Editouriau dóu mes de abriéu 2024

Autounoumìo

Es assegura : i’aura pas mai
d’óuficialeta pèr la lengo corso

Zóu mai l’autounoumìo

Ié sian, un estatut d’autounoumìo sarié recouneigu pèr la Corso, aquel acord s’es fa dins la niue dóu dilun 11 au dimars 12 de mars passa.

Es lou menistre de l’Interiour, Gerald Darmanin, que n’en faguè l’anóuncio, pèr pas dire la publicita de sa grando bounta.

Segur i’a dequé se perdre dins soun charabiat pèr lausenja ço qu’es toujour qu’un proujèt que se dis : d’escrituro coustituciounalo e prevèi la recouneissènço d’un estat d’autounoumìo au sen de la Republico. Sarié lou fru d’un large counsensus que respeito “ li ligno roujo fissado pèr lou presidènt de la Republico e iéu-meme ”, afourtis lou Darmanin.

Emé la ligno roujo es lou pople corse que s’escamoto en “ coumunauta culturalo ” e se foro-bandis un “ estat de residènt ” pèr bèn precisa “ I’a pas de separacioun de la Corso emé la Republico ”.

Basto ! Gile Simeoni, presidènt dóu counsèu eisecutiéu de Corso e Laurènt Marcangeli, deputa de Corso-dóu-Sud aurien trouba un acord emé lou menistre sus lou proumié alinea dóu tèste : “ La presènto escrituro coustituciounalo prevèi la recouneissènço d’un estat d’autounoumìo pèr la Corso au sen de la Republico, que tèn comte de sis interès propre, liga à soun insularita mieterrano, à sa coumunauta istourico, lenguistico, culturalo aguènt desvouloupa un liame singulié à sa terro ”.

Tant soulamen “ li lèi e reglamen podon faire l’óujèt d’asatacioun ” pèr acò Gerald Darmanin apound adeja qu’uno lèi vendra coumpleta aquelo escrituro coustituciounalo e “ dira dins quente doumaine la Corso poudra fissa li règlo nourmativo, que siegon legislativo o reglamentàri ”.

Tout vai bèn, lou presidènt Simeoni es countènt d’aquéu “ pas decisiéu ” e se felicito que “ lou principe d’un poudé de naturo legislativo, soumés à-n-un countourrole dóu Counsèu coustituciounau, siegue vuei claramen menciouna… L’espandido e li moudalita d’eisercice d’aquéu poudé legislatiéu relevaran de la lèi ourganico… Dirai, qu’aqueste sèr, sian en miejo-finalo, rèsto à gagna la miejo-finalo e la finalo”. Pèr éu, acò se jogo coume dins un estade em’ un baloun.”

Pamens lou baile dis independentisto à l’Assemblado corso, Jan-Martin Mondoloni a de crento pèr sousteni lou tèste que se prepauso : “ Rèste determina à pensa que l’acord dóu poudé legislatiéu es un proublèmo, mai vau pas endoursa lou role de bourrèu dóu proucessus ”.

Bèn segur n’i’a que soun “ farouchamen ” óupausa à ço que se baièsse un poudé legislatiéu à la couleitiveta corso, lou senatour de Corso-dóu-Sud, Jan-Jaque Panunzi, lou dis coume tambèn lou presidènt dóu Senat, Gerard Larcher : “ la lèi dèu resta au Parlamen ”.

Tant pis ! pèr aro la delegacioun d’elegit corse e lou menistre de l’Interiour soun bèn d’acord, ajuston si flahuto pèr l’atribucioun d’un poudé reglamentàri e legislatiéu propre à l’assemblado corso.

Tout lou mounde es ravi, Jan-Cristòu Angelini, lou presidènt dóu groupe “ Avanzemu ” à l’Assemblado corso se dis satisfa, que “ jamai s’es ana autant liuen en cinquanto annado de dificulta e de counflit entre la Corso e l’Estat dins la redacioun d’un tèste coumun e l’afiermacioun d’uno revisioun coustituciounalo de l’eisistènci d’un pople, d’uno lengo, de dre couleitiéu ”.

Pau-Fèlis Benedetti, lou baile dóu partit independentisto “ Core in Fronte ”, éu, ié vai d’aise “ dins l’atèndo dóu restant veni ”, e baio d’esplico “ fau countunia de buta à la rodo e tourna mai afourti nosto voulounta, subre-tout, nous, lis independentisto que counsideran qu’es uno pichoto estapo.”

Segur i’a encaro d’obro, Gile Simeoni l’óublido pas : “ Es un travai d’uno talo coumpleissita, que fau subre-mounta lis oustacle juridique, coustituciounau, poulitique, un à cha un. La toco èro d’óuteni uno escrituro coustituciounalo que permete d’ana vers un estatut d’autounoumìo que n’en noto lou principe, lis elemen e atribut essenciau. Es fa ”. Verai, mai es esta fourça d’apoundre que “ rèsto dous oustacle decisiéu : un debat e un vote de l’assemblado de Corso, pièi i’aura à counvincre li deputa e li senatour, ço qu’es un travai counsiderable ”.

Vaqui adeja l’entravo : demanda l’avis d’un fube de mounde pèr n’arriba à l’aplicacioun óuficialo d’un estatut d’autounoumìo.

D’efèt, “ L’escrituro coustituciounalo prevèi que lis eleitour iscri sus li listo eleitouralo de Corso siegon counsulta sus aquéu proujèt  ”. Pièi après counsultacioun de l’Assemblado Corso “ lou presidènt de la Republico, Enmanuèl Macron, engajara, quouro voudra, la reformo coustituciounalo ”. Mai d’abord faudra faire vouta lou tèste pèr li dos chambro dóu Parlamen à Paris. Quand li membre dóu Senat e de l’Assemblado naciounalo auran majouritarimen aceta aquéu tèste, bastara pièi que siegue adóuta pèr lou Coungrès à la majourita di tres pèr cinq.

Acò ’s coucagno, pèr i’ana de l’avans, lou valènt menistre de l’Interiour, Moussu Darmanin i’es ana de rassegura soun mounde : “ Avèn avança vers l’autounoumìo ”, e prenguè d’ausset pèr apoundre qu’aqui “ i’a pas de separacioun de la Corso emé la Republico ”.

Sai-que, li Corse dèvon resta republican ?

Es coumplica, estènt que l’ome dis que dins aquelo isclo “ I’a pas de noucioun de pople ” mai rèn que de “ coumunauta culturalo ”…

Ansin, à bono ensigno, douno de giscle à l’afaire en disènt qu’ “ evoco ni lou pople, ni l’estatut de residènt, ni la cou-óuficialeta de la lengo ”. Tout acò es pas corse?

Segur, se, aro, “ la Corso es dóutado d’un estatut d’autounoumìo au sen de la Republico que tèn comte de sis interès propre ”, la lengo corso a pas ges d’interès…

L’argumen brandi pèr lis óupousant à la cou-óuficileta de la lengo corso, es l’inutileta d’aprene vo de parla uno lengo que soun noumbre de loucutour es redu e desclinant.

Couneissèn la musico, n’es parié pèr tóuti li lengo regiounalo de Franço que nòsti bèu gouvernaire volon pas vertadieramen apara e refuson toujour de ratifica la Charto éuroupenco di lengo regiounalo.

Es belèu la ligno roujo dóu presidènt de la Republico, fau s’espremi coume éu en francés e en anglés.

Bouto ! Avèn que d’espera, vuei, que la Corso agantèsse uno vertadiero autounoumìo pèr sauva sa lengo e brandiren la nostro.

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com