Editouriau
dóu mes de abriéu 2015
Desvouloupamen…
2015,
es lou bèl an internaciounau de la Terro
LAssemblado Generalo di Nacioun Unido a declara pèr 2015 : An internaciounau de la Terro
Pèr nautre, afouga de la Prouvènço, lou sang e or de nosto vido, es forço interessant de regarda aquéli teourìo que soun pèr la sauvo-gardo dis identita terradourenco. Pèr acò nous ajudo Serge Latouche ( Vannes, 12 janvié 1940 ), filousofe ecounoumisto e soucioulogue bretoun, e si teourìo de la "decreissènço ecounoumico". Si teourìo nous dison que lou desveloupamen ecounoumi, tau que nous lou volon faire counèisse vuei, douno ges de benefice, perqué es respounsable de la destrucioun di culturo tradiciounalo, de la devastacioun de l’envirounamen e di ressourço naturalo.
La creissènço ecounoumico pousso is inegalita soucialo, i frustracioun e i depressioun di pople e alor, sènso pèr acò èstre counsidera de marxisto, - es pas uno questioun de drecho vo de gaucho -, fau frena aquest apaurimen.
Uno soucieta que se baso essencialamen sus la creissènço ecounoumico a pas un aveni, mentre, au contro se deurié recupera l’usage ancian e lou sèns de la mesuro di rèire pèr apara li ressourço naturalo, vertadié pan quoutidian de l’umanita.
Lou Bretoun, dins sa teourìo, nous parlo de la reducioun di counsum, de la reducioun di prouducioun, d’un retour au loucau e d’un usage resounable e coumpatible de l’envirounamen.
L’ecounoumìo capitalisto respounsablo de la crìsi es devengudo sèmpre de mai causo proumiero dóu "vuege de sèns" de la soucieta, ounte la teinico es pas plus un estrumen pèr la realisacioun de l’ome, mai es devengudo elo-memo uno fin.
Vuei sian indiscutablamen presounié di marcat, mentre que l’ecounoumìo - nouvèu vedèu d’or - es devengudo uno religioun pagano que se gounflo d’un sèmblo de demoucracìo.
Istòri vièio, d’efèt, la persecucioun jacoubino que voulié escafa lou crestianisme da la Franço - e li lengo terradourenco - aguè coume proumiero causo, li sòu e lis interès financié, pulèu que la filantroupìo vo la metafisico.
Dis Latouche : - Respèt à la gloubalisacioun, qu’es lou triounfe dóu marcat e de la finanço, fau voulé uno soucieta ounte li valour esclusivamen ecounoumico, soun marginalisado respèt au sacrado valour de la vido.
Fau escafa aquesto courso vers un counsum sèmpre majour, pèr evita la bèn seguro destrucioun di coundicioun de vido, mai subre-tout pèr faire sourti l’umanita de la misèri mouralo e de l’ignourènci ounte s’atrobo.
Pèr sourti d’aquesto gravo situacioun, fau dire basto emé lou mite de la creissènço ecounoumico e coumença uno reducioun dis ativeta ecounoumico e di counsum, e bèn segur de l’usage di ressourço naturalo.
Latouche nous fa faire un viage dins la gloubalisacioun pèr vèire la devastacioun di culturo loucalo à favour d’uno culturo foundado sus lou "prougrès", sus l’endustrialisme, sus lou capitalisme e sus la ditaturo de la teinosciènci.
Es uno analiso que parlo tambèn de l’istòri dóu coulounialisme coume fenoumène qu’a matrassa dins soun istòri lis anciàni civilisacioun.
La soucieta de counsum unifourmisarello es devengudo uno ideoulougìo que se vòu impausa à travès la retourico di dre uman, mentre que li mejan de coumunicacioun mouderne soun respounsable d’uno coulounisacioun faussamen douço e sènso armado.
Escriéu Latouche : - Sus li mountagno de la Novo Guinèio se pòu escouta d’un transistor lou darnié sucès musicau vengu de New York e se pòu vèire un coumtadin que béu un Coca-Cola. L’Óucidènt es respounsable de l’influènci sus lou "tresen mounde" pèr uno poulitico empausado dóu mounde riche e fort de sa puissanço ecounoumico au mounde paure.
Dins soun tratat pèr la decreissènço sereno, nous parlo di vuech esfors desenant indispensable pèr trasfourma uno soucieta en crìsi.
- Counsidera li diferènci terradourenco, pèr escafa lou vuege di valour subre-tout à travès l’elògi dis especificeta, espandi sèmpre de mai la soulidarita e crea un diferènt imaginàri e nouvèu biais de vèire di gènt.
- Restructura, siegue li prouducioun siegue li raport dins li coumunauta.
- Redistribuï li richesso e li ressourço, entre lou Nord e lou Sud e dedins chascuno coumunauta, pèr crea uno soucieta justo.
- Proudurre subre-tout à nivèu loucau pèr li besoun di poupulacioun loucalo e replega fisançous sus li coumunauta.
- Ramplaça lou gloubau emé li varieta e li marchandiso loucalo, mentre que li capitau dèvon èstre limita à l’indispensable, dins un proucès que se pòu pas limita à l’ecounoumìo, mai tambèn à la culturo terradourenco.
- Redurre l’efèt sus l’envirounamen à travès de formo diferènto de prouducioun, à travers mens bèn de counsum di ressourço.
- Recicla e utilisa tourno mai lis óujèt e li refus pèr enventa un nouvel usage.
Lou "desvouloupamen soustenable" es uno impousturo. D’efèt lou soulet desveloupamen qu’avèn couneigu es esta aquéu nascu dins la segoundo mita dóu siècle XVIIen en Anglo-terro emé la Revoulucioun endustrialo que s’es manifestado coume uno guerro contro-naturo. Pèr remedia à la guerro contro l’envirounamen se dèu lèu demeni l’efèt marrit - quouro naturalamen es marrit - de l’ome sus la Terro e nous sauva de la catastrofo ecoulougico.
"Creissènço respetouso", soun de bèlli paraulo enventado pèr douna un aspèt acetable au domaine de l’ome sus la Naturo, tout - acò revesti d’uno fausso ecoulougìo qu’escound l’agounìo de la Planeto. Segound lou biais de vèire de Latuche lou vertadié desveloupamen soustenable es aquèu de redurre l’esfruchamen di ressourço naturalo. L’ecounoumìo dèu èstre un mejan e noun uno fin encadenado à la ditaturo de la finanço.
Fin finalo, sènso toumba dins li tèms di pèiro, es l’ouro de tourna sus Terro e pèr restaura lou sèns de la mesuro, fau escafa aquesto courso vers un counsum sèmpre de mai creissènt, tambèn pèr faire sourti l’umanita de la misèri mouralo.
Roberto Saletta
|
