Editouriau dóu mes de desèmbre 2019
Manifestacioun
L’ensignamen di lengo regiounalo es en trin
de bouli à gròssis oundo…
Lou bouclage de voste journau se fasènt la darniero semano dóu mes, poudian pas espera lou darnié jour, lou 30 de nouvèmbre pèr baia lou comte-rendu di manifestacioun anounciado pèr la defènso di lengo regiounalo à l’encontre dóu menistre de l’Educacioun naciounalo, Jan-Miquèu Blanquer qu’es entrin de faire un chaple pèr lèu escafa tóutis aquéli patoues que fan vergougno à l’article 2 de sa Coustitucioun : Lou francés soulet es la lengo de la Republico, óufrèndo toujour d’atualita. Lou nouvèu presidènt parieramen se torco li babino pèr brandi l’Edit de Villers-Cotterêts, coume se dis : uno dato majo de la coustrucioun naciounalo que coumencè de rèndre lou francés óubligatòri dins lis ate óuficiau.
Moussu Macron vèn de bandi soun grand proujèt patrimouniau pèr renouva lou castèu de Villers-Cotterêt tre lou mes de janvié 2020.
Aperaqui 100 milioun d’éurò saran deblouca pèr restaura lou mounumen de l’Ourdounanço de Villers-Cotterêt.
Lou presidènt plen de bravouro patrioutico pèr la lengo franceso d’abord vai emplanta dins aquéu castèu uno “ Ciéuta de la Francoufounìo ”.
Aqui la dato de 1539 rapelara la vitòri dóu francés, la bello debuto de l’assassinat di lengo regiounalo, emé la Revoulucioun e soun abat Grégoire, emé l’Escolo Publico e soun Jùli Ferry, emé Francés Mitterrand e soun article 2, emé li gouvernaire qu’an segui e an refusa de ratifica la Charto éuroupenco di lengo regiounalo souto escampo de tout meno d’escapatòri, emé aro lou bèu Blanquer e sa barquejado à contro-courrènt dins l’ensignamen inmersiéu di lengo regiounalo.
Basto ! La rampelado dóu couleitiéu “ Pour que vivent nos langues ” èro mai que necito e faguè l’unanimeta, meme lou Felibrige repren sa toco pèr defèndre la lengo en apelant à manifesta à Paris aquéu dissate 30 de nouvèmbre davans lou Menistèri de l’Educacioun naciounalo.
Tant soulamen, coume lou cop passa, l’apèu à manifesta s’es desdoubla demié li Prouvençau, quouro lou meme jour d’ùni èron ana à Mount-Pelié, d’autre en Arle.
Parieramen, pèr lou 30 de nouvèmbre lou Couleitiéu Prouvènço sounavo lou rampèu pèr un rassemblamen en Arle e pas à Paris. Si resoun sarien que la moubilisacioun “ Pour que vivent nos langues ” fuguè menado pèr li deputat Francés Alfonsi e Pau Molac, membre de la Federacioun “ Regioun e pople soulidàri ”, que, pecaire, fasien pas mencioun de la lengo prouvençalo.
Lou presidènt Jan-Pèire Richard, toujour embrandable afourtissié : “ Lou Couleitiéu Prouvènço entènd reafierma sa voulounta de defèndre lou prouvençau en tant que lengo de Franço à part entiero… E noun coume un souto-dialèite de l’óucitan.”
Vaqui lou comte di manifestant vai èstre mai coumplica à dreissa.
Segur, tóuti renavon contre l’esclapage de l’ensignamen di lengo regiounalo tant bèn engimbra pèr Moussu lou Menistre, mai en Arle se i’apound uno revendicacioun de mai, la recouneissènço de la lengo prouvençalo ensignado en Prouvènço en liogo d’aquelo apelacioun pleounasmatico : l’óucitan-lengo d’oc, que se n’en gargarison li saberu dóu gros grum universitàri.
Vièio querèlo dis ancian e di mouderne sus la denouminacioun usualo de noste parla de Bèu-Caire vo de Tarascoun.
Aro lou chanjamen de ribo fai plus passa d’empèri en reiaume, mai de regioun Óucitanìo en regioun Sud, e nous van emplastra d’un las la lengo óucitano e de l’autre la lengo sudisto ?
Vai tout acò es d’istòri de marrido lengo…
Fau pas leissa courre sa lengo, n’en diren pas mai !
Poudren soulamen dire, lou mes que vèn, se li dos manifestacioun an capita coume lou souvetavian pèr rembraia lou bèu menistre Blanquer.
Bernat Giély
|
