 |
|
Editouriau
dóu
mes de Abriéu
Anen Oc
Emé li dos manifestacioun de Carcassouno e
de Besiès, Anen Oc a moustra que de milié de persouno
se poudien moubilisa, dins l’unita, à l’entour de
quàuqui revendicacioun simplo pèr faire viéure
la lengo.
Despièi aquéli moubilisacioun de causo càmbion.
Mai de couleitiveta se bouton à faire quicon pèr la lengo.
D’ùni an quitamen mes en plaço de prougramo de
desvouloupamen.
Pamens ço que caup dins la Crido Anen, Oc ! pèr la lengo
d’oc ! es pas encaro realita. Devèn encaro e toujour countùnia
la pressioun, subre-tout de cap à l’Estat qu’a pas
boulega enjusco aro.
|
Anen
Oc ! a decidi de tourna
bandi la moubilisacioun pèr manifesta à la fin de 2009
en gardant li cinq revendicacioun de baso countengudo dins la Crido.
Manifesta amassa pèr se retrouba e dire publicamen ço que
voulèn es bèn, mai basto pas. Es necite de prepara coume
fau la moubilisacioun de 2009 e sousca i mejan de miés faire passa,
tre aro, lou message nostre dins la soucieta, à tóuti li
nivèu.
De mai, lou Gouvèr a proumés uno iniciativo e belèu
un debat parlementàri sus la questioun di lengo. Devèn faire
noste proun pèr que la proumesso siegue tengudo e pèr prepara
nosto participacioun à-n-aqéu aquéu debat.
Nous fau mai que jamai defini nosto ambicioun pèr la lengo d’oc.
Mai que jamai devèn faire passa lou message que la lengo es l’afaire
de tóuti, de l’ensèn de la soucieta.
Fau que pertout siegue pausado la questioun de la lengo coume un elemen
coustitutiéu dóu desvouloupamen que voulèn pèr
noste païs.
Pèr acò faire, Anen Oc ! counvido tóuti li que volon
faire viéure nosto lengo à-n-un grand debat que se fara lou
27 d’abriéu à Besiés, de 8 ouro e miejo à 17
ouro, au Palais di Congrès, 24, avengudo Camille Sant-Saens de Beziés.
Aquéu debat sara à l’encop uno refleissioun sus lou
biais de pourta li revendicacioun nostro e tambèn sus lou biais
d’ourganisa la moubilisacioun pèr que la manifestacioun de
2009 siguèsse uno grando capitado.
Cadun sènt qu’avançan, mai cadun saup que pas rèn
es gagna. I’a encaro un fum de mounde que nous fau ana vèire,
d’argumen que fau tourna dire, de proupousicioun que fau cambia en
acioun. La simpatìo que crèis en favour de nosto lengo, la
fau cambia en proujèt councret, en poulitico publico.
La forço de proupousicioun dóu mounde assouciatiéu
uni e l’investimen de cadun an coumença de faire boulega li
causo. Es aquelo forço que nous menara sus lou camin de la recouneissènço
di dre que voulèn pèr la lengo d’oc.
La couourdinacioun Anen Oc (Institut d’Estudis Occitans,
Felibrige, Federacion dels Ensenhaires de Lenga e Cultura d’Òc,
Calandreta, Òc-Bi,
Conselh de la Joventut d’Òc).
|
Trin
de la journado
8 ouro e miejo : Acuiènci.
9 ouro – 9 ouro e miejo : encaminamen d’Anen Oc, Enavans. Ço
qu’esperan de la journado. Intervencioun courteto d’un representant
de chasque assouciacioun mèmbre dóu coumitat.
9 ouro e miejo – 10 ouro manco un quart : Lou mouvamen vist de
l’endeforo : agach critique sus si forço e soun flaquige… emé Couleto
Millet (antroupoulogo), un tèste d’Enri Jeanjean (Universita
de Wolongong-Australìo), Crestian Coulon (CNRS/IEP Bourdèu).
10 ouro manco un quart – 11 ouro : Debat: uno Manif. Óucitano,
sus la baso de la crido, en un soulet liò : Ounte? Quand? Coume?
11 ouro – Miejour e miejo : Groupe de refleissioun – Ataié sus
li tèmo de la Crido :
Quent óujeitiéu à terme mejan (2020) e quèntis
acioun councrèto de mena pèr lis avera.
- 1 Media. – 2 Creacioun. – 3 – Vido vidanto. 4 – Ensignamen.
5 – Acioun councreto, acioun simboulico fin qu’à 2009
(Coumitat loucau-relacioun emé l’Estat).
Miejour e miejo : Dina tira de la saqueto. (cadun se prevèi).
2 ouro – 4 ouro de l’après-dina : Raport di groupe
de refleissioun. Debat.
4 ouro – 5 ouro e miejo : Sintèsi.
Poudès faire saupre vosto participacioun à Couourdinacioun
Anen ! Oc, Oustau de Prouvènço, Pargue Jourdan, 13100 Ais-de-Prouvènço.
|
