Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de juilet/avoust 2018

 

Pichot-noum Prouvènço
Sian Sudisto, ni court, ni coustié de la rèire PACA

Aqueste cop, ié sian, demouran dins la Regioun Sud, lou presidènt Renaud Muselier e lou rèire presidènt Crestian Estrosi an anouncia, lou 11 de jun à Paris, que sarié des-nant la nouvello marco regiounalo

Dins soun lengage, en marketing se dis de “testimonal”… Es pas coumplica, coume lou faguè saupre lou Renaud Muselier : “On ne change pas le nom de la région, elle regroupe trois marques du monde”.
Vaqui, es uno nouvello marco, disian de reclamo, aro de publicita : “Là où se trouve le pouvoir, on crée une marque qui nous positionne mieux en France et à l’international”.
Pardine, an crea sa marco, coume frigidaire, kleenex, scotch, zodiac, karcher, stabilo, o encaro bic.
“On a tout imaginé nous-mêmes…” Quento tèsto, aquéli demoucrato de ma grand la borgno ! An pas coupa li dènt i granouio ! Basto ! aquelo marco “Sud” te la van placarda d’en pertout, sara un bèu mejan de proumoucioun pèr escafa “Prouvènço”. T’an pas sachu que lou raport demanda pèr soun davancié, Michèu Vauzelle, avié counclu que, la Regioun, la falié tout simplamen apela “Prouvènço” coume lou demandavo la majourita de la poupulacioun… Noun ! Acò s’en devèn coume peto de cabro pèr éli. An chausi sus la banasto li bèu Sudisto que falié pèr presenta la marco : lou snow-boarder, Pierre Vaultier, l’atriço, Michelle Laroque, l’architèite, Rudy Ricciotti, la cantairis, Imane, lou plounjaire, Guillaume, lou cap cousinié, Alexandre Mazzia… e lou coumedian Kad Merad, qu’éu i’anè, plen d’estrambord : “Je n’oublie pas d’où je viens. Le Sud putaing!”.
Mai, es l’atriço, Michèlo Bernier, qu’a manda lou lança-men de la marco : “La boussole elle est con : elle indique le Nord alors que tout le monde préfère le Sud!”
Es pas bello la vido en Regioun Sud ? Que si! N’an fa un filme de proupagando publicitàri que vanto aquelo putano de Regioun Sud, emé la musico de Nino Ferrer. “Le Sud, c’est une excellence”, coume l’a di Crestian Estrosi. An óublida la crècho pèr jouga li ravi… Houi ! Saupre se li santoun dóu Sud gardaran si tenènci dins aquéu bourroulis d’apelacioun !
Es pamens tout vist qu’es uno denouminacioun usualo dins lou mounde: Région Sud (Brésil) Région du Sud (Cameroun) Région Sud (Malawi) Région Sud (Malte) Région Sud (Nouvelle-Calédonie) en France métropolitaine : Sud-de-France est la marque de la région Occitanie. E aro es la marco de la PACA. Pèr aquéli qu’enjusqu’aqui entèndon ni dia ni viravòut, es simple à dire coume l’a fa la beilesso de l’Agènci Image7, que fai la campagno de publicita, Florence De Soos : “Le Sud, c’est très simple et fédérateur, c’est comme un nom de famille sur le patrimoine culturel, naturel et historique des prénoms Provence, Alpes et Côte d’Azur”.
Mèfi pamens de pas metre li pichot noum avans lou noum de famiho, qu’emé lou Sud en darrié, farié PACAS, un poulit acrounime de mai ! Pecaire, sarié un calvàri pèr noste pre-sidènt que n’en poudié plus, coume disié en se doulouirant : “Je ne supportais plus l’acronyme PACA, qui ne veut rien dire. Notre territoire c’est le soleil, la mer, la montagne, le bien-vivre”, tweetavo M. Muselier.
Bon, aro lou site internet de la regioun s’apello plus regionpaca.fr, mai, desenant, es sa regioun à-n-éu : maregionsud.fr Se perdèn dins li sutileta de lengage, mai avèn pas de se plagne, pèr nosto lengo, lou mot “Sud” pauso pas de proublèmo de grafìo, s’escriéu tout parié. Briançoun sara au nord dóu Sud e Touloun au sud dóu Sud, lou grand sud, lou sudas, que ! Lou proublèmo es que se sian fa couiouna un cop de mai emé nosto peticioun que pamens pourtavo encaro la bello provo que lou pople voulié garda rèn que lou noum de “Prouvènço”, en coumtant mai de 15 000 signaturo. Diausse! Es la demoucracìo sènso dèmos, lou pople sara plus jamai soubeiran en regioun Sud, es tout vist!

* Vai, noste bèu presidènt de Regioun Sud aurié miés fa de s’óucupa de sauva la lengo de Prouvènço, coume lou vèn de faire la Regioun Óucitanìo. Tant lèu agué pres ate di declaracioun dóu menistre de tutèlo de France-Télévision dóu triplamen dóu tèms d’emissioun dis anteno regiounalo, lou Counsèu regiounau d’Óucitanìo voutè un amendamen que se ié trobo noutamen demanda uno : Augmentation substantielle du temps d’antenne consacré à l’expression, vivante et contemporaine, des langues occitane et catalane, incluant notamment une dimension pédagogique ( sous-titrage, modules d’apprentissage, apport de ces langues dans la vie quotidienne…).
Pas proun d’acò soun ana aganta lou menistre de l’Educacioun pèr la prouteicioun e la proumoucioun di lengo e culturo regiounalo dins l’encastre de la reformo dóu bacheleirat. E ié dison qu’estènt que l’ensignamen di lengo regiounalo rèsto facultatiéu es necite que la reformo siegue un mejan de lou ranfourça :
-pèr un desvouloupamen dóu pes de la noto au bacheleirat ;
- pèr l’atribucioun d’un estatut sènso councurrènci emé lis àutris óupcioun ;
- pèr uno duberturo de l’óupcioun lengo óucitano à l’ensèn di filiero teinoulougico ;
- pèr uno mencioun e un encourajamen à la duberturo de seicioun lengo regiounalo au licèu e valourisacioun au bacheleirat (noutamen iscripcioun sus lou diplomo…) ;
- pèr uno poussibleta d’integra un ensignamen de lengo vivènto regiounalo dins la disciplino “lengo e literaturo estrangiero”…
Osco pèr la Regioun Óucitanìo ! La Regioun Sud se n’en cago !

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat