Editouriau
dóu mes de jun
Lou
tèms dis ounour...
Emé Jùli Ferry l'assassinat regla di lengo regiounalo
Fièr coume de castagnaire lou 31
de mars à Toulouso, lou fuguerian pèr dire i candidat à la
presidènci de la Republico que voulian garda nosto lengo.
Lou message èro entendu, tóuti aquéli poulitician
dóu gros grum se rambavon à l'idèio que se devien
de proumetre la luno pèr sauva li lengo regiounalo.
Aro qu'avèn plega bandiero, aro
que couneissèn lou noum dóu nouvèu baile de la Franço,
l'Óucitan de Courrezo, Francés Hollande, tout vai bèn,
sian toumba de la piboulo un pau vite, tre lou proumié discours
dóu bèl ome…
A degu entèndre bouto pèr barrau, pèr nous veni
tant lèu, un parèu d'ouro après sa nouminacioun,
lou 15 de mai, nous dire que lou plus grand ome de l'istòri franceso èro
Jùli Ferry, lou jacoubin centralisaire, que faguè de l'escolo
lou tèmple de la lengo franceso uno e unenco sus lou territòri
de la Republico
La machino d'integracioun republicano pèr impausa lou francés
founciouno toujour bèn, e noste nouvèu presidènt
ié vèn, aro, apourta un pau d'òli… es uno
coundicioun d'elevacioun soucialo !
D'aquéu moustre de Jùli Ferry, vuei a tóuti li bèuta…
Es, éu, bèu proumié, en 1881, qu'a interdi la pratico
dóu patoues à l'escolo. Pecaire, èro belèu
pas de sa fauto, aplicavo la lèi Falloux de 1850 : “ Le
français sera seul en usage dans l'école ”.
Acò èro uno bono causo, ansin dins tóuti li prouvinço
de l'Estat, li drole anavon aprene que parlavon pas uno lengo, mai un
patoues. E d'aro en lai, ié fauguè aprene à parla
coume si mèstre de Paris.
Li punicioun van plòure, li court de recreacioun saran pas espargnado… Fau
plus entèndre aquéli vièi parla di prouvinço
counquisto. Li que rafinaran pas lou francés saran coundana…
Jùli Ferry avié bèn coumprés l'avis de soun
davancié l'abat Grégoire : “ Ansin, emé trento
patoues diferènt, sian encaro, pèr lou lengage, à la
Tourre de Babèu…”
Jùli Ferry en bon coulounialisto t'anavo regla tout acò à grand
cop de bastoun.
Lou grand bourgés de Paris, trancavo de touto soun autour. En
Auvergno, en Aquitàni, en Lengadò, en Prouvènço
coume en Bretagno vo en Catalougno vivien que de pople pas gaire desvouloupa, èro
un devé pèr éu de li civilisa.
Sabèn pas trop dins quento raço nous metié quand
prouclamavo sènso vergougno en francés sarra :
“ Messieurs, il faut parler plus haut et plus vrai ! Il faut dire
ouvertement que les races supérieures ont un devoir vis-à-vis
des races inférieures… Je répète qu'il y a
pour les races supérieures un droit, parce qu'il y a un devoir
pour elles. Elles ont le devoir de civiliser les races inférieures”
Basto, sabèn pas dins quento banasto boutavo li Prouvençau,
mai si tèsi que repauson sus l'egalita, la liberta e l'independènci
di raço inferiouro, nous escapon encaro.
Lou grand servitour de la Rebublico se
sarié regaudi de l'article
2 de la Coustitucioun que si dìgnis eiretié nous an trouba.
Justamen, lou nouvèl eiretié en titre, nous dèura
dire se coumençara pèr supremi aquel article qu'empacho
la ratificacioun de la Charto éuroupenco di lengo regiounalo,
es uno de si sieissanto proupousicioun de candidat.
Rèn que l'evoucacioun de Jùli Ferry au proumié jour de soun
mandat presidenciau, es marrido marco…Marco-mau se permeno…
Pamens poudèn pas óublida que lou Presidènt beilejavo despièi
d'annado un despartamen ounte se parlo nosto lengo d'oc, e à l'escouto
de soun pople n'a degu faire l'aprendissage… Soun pople l’a pas jamai
vist coume aquéli Parisen que se vènon espaceja quàuqui
jour pèr mes dins soun doumaine de Courrezo. Noun èro un vertadié Courrezen, à ço
que se dis, pèr acò, aro, mancaren pas de ié ramenta soun
enracinamen óucitan, dounc lou devé qu'es lou siéu de sauva
lou parla de soun païs en ratificant, lèu lèu, la Charto éuroupenco
di lengo regiounalo coume l'a proumés.
I'anara à grand dèstre, à pas de gruio vo à pas de
loup, mai faudra pas vira lou pèd !
Basto, cresian de teni noste alen dins
aquelo abrivado presidencialo, mai pecaire, lou Jùli Ferry nous
a pres de court.
Rena, sabèn faire qu'acò en lengo nostro, nous lou van
pas manda dire…
|