| I’avié que
d’espera pèr saupre se lou mounde vendrié.
L’espèro fuguè pas longo, tre lou matin
es pèr pougnado, pèr brassado, pièi
pèr groupado que lou mounde se ramassèron.
Li càrri, à cha un, escampavon de manifestant.
N’en finissié plus. Se demandavian s’acò s’anavo
arresta. La plaço grouiavo de gènt, de gènt
que parlavo sa lengo.
La musico e li cant en lengo
nostro clantissien dins lis aut-parlaire penja dins tóuti li cantoun, entre que sus lou pountin
li persounalita dis assouciacioun ourganisarello prenien la paraulo
pèr dire soun franc valènt sus l’aparamen
de la lengo renegado pèr tóuti li gouvèr.
A
miejour, adeja, erian esbalausi de se trouba tant noumbrous
e pamens d’erso de mounde countùniavon de veni s’esquicha
sus la plaço.
È
ro à n’en ploura, tant acò nous sarravo
lou cor.
Emai, li vièi militant que sian, aguessian mena li Prouvençau
manifesta à Toulouso, óucupa l’estacioun
regiounalo de televisioun, carga pèr li CRS, emai aguessian
recampa 5.000 persouno sus lou Port Vièi de Marsiho, emai
se siguessian tirassa dins li manifestacioun de Mount-Pelié,
Clarmount d’Auvergno e tout lou restant, enjusqu’à Carcassouno
pourta pèr la crido de 10.000 persouno, jamai au grand
jamai avian vist tant de mounde… E jamai tant de
jouine…
Li jouine d’à passa tèms que se cresien li
darnié, podon avala sa croio la relèvo es
assegurado…
Quand l’ouro dóu despart venguè, erian
plus capable de pousqué saupre quant i’avié de
manifestant. L’Istitut d’Estùdi óucitan,
la Felco, li Calandreta, Òc-bi, e lou Counsèu
de la Jouventut d’Oc avien recampa si troupo à bèlli
moulounado. Lou
Felibrige èro pas en rèsto, cinquanto-uno
Escolo felibrenco aduguèron si sòci, emé de
milierat de felibre, e sege Majourau, au coustat dóu
Capoulié Jaque Mouttet, n’en prenguèron
la tèsto. La
mantenènço de Prouvènço, bèn
segur, èro aqui em’ un fube de Felibre. Pamens,
en mai di Felibre prouvençau, li militant dóu
mouvamen Parlaren coume li legèire de “Prouvènço
aro” e touto meno d’assouciacioun prouvençalo èro
noumbrous. La
manifestacioun que se voulié culturalo voulié garda
soun independènci pèr pas leissa un partit pouliti,
quente que siegue, veni tira la cuberto. Mai s’empachavo
pas que lis elegit de noste païs estaca à sa lengo
venguèsson. Fuguè lou cas, e se retroubèron
un mouloun darrié la bandiero “Elegit pèr
la lengo” la cherpo tricouloro sus lou pitre. De pòu
de n’óublida, li poudèn pas cita tóuti,
mai li conse de Prouvènço fasien ounour… E
pièi i’avié lis elegit di valèio
piemounteso d’Itàli, emai lou sèndi de
la coumuno de La Gardia, uno enclavo en Calabro ounte se parlo
la lengo d’oc. Ço que s’esperavo pamens, èro li candidat à la
presidènci de la Republico. Sus li douge, se n’en
veguè qu’uno, adurre soun soustèn en persouno,
Doumenico Voynet, candidato di Verd soustengudo pèr
lou P.Òc. Diguè qu’èro lèsto
pèr metre en plaço de dre pèr li lengo
regiounalo e de faire li cambiamen coustituciounau necite.
Absènto, la candidato Segouleno Royal qu’es resouludamen
pèr signa la Charto, tant soulamen forço mai
reservado pèr moudifica l’article 2, avié de
mounde dóu PS pèr la representa coume l’elegit
d’Aquitàni Renat Ricarrère, de-segur counvicu,
mai fai pas parié coume quand quaucun se desplaço…
La tresenco candidato, Marìo-Jòrjìo Jorgìo
??? Buffet, avié forço representant dóu
PC, mai èro pas aqui. Dins un coumunicat de prèsso
souvetavo de sucès à la manifestacioun de Beziés,
precisant “I’a urgènci à defini e
se douna li mejan d’uno vertadiero poulitico lenguistico
dins l’encastre de noste païs”… Ié fasen
pas dire !
Demié lis ome, lou candidat absènt, Micoulau
Sarkozy, que refuso francamen de ratifica la Charto éuroupenco
di lengo e culturo miejournalo, valènt-à-dire
qu’es pas questioun de touca l’article 2 de la
Coustitucioun, aquéu èro, mai vo mens, representa
pèr lou Maire de Beziés, Ramoun Couderc de l’UMP
vo encaro Mas Brisson, souto-presidènt dóu Counsèu
Generau di Pirenèu Atlanti qu’éu seguissié pas
la voues de soun mèstre en se disènt favourable à la
ratificacioun de la Charto.
Lou candidat biarnés, Francés Bayrou, maugrat
soun estacamen declara à la lengo de soun païs,
faguè pas lou viage. Leissè lou suen de lou representa
au deputa nimesen, Ivan Lachaud. Bèn segur, Francés
Bayrou prono la ratificacioun de la Charto éuroupenco.
Es éu que defendeguè, i’a quàuqui
mes, l’amendamen de l’article 2 de la Coustitucioun
emé l’apoundoun “dins lou respèt
di lengo regiounalo”. Acò es pas de proumesso,
lou Biarnés es adeja ana à la batèsto
pèr la recouneissènço di lengo regiounalo.
Lou segound candidat dóu Païs, Jóusè Bové,
leissè pas si pasturage dóu Larza, pèr
davala dins la plano. Si partisan èron aqui pèr
recounèisse coume lou dis que “la Franço
es coumpausado de culturo diverso e de lengo diverso”.
Lis àutri candidat an de-segur de mai grand soucit lou
17 mars que de s’óucupa de la lengo d’oc à Beziés.
Soun belèu favourable e coumprene qu’aguèsson
pas mesura l’impourtanço de la manifestacioun
que s’anavo debana. An encaro lou tèms de dire
que ratificaran la Charto éuroupenco e moudificaran
l’article 2 de la Coustitucioun. Pèr reveni sus terro, liuen di proumesso eleitouralo,
lou courtege de la manifestacioun fuguè tant long que
la bandiero de tèsto arribavo en fin de parcours entre
que li darnié avian pas encaro coumença d’avança.
Lou passo-carriero durè d’ouro e d’ouro.
La lengo clantissié d’en pertout. Se martelavo
de-longo “Anen, o! pèr la lengo d’oc”.
Li musico de tóuti lis encountrado dóu Païs
se jougavon. De la violo au galoubet, èro que de councert
tout de long dóu courtege. E li jouine èron aqui
emé si quitarro eleitrico pèr nous ramentan que
chanjan de siècle que nosto lengo s’acoumodo dóu
moudernisme. Èro pas poussible de faire l’ana-veni de l’avans à l’arrié de
la manifestacioun tant s’estiravo. Li journau, li radiò e
li televisioun èron d’en pertout, retroubaren
tout lou debana pèr lou menut dins si rendu-comte, mai
vuei sian estabóusi… poudèn pas embrassa
20.000 manifestant en un cop. Fuguè dins lis arèno sus lou poutin de la plaço
de la vilo que s’acabè la journado emé la
preso de paraulo di baile ourganisaire, D. Grosclaude, F.
Martel, I. Durand, J. B. Branar, M. C. Boivert, J. L. Blenet
e J. Mouttet. Fuguè que de crido e d’aplaudimen i revendicacioun
presentado, mai quento fuguè pas la joio di Felibre
vèire soun jouine Capoulié, Jaque Mouttet, aplaudi
mai que mai e bèn mai que lis autre.
Lou Felibrige a, de-bon aqui, retrouba sa grando plaço. Au
vèspre dóu 17 de mars poudèn se regaudi,
la manifestacioun de Beziés vèn de faire la provo, à bèus
iue vesènt, que nosto lengo es toujour vivènto
e que noste mouvamen assouciatiéu es capable de moubilisa
tant e mai, 20.000 persouno vuei es 50.000 deman e de-segur
nosto lengo boumbira deliéuro… | 
