amusa i countour, avien besoun de tèms pèr se decida. Poudié pas dura rèn que de Nouvè à Sant Estève, caminèron au pas dóu biòu de la crècho, plan planet, mai ié soun arriba, tenguèron sesiho e faguèron prouado en un bon desenau de mes… En Franço, i’avié pas de questioun mai impourtanto à l’ouro d’aro emé l’aprocho d’aquéli fèsto calendalo que poudrien metre lou fiò is estoupo e empura lou gavèu.

Enfuscado, la nouvello gardo pretouriano crechoufobo, l’Assouciacioun di Maire de Franço, la Federacioun despartamentalo di libre pensaire de Sèino-e-Marno e la Federacioun de la libre pensado de Vendèio, roundinavon à bèl èime e fasien targo à la crècho en coumuno.

Lou Counsèu d’Estat, pecaire se troubavo d’escambarloun emé li decisioun de justiço que fuguèron adeja presso, la Court amenistrativo d’apèu de Paris avié di qu’uno crècho de Nouvè “ dèu èstre regardado coume aguènt lou caratère d’un emblèmo religious ” entre que la Court d’apèu de Nanto disié tout lou countràri en jujant que la Crècho de Nouvè “ revestis pas la naturo d’un signe vo emblèmo religious ”.
Cerca de pountiho d’un coustat e faire pesouiet de l’autre èro gaire poussible.
L’escapatòri èro de trouba un autre eisèmple juridiciounau e l’agantèron.
Finocho, lou rapourtaire publi coumencè de dire que la lèi de 1905 e lou principe de néutralita “interdison pas pèr principe l’istalacioun d’uno crècho sus lou doumaine publi, mai unicamen l’istalacioun d’uno crècho que manifestarié un gèste de recouneissènço d’un culte ”. Acò crèmo au lume, que ? Lou falié metre sus lou candelié, es fa, se ié coumpren ni tourre ni bourre, mai fai avança li causo. La magistrato Aurelìo Bretonneau a pièi trouba la bono definicioun de la crècho, es “ un óujèt miste, pourtaire d’uno pluralita de significacioun, ço que nous sèmblo la souleto aprocho ounèsto ”. Perqué pas ! Mai de precisa qu’aquelo naturo misto de la crècho, tout au cop óujèt culturau e simbole religious, empachavo de i’aplica un “ interdit legislatif de facture binaire ”. Restan palafica !
Li juge, éli, an bèn coumprés lou message que se balanço entre lou cultuau e lou culturau e se peso emé lou principau e l’assessòri pèr equilibra uno laïcita republicano.
La decisioun se prenguè en ramentant d’abord la lèi de 1905 e pièi pèr pas roumpre en plen troubèron lou biais de se n’esvarta doucetamen.

E mèfi de bèn coumprene !

Pèr aplica la règlo i crècho de Nouvè lou Counsèu d’Estat revèlo qu’uno crècho pòu agué plusiour significacioun. Presènto un caratère religious; mai es tambèn un elemen de decouracioun e ilustracioun qu’acoumpagnon tradiciounalamen li fèsto de fin d’annado, sènso significacioun particuliero.
Tenènt comte d’aquéli diferènti significacioun poussiblo, lou Counsèu d’Estat jujo que l’istalacioun tempouràri d’uno crècho de Nouvé pèr uno persouno publico dins un emplaçamen public es legalo se presènto un caratère culturau, artistique o festiéu, mai noun s’espremis la recouneissènço d’un culte o marco uno preferènci religiouso.

Pèr determina s’uno talo istalacioun presènto un caratère culturau, artistique o festiéu, o au countràri espremis la recouneissènço d’un culte o d’uno preferènci religiouso, lou Counsèu d’Estat jujo que counvèn de teni comte:
- dóu countèste de l’istalacioun: aquéu d’aqui dèu èstre desprouvesi de tout elemen de prouselitisme ;
- di coundicioun particuliero d’istalacioun ;
- de l’eisistènci o de l’absènci d’usage loucau ;
- dóu liò de l’istalacioun.

Comte tengu de l’impourtanço d’aquéu darnier elemen, lou Counsèu d’Estat preciso que i’a liò de destingui, demié li liò, entre li bastimen publi que soun lou sèti d’uno couleitiveta publico o d’un service public e lis àutris emplaçamen publi.

Ansin :
- dins l’encencho di bastimen publi, sèti d’uno couleitiveta publico o d’un service publi, l’istalacioun d’uno crècho pèr uno persouno publico es pas en principe counforme au principe de néutralita, aleva se de circoustànci particuliero permeton de ié recounèisse un caratère culturau, artistique o festiéu ;
- en revenge, dins lis àutris emplaçamen publi, en rasoun dóu caratère festiéu dis istalacioun ligado i fèsto de fin d’annado, l’istalacioun d’uno crècho pèr uno persouno publico counèis pas lou principe de néutralita, aleva se coustituïs un ate de prouselitisme o de revendicacioun d’uno óupinioun religiouso.

Avèn coumprés !

Li grand camèu de noste païs soun arriba à la crècho emé si presènt, fau plega l’esquino davans sa bello gourverno e soun interdicioun mantengudo eiceptat dins quàuqui cas.

Basto ! li fefibre que fan de councours de crècho pèr Nouvè van devé apoundre aquéu tèste dins soun reglamen…
E pecaire, Micoulau Saboly, lou celèbre Mountelen, qu’èro lou chantre inmourtau de la Nativeta divino quouro la glèiso boutè à la modo li crècho de Nouvè, fasènt flòri en terro dóu Miejour, se vai revira dins soun cros.
De Crècho, Frederi Mistral, dins sis memòri, n’en revèlo qu’èro la passioun de Roumanille :
Mai lou mai que n’i’avié èro de Roumaniho, alor dins tout soun bon e dóu quau Sainte-Beuve saludavo li Crècho coume digno de Klopstock.
E se saup que lou Jóusè Roumanille manquè pas d’escriéure un pouème Li Crècho qu’acabavo fisançous:

E li maire trefouliguèron!
E li Crècho se durbiguèron
Pertout ounte passè l’ange dis enfantoun!

Mai d’aquéu tèms i’avié pas de Counsèu d’Estat pèr ié dire qu’acò èro de "prouselitisme".

Bon ! en Prouvènço avèn pas de se plagne, se prenèn lou tèste à la letro: “ l’eisistènci d’usage loucau ” toucant la crècho es averado. La Crècho prouvençalo e li santoun fan partido di tradicioun loucalo que ié poudèn pega “ culturalo, artistico e festivo ” pèr respeta lou voucabulàri de la bèn-estanço amenistrativo.
Adounc li Municipe prouvençau que fan sa crècho, au tèms de Nouvè, poudran bèn countunia d’aculi li Rèi dins sa coumuno…
Pèr lis autre, ié faudra justifica lou perqué faire la crècho. L’estacamen di gènt à-n-aquelo tradicioun, comto pas, soun pas libre de pensa… la poupulasso aqui à pas soun mot à dire… la soulo chausido judiciouso e acetablo que comto es aquelo benesido pèr lou Counsèu d’Estat.

E bèn endraia coume es, sènso cerca d’alleluia pèr Pasco, deman nous vai leva li sant dóu calendié e li fèsto religiouso crestiano pèr impausa que mai aquelo libro pensado despoutico qu’es vuei de modo.…

.

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com